ސަމާހު މަރުވި އެކްސިޑެންޓުގައި ކާރު ދުއްވަން އިން މީހާ.
ސަމާހުގެ މަރު: ކާރު ދުއްވަން އިން ވިސާމަށް ދައުވާކޮށްދޭން އެދިއްޖެ
ސްޕޯޓްސް ކާރަކުން ޖެހި މިދިޔަ މަހު ހަސަން ސަމާހު މަރުވި މައްސަލާގައި ޝަރީއަތް ނިމެންދެން ބަންދުކޮށްފައިވާ މުހައްމަދު ވިސާމް ސިދުގީ މައްޗަށް ދައުވާކޮށްދޭން އެދި ޕްރޮސެކިއުޓަ ޖެނެރަލް (ޕީޖީ) އޮފީހަށް ފޮނުވައިފި އެވެ.
ވީ ކިހިނެއް؟ - ހުޅުމާލޭ ސެންޓްރަލް ޕާކް ކައިރިން، އުރީދޫ އޮފީސް އިމާރާތް ކުރިމަތީގައި އެ އެކްސިޑެންޓު ހިނގާފައިވަނީ މިދިޔަ މަހުގެ 6 ވަނަ ދުވަހުގެ ރޭ ދަންވަރު 2 ހާއިރު އެވެ.
އެ އެކްސިޑެންޓުގައި އަނިޔާވި ސަމާހު، 23، މަރުވީ ހުޅުމާލޭ ހޮސްޕިޓަލުގައި ފަރުވާދެމުން ދަނިކޮށް ހަމަ އެ ދުވަހު އެވެ.
ތަފްސީލް - ފުލުހުން މީޑިއާތަކަށް މިއަދު ފޮނުވި މެސެޖެއްގައި ވަނީ ވިސާމުގެ މައްޗަށް ކޮށްދޭން އެދުނީ މިދިޔަ ހޮނިހިރު ދުވަހުގަ އެވެ. ނަމަވެސް، އޭނާގެ މައްޗަށް ކޮށްދޭން އެދުނު ދައުވާއެއް ފުލުހުން ހާމައެއް ނުކުރެ އެވެ.
އޭގެ އިތުރުން، ފުލުހުން ފާހަގަކޮށްފައިވަނީ:
-
މި މައްސަލާގައި ހައްޔަރުކުރި ވިސާމު، 26، ވައިލެޓްފެހި/އައްޑޫ ހިތަދޫގެ އަތުގައި ކާރު ދުއްވުމުގެ ލައިސެންސެއް ނޯވޭ
-
އޭނާ ބަންދުކޮށްފައިވަނީ އުސޫލާ ހިލާފަށް ކަމަށް ބުނެ ބަންދު އަމުރު ބާތިލުކޮށްދިނުމަށް އެދި ހައި ކޯޓަށް ހުށަހަޅާފައިވޭ
އެނގުން މުހިންމު - އެކްސިޑެންޓުގައި ބޮލާއި މޫނުމައްޗަށް ބޮޑެތި އަނިޔާތަކެއް ލިބުނު ސަމާހު މަރުވީ ހުޅުމާލޭ ހޮސްޕިޓަލަށް ގެންދިޔަތާ ކުޑަ އިރުކޮޅެއްގެ ތެރޭގަ އެވެ.
ކޮމެންޓް