ކެބިނެޓް ބައްދަލުވުމެއްގެ ތެރެއިން. (ފޮޓޯ/ ރައީސް އޮފީސް )
2 ހަފްތާ ތެރޭ 228 ސިޔާސީ މުވައްޒަފުން ވަކިކުރަން ރައީސް ނިންމަވައިފި
މާލީ އިސްލާހީ ފިޔަވަޅުތަކުގެ ދަށުން ދައުލަތުގެ ހަރަދު ކުޑަކުރުމަށް، ސިޔާސީ މަގާމުތަކުގައި ތިއްބެވި ބޭފުޅުންގެ ތެރެއިން 228 މުވައްޒަފުން ދެ ހަފްތާ ތެރޭ ވަކިކުރަން ނިންމަވާފައިވާކަން ރައީސް މުހައްމަދު މުއިއްޒު މިއަދު އިއުލާނު ކުރައްވައިފި އެވެ.
ވީ ކިހިނެއް؟ - އެކަން އިއުލާނު ކުރައްވާފައިވަނީ ރައީސް ދާދި ދެންމެއަކު 'އެކްސް'ގައި ކުރެއްވި ޕޯސްޓެއްގަ އެވެ.
މި ނިންމުމާ އެކު ދައުލަތުގެ ބަޖެޓުން މަހަކު 5.7 މިލިއަން ރުފިޔާ ސަލާމަތްވާނެ ކަމަށް އެމަނިކުފާނު ވިދާޅުވި އެވެ.
ތަފްސީލް - މި ނިންމުމުގެ ދަށުން ސަރުކާރުގެ އެކި ވުޒާރާތަކުން މުވައްޒަފުން ވަކިކުރާނެ ކަމަށް ރައީސް ވިދާޅުވި އެވެ. އެ މަނިކުފާނު އިއުލާނު ކުރެއްވި ގޮތުގައި، ސިޔާސީ މަގާމުތަކުން ވަކިކުރަން ނިންމާފައިވާ ބޭފުޅުންގެ ތެރޭގައި ހިމެނެނީ:
-
7 ސްޓޭޓް މިނިސްޓަރުން
-
43 ޑެޕިއުޓީ މިނިސްޓަރުން
-
109 ސީނިއާ ޕޮލިޓިކަލް ޑިރެކްޓަރުން
-
69 ޕޮލިޓިކަލް ޑިރެކްޓަރުން
ފާހަގަކޮށްލެވޭ - ރައީސް މި ނިންމުން އިއުލާނުކުރައްވާފައި މިވަނީ، ގައުމުގެ މާލީ ހާލަތު ގޯސްވެ ސަރުކާރުން ހަރަދު ކުޑަކުރުމުގެ ސިޔާސަތުތައް ތަންފީޒު ކުރަމުންދާ އިރު، ސިޔާސީ މުވައްޒަފުންގެ އަދަދު މަދު ނުކުރާތީ ސަރުކާރަށް ބޮޑެތި ފާޑުކިޔުންތަކެއް އަމާޒުވަމުންދާ ދަނޑިވަޅެއްގަ އެވެ.
ވުޒާރާތަަކަށް ނަގަމުންދާ ސިޔާސީ މުވައްޒަފުންގެ އަދަދު ހާމަކުރުމެއް ނެތި މި ސަރުކާރުން ގިނަ އަދަދެއްގެ ސިޔާސީ މަގާމުތަކަށް މީހުން އައްޔަންކޮށް، އެކަމަށް ބޮޑު ހަރަދެއް ކުރަމުންދާކަމުގެ ޝަކުވާ އޮތީ އިދިކޮޅު ޕާޓީތަކާއި އާންމުންގެ މެދުގައި ވެސް ބޮޑުވެފަ އެވެ.
އެފަދަ ޝަކުވާތަކާ ގުޅިގެން ޖޫން މަހުގެ ތެރޭގައި ވެސް ރައީސް ވަނީ ސިޔާސީ މުވައްޒަފުން މަދުކުރާނެ ކަމަށް ވިދާޅުވެފަ އެވެ. ނަމަވެސް، މިއީ އަމަލީ ސިފައެއްގައި އެ ފިޔަވަޅު އަޅާ ތަން ފެނުނު ފުރަތަމަ ފަހަރެވެ.
ކޮމެންޓް (3)
އަލިބެ..
ބާގިރު
ތެފައާސާ.