މިއީ މަސައްކަތުގެ މާހައުލުގައި ބުލީކުރުމުގެ މިސާލެއް

މަމްދޫދު އަބްދުއްސަމަދަކީ އުފަންވި އިރު ވެސް ލޮލުގެ އައިބުކަމެއް ހުރި މީހެކެވެ. އަދި ސިކުނޑީގެ އުނިކަމެއް ހުރެ، ދާއިމީކޮށް ބޭސްކާން ޖެހިފައިވާ މީހެކެވެ. އުފަންވި އިރުއްސުރެ ތަހައްމަލު ކުރަމުންދާ ކަންކަމަށް ވާތީ، މިއީ މަމްދޫހަށާއި އޭނާގެ އާއިލާއަށް އާދައިގެ ކަންކަމެވެ. އެކަމަކު އޭނާގެ ނުކުޅެދުންތެރިކަން ހަނދާންކޮށްދީ، އެކަމާ މެދު ހިތާމަކުރަން މަޖުބޫރުކުރުވީ، ވަޒީފާގެ މާހައުލުން ކުރިމަތިވަމުން ދިޔަ ފުރައްސާރަތަކެވެ.

"އެއްކޮށް ވަޒީފާ އަދާކުރާ މީހުން، ކޮންމެ ދުވަހަކު ވެސް ދޮންބެއަށް މަލާމާތް ކުރޭ. ކޮންމެ ދުވަހަކު ވެސް ވަނަމުން ގޮވާ ބުލީކޮށް ހަދާ،" މަމްދޫދުގެ އެއްބަނޑު އެއްބަފާ ކޮއްކޮ ދިޔާނާ ސައީދު ބުންޏެވެ.

ނުކުޅެދުންތެރިކަން ހުންނަ މީހަކަށް ވާތީ، އާއިލާގެ ތެރެއިން އޭނާއަށް ގާތްކަމާއި ލޯބި ލިބެ އެވެ. އެކަމަކު ވަޒީފާ އަދާކުރުމަށް ބޭރަށް ނުކުތުމުން ކުރިމަތިވީ، ފުރައްސާރަ އާއި މަލާމާތެވެ.

މަސްބަންދު ކުރާ ކާރުހާނާއެއްގައި މަސައްކަތްކުރާ ބޭބެއަށް ކުރިމަތިވަމުން އަންނަ މި އުނދަގޫތައް ސޯޝަލް މީޑިއާއަށް ދިޔާނާ ބަންޑުންކޮށްލީ، އެކަމަށް ހައްލެއް ނައިސް އަހަރުތަކެއް ވުމުންނެވެ. އޭގެ ސަބަބުން ބޭބެ ނަފްސާނީ ހާލަތަށް އަސަރުކޮށް، އަމިއްލަ ނަފްސު ކުށްވެރިކުރާ ހިސާބަށް ދިޔުމުންނެވެ. ދިޔާނާ ބުނިގޮތުގައި ވަޒީފާގެ މާހައުލުގައި ބޭބެ ހުންނަނީ ބާކީވެފަ އެވެ. ލޮލުގެ ކޮޅަށް ފެނުނަސް، އޭނާގެ އައިބުތަކަށް މަލާމާތް ރައްދުވާ ގޮތަށް، ވަނަމުން ގޮވާ ހަދަ އެވެ. ގުރޫޕު ހަދައިގެން މައްލަވަ ކުރާތީ، އެތަނުގެ ކެންޓީނަށް ދާން ވެސް ޖެހިލުންވެ އެވެ. ދިޔާނާ ބުނިގޮތުގައި ކިތަންމެ ބަނޑުހައި ވިޔަސް، ބޭބެ ދެން ހުންނަން ފެށީ ބަނޑަށެވެ.

އެކަން ދަންނަ އެހެން މީހަކު ބުނިގޮތުގައި ސައިބޯން ކަމަށް ބުނެ، ބައެއް މުވައްޒަފުން މަމްދޫދު ކެންޓީނަށް ގެންދިޔުމަށް ފަހު، ވައްކަން ކުރީ ކަމަށް ބުނެ އެވެ. އަދި މެނޭޖްމެންޓުން އޭނާ ކަނޑާލާނެ ކަމަށް ބުނެ ބިރު ދައްކަ އެވެ. ސިކުނޑީގެ އުނިކަމެއް ހުންނާތީ، އެކަން ގަބޫލުކޮށް މަމްދޫހު، ބިރުގަނެ ހާސްވެ އެވެ.

