ޕީއެންސީއަށް 65،000އަށް ވުރެ ގިނަ މެންބަރުން ހަމަވެއްޖެ: ފަލާހު

ވެރިކަމުގައި އޮތް ޕީއެންސީއަށް މެމްބަރުން އިތުރު ކުރުމަށް ކުރަމުން އަންނަ މަސައްކަތުގެ ތެރެއިން މިހާތަނަށް 65،000 މެންބަރުން ހަމަކުރެވިއްޖެ ކަމަށް އެ ޕާޓީގެ ޕާލިމަންޓްރީ ގްރޫޕުގެ ލީޑަރު، އިބްރާހިމް ފަލާހު ވިދާޅުވެއްޖެ އެވެ.

ވީ ކިހިނެއް؟ - އަންނަ މަހުގެ 17އަށް މި ސަރުކާރަށް އަހަރު ފުރޭއިރު، 75،000 މެންބަރުންނާ އެކު ރާއްޖޭގެ އެންމެ ބޮޑު ޕާޓީއަށް ޕީއެންސީ ހެދުމަށް ރައީސް މުހައްމަދު މުއިއްޒު ވަނީ އަމާޒު ހިތްޕަވާފަ އެވެ. އެ އަމާޒަށް ވާސިލުވުމަށްޓަކައި މިއަދު މާލޭގައި މެމްބަޝިޕް އިތުރު ކުރުމުގެ ބޮޑު ހަރަކާތެއް ވަނީ ފަށާފަ އެވެ.

ތަފްސީލު - މާލޭގައި ހުންނަ ޕީއެންސީގެ ރަސްމީ ހަރުގެއިން އެ ހަރަކާތް ފެށުމުގެ ކުރިން އެ ސަރަހައްދުގައި ހުންނަވައި ނޫސްވެރިންނާ ވާހަކަ ދައްކަވަމުން ފަލާހު ވިދާޅުވީ، ރައީސް މުއިއްޒުގެ އެދިވަޑައިގަތުމުގެ މަތިން އަންނަ މަހުގެ 17ގެ ކުރިން 75،000 މެންބަރުން ޕީއެންސީއަށް ހަމަ ކުރުމުގެ މަސައްކަތް ވަރަށް ބާރަށް ކުރަމުންދާ ކަމަށެވެ. އަދި އެ ތާރީހުގެ ކުރިން އެ ޓާގެޓު ހާސިލުވާނެ ކަމުގެ ފުރިހަމަ ޔަގީންކަން އެބަ އޮތް ކަމަށް އޭނާ ވިދާޅުވި އެވެ.

"ގާތްގަނޑަކަށް މިދިޔަ ދެ މަހެއްހާ ދުވަހު، އަޅުގަނޑުމެންގެ ޕާލިމަންޓްރީ ގްރޫޕު އަދި ކަމާ ގުޅުން ހުރި ޓީމުތަކުން ކުރި މަސައްކަތުން، ﷲ އިރާދަކުރެއްވިއްޔާ 65،000އަށް ވުރެ ގިނަ މެންބަރުން މިއަދާ ހަމައަށް ހަމަވެއްޖެ. އެހެންވީމަ މިއަންނަ މަހުގެ މެދު ތެރެއަށް އަންނަ އިރު 75،000 ހަމަވާނެ،" އިނގުރައިދޫ ދާއިރާގެ މެންބަރު ފަލާހު ވިދާޅުވި އެވެ.

ރާއްޖޭގެ ސިޔާސީ ޕާޓީއަކަށް 75،000 ހަމަވުމަކީ އަދި މިހާތަނަށް ތާރީހުގައި ވެފައި އޮތް ކަމެއް ނޫންކަން ފާހަގަކުރައްވައި އޭނާ ވިދާޅުވީ، މިހާ ގިނަ އަދަދަކަށް މެންބަރުން ޕީއެންސީއަށް ގުޅުމުން އެނގެނީ ސަރުކާރަށް އޮތް ތާއީދު ކަމަށެވެ. އަދި ރައީސް މުއިއްޒުގެ ސިޔާސަތުތައް ރައްޔިތުން ބަލައިގަތުން ކަމަށް އޭނާ ވިދާޅުވި އެވެ.

"މިއިން ދައްކައިދޭ އެންމެ މުހިންމު އެއް ކަމަކީ އަޅުގަނޑުމެންގެ އިއްޒަތްތެރި ރައިސުލްޖުމްހޫރިއްޔާގެ ސިޔާސަތަށް، އެ މަނިކުފާނުގެ މި ސަރުކާރުގެ ކަންކަން ގައުމުގެ އެންމެހާ ކަންކަން ރައްޔިތުންނާ ގާތުން ކޮށްދޭލެއް ފުރިހަމަކަމުން ރައްޔިތުން މިވަރުގެ އިޖާބައެއް މިދެނީ،" ފަލާހު ވިދާޅުވި އެވެ.

މިއަދުގެ ހަރަކާތާ ގުޅޭ ގޮތުން އޭނާ ވިދާޅުވި:

މިއަދުގެ ހަރަކާތުގައި ޕީއެންސީއަށް ނިސްބަތްވާ މަޖިލިސް މެންބަރުންނާއި އެ ޕާޓީގެ އެ ނޫން ވެސް ސިޔާސީ އެކި ބޭފުޅުން އަދި ސަރުކާރުގެ ސިޔާސީ މަގާމުތަކުގައި އާއި ކުންފުނިތަކުގައި ތިއްބެވި ބޭފުޅުން ބައިވެރިވެވަޑައިގަންނަވަ އެވެ. އަދި ޓީމުތަކަށް ބަހާލައިގެން، އެ ބޭފުޅުން ގޭއަށް ވެސް ފޯމު ފުރުމަށް ވަޑައިގަތުމަށް ވަނީ ހަމަޖެހިފަ އެވެ.

އެންގުން މުހިންމު - އިލެކްޝަންސް ކޮމިޝަނުން އެންމެ ފަހުން އާންމު ކުރި ތަފާސްހިސާބުތަކުން ދައްކާ ގޮތުގައި، ޕީއެންސީގެ މެންބަރުންގެ އަަދަދު އުޅެނީ 28،900ގަ އެވެ. އިލެކްޝަންސްގެ ދަފްތަރަށް ބަލާއިރު، އެންމެ ބޮޑު ޕާޓީއަކަށް މި ވަގުތު އޮތީ ބައި ލައްކައެއްހާ މެންބަރުންނާ އެކު އިދިކޮޅު އެމްޑީޕީ އެވެ.