އާޒިމްގެ ވާހަކަ އޮޅުވާލީ؛ ވިދާޅުވީ ކައުންސިލަރުން އެއްބާރުލުން ދެއްވާ ކަމަށް

އެމްޑީޕީން އިއްޔެ ހދ. ކުޅުދުއްފުށީގައި ބޭއްވި އެ ޕާޓީގެ ސިޓީތަކާއި ރަށު ކައުންސިލްތައް އަދި އަތޮޅު ކައުންސިލްތަކުގެ މެންބަރުންގެ މަހާސިންތާ، 'ލާމަރުކަޒީ ގުޅުން' ޖަލްސާގައި މާލޭގެ މޭޔަރު އާދަމް އާޒިމް ވާހަކަ ދައްކަވަމުން މާލޭ ސިޓީ ކައުންސިލަށް ސަރުކާރުން އެއްބާރުލުން ދޭ ކަމާއި "ކައުންސިލް ތެރޭން ކުރަން ބޭނުންވާ ހުރިހާ ކަމެއް [ސަރުކާރުން] ކޮށްދޭ ކަމަށް" އާޒިމް ވިދާޅުވި ކަމަށް ބުނެ ސަރުކާރުގެ ސޯޝަލް މީޑިއާ ހަރަކާާތްތެރިން އާޒިމްގެ ވާހަކައިން ތަންކޮޅެއް ނަގައި ވީޑިއޯ ކޮޅެއް ދައުރުކުރަން ފެށި އެވެ. ބައެއް މީޑިއާތަކުން ވެސް ރިޕޯޓްކުރީ ސަރުކާރުން ކައުންސިލަށް އެއްބާރުލުން ދޭ ކަމަށް އާޒިމް ވިދާޅުވި ކަމަށެވެ. 

ނަމަވެސް އާޒިމްގެ މުޅި ވާހަކައިގެ ރެކޯޑިން ރާއްޖެ ޓީވީގެ ފީޑް ރިވައިންޑްކޮށް ބެލުމުން ޔަގީންވީ އާޒިމްގެ މުޅި ވާހަކައިގައި ވިދާޅުވީ ސަރުކާރުން އެއްބާރުލުން ދޭ ވާހަކައެއް ނޫނެވެ. އާޒިމްގެ ވާހަކައިގެ ތަންކޮޅެއް ނަގައި ދައުރުކުރަމުން ދިޔައީ އާޒިމް ދެއްކި ވާހަކަ މުޅިން އޮޅުވާލައިގެންނެވެ. ނޫނީ އާޒިމް ދެއްކެވި ވާހަކައިން ތަރުޖަމާއެއް ނެރުނީ އެވެ. 

އާޒިމްގެ މުޅި ވާހަކަ ނިސްބަތްކުރެއްވީ މާލޭ ސިޓީ ކައުންސިލްގައި އެމްޑީޕީގެ އެއްވެސް ކައުންސިލަރެއް ނެތް ނަމަވެސް އޭނާގެ މަސައްކަތަށް ސަރުކާރު ހިންގާ ޕީޕީއެމް-ޕީއެންސީގެ ކައުންސިލަރުންނާއި ދަ ޑިމޮކްރެޓްސް ޕާޓީއަށް ނިސްބަތްވާ ކައުންސިލަރުން އެއްބާރުލުން ދެއްވާތީ އެ ކަމަށެވެ. ސީދާ މައި ސަރުކާރުން ކައުންސިލަރުންނަށް އެއްބާރުލުން ދޭ ވާހަކައެއް އޭނާ ވިދާޅުވެފައެއް ނުވެ އެވެ. 

އޭނާ ކިޔައިދެއްވީ އެމްޑީޕީ އެންމެ މެންބަރެއްގެ ގޮތުގައި އޭނާ ހުންނަވައިގެން ސިޓީ ކައުންސިލްގައި އަރައިރުން ނުވެ މަސައްކަތް ކުރައްވާ ގޮތެވެ. އެމްޑީޕީގެ ފަރާތުން އޭނާ ވެފައިވާ މޭޔަރުކަމުގެ ވައުދުތައް ފުއްދަވަން އިދިކޮޅު ސިޔާސީ ފިކުރުގެ ކައުންސިލް މެންބަރުންނާ އެކު އޭނާ މަސައްކަތް ކުރައްވާ ގޮތް ދެން ތިބި ބައިވެރިންނަށް ކިޔައިދެއްވީ އެވެ. އޭނާގެ ތަޖުރިބާ ހިއްސާކުރެއްވީ އެވެ.

