ދެމެހެއްޓެނިވި ގޮތެއްގައި ހިންގަން އާރުޓީއެލް ފެރީގެ ޓިކެޓް އަގުތައް ބޮޑުކުރަން ޖެހޭ: އަމީން

ސަރުކާރުގެ ހައި ސްޕީޑް ފެރީ ހިދުމަތް، އާރުޓީއެލް ހިދުމަތް އަގު ހެޔޮކޮށް ދިނުމަށް ސަރުކާރުން ދޭން ޖެހޭ ސަބްސިޑީ ވަރަށް ބޮޑު ކަމަށާއި އެގޮތަށް އެ ހިދުމަތް ދިގު މުއްދަތުގައި ކުރިއަށް ނުގެންދެވޭނެތީ މިހާރު ހިދުމަތަށް ނަގާ އަގު ބޮޑު ކުރަން ޖެހޭ ކަމަށްޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

ވީ ކިހިނެއް؟ - ރައްޔިތުންގެ މަޖިލީހުުގެ އިގްތިސާދީ ކޮމެޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ އާރުޓީއެލް ފެރީގެ ހިދުމަތަކީ ރައްޔިތުން ބަލައިގަންނަ ރަނގަޅު ހިދުމަތެއް ކަމަށާއި އެ ހިދުމަތް ދެމެހެއްޓެނިވި ގޮތެއްގައި ފޯރުކޮށްދޭން ޖެހޭ ކަމަށެވެ.

ތަފްސީލް - އެ ހިދުމަތް ފޯރުކޮށްދިނުމަށް ސަރުކާރުން ސަބްސިޑީ އަށް ކުރާ ހޭދަ ކުޑަކުރަން ޖެހޭ ކަމަށް މިނިސްޓަރު ފާހަގަ ކުރެއްވި އެވެ.

އަމީން ފާހަގަ ކުރެއްވި ގޮތުގައި އާރުޓީއެލްގެ ހިދުމަތް ފެށި ފުރަތަމަ އަހަރު ސަބްސިޑީގެ ގޮތުގައި ސަރުކާރުން 48 މިލިއަން ރުފިޔާ ހޭދަކޮށްފައިވެ އެވެ. މިދިޔަ އަހަ ރު130 މިލިއަން ރުފިޔާ ހޭދަކުރި ކަމަށާއި މި އަހަރު ނިމޭއިރު އެ އަދަދު 280 މިލިއަން ރުފިޔާ އިން މައްޗަށް އަރާނެ ކަމަށް އޭނާ ފާހަގަ ކުރެއްވި އެވެ.

"ދައުލަތަށް ކެެތްވާނެ ގޮތެއް ނޫން މިހާރު އޮތް މޮޑެލްގައި އޮޕަރޭޓު ކުރުމަކީ. އެއީ %20 ރިކަވަރީ %80 ސަބްސިޑައިޒް ކުރަން ޖެހޭ. އޭގެ މާނައަކީ 1 ބިލިއަން ރުފިޔާ ދާނެޔޭ ސަބްސިޑީ އަށް،" މިނިސްޓަރު ވިދާޅުވި އެވެ.

"މަސައްކަތް ކުރަނީ ސަބްިސޑީ ލެވެލް %55 އަށް ކުޑަކޮށްފަ %45 އަށް ރިކަވަރީ ހަދަން. އެހެން ނޫނީ ސަސްޓެއިން ނުކުރެވޭނެ."

އަމީން ވިދާޅުވީ އާރުޓީއެލް ހިދުމަތުގެ އަގުތައް ކަނޑައެޅުމަށް އިކޮނޮމިކް ކައުންސިލަށް ހުށަހަޅުއްވާނެ ކަމަށެވެ. މީގެ ކުރިން އެމްޑީޕީގެ ސަރުކާރުގައި ވެސް އަގުތައް ކަނޑައެޅީ އިކޮނޮމިކް ކައުންސިލުން ކަން އޭނާ ފާހަގަ ކުރެއްވި އެވެ.

އަމީން ވިދާޅުވީ:

އަމީން ވިދާޅުވީ އާރުޓީއެލް ހިދުމަތް ފުޅާކުރުމަށް ކުރީ ސަރުކާރުން އެކުލަވާލާފައިވާ ޕްލޭން ރަނގަޅު ކަމަށެވެ. މިހާރު ވެސް އަމަލު ކުރަނީ އެ ޕްލޭނަށް ކަމަށާއި ހަމައެކަނި ގެނައި ބަދަލަކީ 2027 ވަނަ އަހަރުގެ ނިޔަލަށް މުޅި ރާއްޖެއަށް އެ ހިދުމަތް ދޭން ފަށާގޮތަށް އޮތް އޮތުން 2026އަށް ބަދަލު ކުރުން ކަމަށެވެ.

ފާހަގަ ކުރެވޭ - މީގެ ކުރިން ވެސް މިނިސްޓަރު ވަނީ އާރުޓީއެލް ދަތުރުކުރާ ބައެއް ރޫޓުތައް ބަދަލު ކުރަން ޖެހޭ ކަމަށާއި މިހާރު އޮތްގޮތުން ބޮޑެތި ހަރަދުތަކެއް ހިނގާ ކަމަށް ވިދާޅުވެފަ އެވެ.

މިހާރު 4 ޒޯނެއްގައި މި ހިދުމަތް ދޭ؛ އެއީ ހއ.، ހދ.، އަދި ށ. އަތޮޅު ހިމެނޭ ޒޯނުގެ އިތުރުން ޅ. އަތޮޅު، ނ. އަތޮޅު އަދި އެންމެ ދެކުނު ގއ.، ގދ.، ފުވައްމުލައް އަދި އައްޑޫގަ އެވެ.