އޭއައިއާ ގުޅޭ މާސްޓަ ޕްލޭނެއް ހަދަން ނިންމައިފި
އާޓިފިޝަލް އިންޓެލިޖެންސް (އޭއައި)އާ ގުޅޭ މާސްޓާ ޕްލޭނެއް ހަދަން ކެބިނެޓުގެ ލަފަޔާ އެކު ރައީސް މުހައްމަދު މުއިއްޒު ނިންމަވައިފި އެވެ.
ވީ ކިހިނެއް؟ - ރައީސް އޮފީހުން ބުނީ އިއްޔެ ބޭއްވި ކެބިނެޓް ބައްދަލުވުމުގައި ނިންމީ ސަރަހައްދުގެ އެހެން ގައުމުތަކުގައި ވެސް އޭއައިއާ ގުޅުން ހުރި ކަންކަމުގައި އަމަލުކުރާ ގޮތް ބެލުމަށް ފަހު އެކަމާ ގުޅޭ މާސްޓާ ޕްލޭނެއް އެކުލަވާލަން ކަމަށެވެ.
ތަފްސީލް - އެގޮތުން އޭއައި މެދުވެރިކޮށް އިގުތިސޯދީ ފައިދާ އެންމެ ފުރިހަމަ ގޮތުގައި ރާއްޖެއަށް ހޯދޭނެ ގޮތްތަކާއި، ދިމާވެދާނެ ނުރައްކާތެރި ހާލަތްތަކުން ސަލާމަތްވާނެ ގޮތްތަކާއި، އެ ޓެކްނޮލަޖީގެ ބޭނުން ހިފުމުގައި ރާއްޖޭގައި އަމަލުކުރާނެ ގޮތުގެ ގާނޫނީ ފްރޭމްވޯކެއް ހަދަން ނިންމެވި އެވެ.
އޭއައިއާ ގުޅޭ މާސްޓާ ޕްލޭނެއް އެކުލަވާލައި، އެކަމާ ގުޅޭ ކަރުދާސްތައް ކެބިނެޓަށް ހުށަހަޅާނީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލަޖީ އާއި މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ކަމަށް ވެސް ނިންމެވި އެވެ.