"އަޅުގަނޑު ވެއްޖިއްޔާ 15 ޕީއެންސީ މެންބަރުންނާއި ދެ ޑިމޮކްރެޓްސްއިންނާއި އެއް އިދިކޮޅު މެންބަރުގެ ގޮތުގައި އަޅުގަނޑު މަސައްކަތް މި ކުރަނީ. އަޅުގަނޑު އެކަނި. ވަރަށް ބޮޑު ކައުންސިލެއްގައި އަޅުގަނޑު އެކަނި މަސައްކަތްކުރާއިރު އަޅުގަނޑު ކައިރި އެބަ އަހާ ކިހިނެއްހޭ ތިކަން ތިކުރަނީ،" އާޒިމް ވިދާޅުވި އެވެ.

"ދެން އަޅުގަނޑު ކުރިއަށް ގެންދަނީ އެންމެންނާ ގުޅިގެން. ވީވަރަކުން ކޮންފްލިކްޓް މަދުވާނޭ ގޮތަށް ވަރަށް ގިނަ ވަގުތު ދީގެން އުޅެނީ. ހެނދުނު 8 ޖަހާއިރު ދާ ގޮތަށް ރޭގަނޑު 11-12 ޖަހާއިރު ވެސް އެންމެންނާ އެކު އުޅެނީ. ވަގުތު ދީގެން ރަށްޓެހިކަން މަތީ މިކަން ކުރަނީ،." 

"މިކަން ކުރަން ޖެހޭ ގޮތަކީ މިކަން ކުރަން ބޭނުންވަންޏާ އެ ވަގުތަކާއި ހާލަތަކާ އެއްގޮތަށް ކުރިއަށް ދާން މިޖެހެނީ. އަޅުގަނޑަކަށް ދަތިވާ ކަމެއް މިވަގުތަކު ހަމަ ކައުންސިލް ތެރޭގައި ނެތް. އަޅުގަނޑު ބުނާ ކަމެއް ވެއްޖިއްޔާ [މެންބަރުން] ކޮށްދޭ. އަޅުގަނޑު ކޮންސަލްޓެންޓުން ނަގަން ބޭނުން ވީމާ ނަގައިގެން، އަޅުގަނޑުމެން ޕާޓީގެ މީހުން އެ ތިބީ ވެސް އެކަކު ނޫނީ."

އާޒިމްގެ ވާހަކަ އިތުރަށް ކުރިއަށް ގެންދަވަމުން ވިދާޅުވީ، "ކޮންމެވެސް ވަރެއްގެ އުނދަގޫ ކަންތައްތަކެއް މެންބަރުންގެ ފަރާތުން މިހާރު އެބަ އަންނަހެން މި ފަހުން ހީވާން" ފަށާފައިވާ ކަމަށެވެ. އެކަން އެގޮތަށް ވަނީ ކަންކަން ކުރަން އުޅެން ފެށީމާ ކަމަށް ވެސް އާޒިމް ވިދާޅުވި އެވެ.

ނަމަވެސް ސަހަރާ މިސްކިތް ނިންމުމާއި މާލޭގައި ފެން ބޮޑުވާ މައްސަލައަށް ހައްލު ގެނައުމަށް ކުރަން ޖެހޭ މަސައްކަތްތައް ވެސް މަޑުމަޑުން ގޮސް ނިންމާލީ ކަމަށް އާޒިމް ވިދާޅުވި އެވެ. މާލޭގައި މަގުމަތިވެފައިވާ ބުޅާތައް ވެސް ކެޓް ޝެލްޓާއަށް ގެންދިޔުމުގެ މަސައްކަތް ނޮވެމްބަރަށް ނިންމާލެވޭނެކަން އާޒިމް ފާހަގަކުރެއްވި އެވެ. 