"އާއިލާގެ މީހުންނާ އަޅުވާ ކިޔައި، ރުޅި އަރުވާލާފައި އެބަ ޓިކްޓޮކް ހަދާ އާއްމު ކުރޭ. ދެން އޭނާ ރުޅިގަދަވެގެން ދިފާއުގައި ކަމެއް ކުރީމައި އެ މީހުން ވެސް އަނިޔާކުރަނީ،" އާއިލާއިން ވާހަކަ ދެއްކި އެހެން މީހަކު ބުންޏެވެ.

އާއިލާއިން ބުނާގޮތުގައި މަމްދޫދަށް ފިޓު ޖެހެން ފެށީ ވެސް، އަހަރުތަކެއް ކުރިން އެގޮތަށް މުވައްޒަފަކު ކުރި އަނިޔާގަ އެވެ. އެ މައްސަލައަށް ފަހު މުވައްޒަފު ވަޒީފާއިން ވަކި ކުރި ނަމަވެސް، އެ ފަދަ އަނިޔާތަކާއި ފުރައްސާރަތަކަކުން އޭނާ ސަލާމަތެއް ނުވެ އެވެ.

ނުކުޅެދުންތެރިކަން ހުންނަ މީހެއް ނަމަވެސް، މަމްދޫދަކީ ކައިވެނިކޮށްގެން އުފަލުގައި އުޅެމުން އައި މީހެކެވެ. ލިބިފައިވާ ދެ ދަރިންނަށް ހަރަދު ކުރަނީ އޭނާ އާމްދަނީ ހޯދައިގެންނެވެ. އެކަމަކު ވަޒީފާގެ މާހައުލުން، މެދުކެނޑުމެއް ނެތި ކުރިމަތިވަމުން އަންނަ ފުރައްސާރަ އާއި ބުލީކުރުމާ ހެދި އޭނާ ހުރީ ހުރިހާ ކަމެއްގެ މަތިން ވެސް ފޫހިވެފަ އެވެ.

"ކުޑަކުޑަ ރަށެއްގައި، ވަޒީފާގައި މުޅިން ވެސް މިއުޅެނީ ގޭދޮށު އަވައްޓެރިން ނޫނީ ރައްޓެހިން. އެގޮތަށް ބޭބެއާ ބެހޭތީ އަޅުގަނޑުމެން އެ މީހުންނާ ބައްދަލުކޮށް ސުވާލުކުރަން. އެކަމަކު ކޮންމެ ފަހަރަކު ވެސް ބުނަނީ އެއީ މަޖަލޭ، މާބޮޑު ކަމެއް ނޫނޭ،" އާއިލާއިން ވާހަކަ ދެއްކި މީހާ ބުންޏެވެ.

"އެކަމަކު އޭނާއަކަށް އެ ކަހަލަ ކަންކަމެއް މަޖަލެއް ނޫން. ހުއްޓުމެއް ނެތި އެގޮތަށް ދިމާކޮށް، ފުރައްސާރަކުރާތީ އޭނާއަށް އެބަ އޭގެ އަސަރު ކުރޭ."

އުމުރުން 40 އަހަރު ފުރިފައިވާ ބޭބެއަށް ކުރިމަތިވަމުން ދިޔަ މި ތުރާތައް، އެ އާއިލާއިން ވަނީ ފުލުހުންނާއި ޖެންޑާ މިނިސްޓްރީއަށް ވެސް ހުށަހަޅާފަ އެވެ. އެކަމަކު މިހާތަނަށް ކުރިއެރުމެއް ނާންނާތީ، އާއިލާއިން ކަންބޮޑުވެ އެވެ. އެ ވާހަކަތައް ސޯޝަލް މީޑިއާގައި އާއްމު ކުރީ ވެސް، ދިޔާނާ ބުނިގޮތުގައި، ވަޒީފާގެ މާހައުލުގައި ބުލީ ކުރުމާއި ނުކުޅެދުންތެރިކަން ހުންނަ މީހުންނަށް ފުރައްސާރަ ކުރުމާ ގުޅޭގޮތުން މުޖުތަމައު ހޭލުންތެރިކޮށް، އެކަން ނިމުމެއް ގެނައުމުގެ މަގްސަދުގަ އެވެ.