"މާލޭގެ ފެނުގެ މައްސަލަ ވެސް އަޅުގަނޑު ގޮސް ހަމަ އެންމެން ކައިރީ ކޮށައިގެން މަޑުމަޑުން އިނދެގެން ފަހަރަކު މިނިސްޓްރީއަކަށް ވަދެގެން އުޅެމުން ގޮސް އިއްޔެގައި ވަރަށް ބޮޑު ބައި އެ ނިމުނީ. އެގޮތަށް ވަގުތު ދީގެން އެންމެންނާ ގުޅިގެން ކަންކަން މި ވަނީ،" އާޒިމް ވިދާޅުވި އެވެ. 

އޭނާ ވަނީ ކައުންސިލްގެ ޖަލްސާތައް ބާއްވާއިރު ވެސް އަމަލުކުރައްވާ ގޮތް ވިދާޅުވެފަ އެވެ. އޭނާ ވިދާޅުވީ ކައުންސިލް ޖަލްސާގައި މަޝްވަރާކޮށް ގޮތް ނިންމަން ގެންނަނީ ސީދާ ރައްޔިތުންނާ ގުޅޭ ކަންކަން ކަމަށެވެ. އެކަން އެގޮތަށް ކުރައްވާ ސަބަބެއްގެ ގޮތުގައި ވިދާޅުވީ ކައުންސިލް ޖަލްސާތައް ވަގުތުން ދައްކާތީ އެކަމާ ދެކޮޅުހަދަން މެންބަރުންނަށް އުނދަގޫ ކަމަކަށް ވާނެތީ އެވެ. 

"ރައްޔިތުންނާ ގުޅުން ހުރި ކަމެއް ލައިވް ކުރަންޏާ، ޖަލްސާތައް އެބަ ލައިވްކުރޭ އެހެންވީމާ ވަރަށް އުނދަގޫވާނެ އެއަކަށް އަސްލު ނޫނެކޭ ބުނަން ވެސް. އެ މީހުން ވެސް ދެން ބޭނުންވޭ ކަންކަން ކުރަން ވެސް. އެގޮތަށް ވެސް އެބަވޭ. ކޮންމެވެސް ގޮތަކަށް އެބަ ހިނގާ މިކަން،" އާޒިމް ވިދާޅުވި އެވެ. 

އެ ވާހަކަތަކަށް ފަހު އާޒިމް އެންމެ ފަހު ވާހަކައަކަށް ވިދާޅުވީ އޭނާގެ ވައުދުތައް ފުއްދަން އެކި ފިކުރުގެ ކައުންސިލަރުންނާ އެކު ވެސް މަސައްކަތް ކުރައްވާ އަސްލު ސަބަބެވެ. 

"އެމްޑީޕީގެ މޭޔަރެއް ވީމާ. މާލެއަށް އަޅުގަނޑު ކަންތައްތަކެއް އެންމެންނާ ގުޅިގެން، ސަރުކާރާ އެހެން މީހުންނާ ވެސް ގުޅިގެން، އަޅުގަނޑުމެންނަށް ކަމެއް ނުކުރެވިއްޖިއްޔާ އެމްޑީޕީއަށް ނުވިކަމަކަށޭ ވާނީ. މިހާރު ކަމެއް ކުރާއިރަށް އެ މީހުން ކުރި ކަމެއްގެ ގޮތުގައި އެބަ ލިޔޭތާ. އެހެން ވެސް ނުވެއްޖިއްޔާ. މިސާލަކަށް މިސްކިތް ނުނިންމުނީ، ފެނުގެ ނިޒާމު ހައްލު ނުކުރެވުނީ، ބުޅާތައް ވެސް ނުގެންދެވުނީ. އެހެންވެއްޖިއްޔާމުން އެމްޑީޕީ ފެއިލްވި ކަމަށް ނިންމާނީ. އަޅުގަނޑު މި ބަލަނީ އެންމެންނާ ވެސް ގުޅިގެން އެންމެންގެ ބަސް އަހައިގެން ކުރިއަށް ދެވޭތޯ. އެއީ މިކުރާ ކަމަކީ،" އާޒިމް ވިދާޅުވި އެވެ.