ކަނޑު ގަދަ ދުވަހެއްގައި ލޯންޗެއް ދުއްވާފައި ދަނީ (ދައުރު ފޮޓޯ)
ހުޅަނގުގެ ބާރު ގަދަކޮށްލައި ކުރިއަށް އޮތް 5 ދުވަހު ވެސް ކަނޑު ވަރަށް ގަދަވާނެ ކަމަށް އަންގައިފި
ހުޅަނގު މޫސުމުގެ ބާރު ގަދަކޮށްލައި ކުރިއަށް އޮތް ފަސް ދުވަހު ވެސް ކަނޑުތައް ވަރަށް ގަދަވާނެތީ ސަމާލުވުމަށް މޫސުމާ ބެހޭ ގައުމީ އިދާރާ (މެޓް) އިން މިއަދު ބުނެފި އެވެ.
ވީ ކިހިނެއް؟ - ގިނަ ދުވަސްތަކެއް ވާންދެން މޫސުން ރީތިކޮށް އޮތުމަށް ފަހު، ބައެއް ހިސާބުތަކަށް ވިއްސާރަކުރަން ފެށީ މީގެ ދެ ހަފުތާވަރު ކުރިންނެވެ. އެކަމަކު އެ ދުވަސްތަކުގައި ވެސް ރާއްޖޭގެ ބޮޑު ބަޔަކަށް މޫސުން ރަނގަޅެވެ.
ތަފްސީލް - މެޓުން މިއަދު ބުނީ ހުޅަނގު މޫސުމުގެ ބާރު މިހާރު ގަދަކޮށްލާފައިވާ ކަމަށެވެ. އެ ތަނުން ބުނި ގޮތުގައި:
-
ކުރިއަށް އޮތް ފަސް ދުވަހު ވެސް އުތުރާއި މެދުރާއްޖެ ތެރޭގެ ސަރަހައްދުތަކަށް 15 މޭލާއި 25 މޭލަށް ވައި ޖެހޭއިރު، ދެކުނަށް 13 މޭލާއި 23 މޭލަށް ވައިޖެހޭނެ
-
ވިލާގަނޑުގައި 45 މޭލާއި 55 މޭލަށް ވައި ޖެހޭނެ ކަމަށް ލަފާކުރެވޭ
"އެހެންވެ، ރާއްޖޭގެ ހުރިހާ އަތޮޅުތަކެއްގައި ވެސް ކަނޑު ވަރަށް ގަދަވާނެ ކަމަށް ލަފާ ކުރެވެ އެވެ،" މެޓުން މިއަދު ނެރުނު އެންގުމެއްގައި ބުންޏެވެ.
އެއާ އެކު، ބޯކޮށް ވާރޭވެހި، ގުގުރައި އަދި ދިޔަވަރު ބޮޑުވާ ވަގުތުގައި އުދަ އެރުން އެކަށީގެންވާ ކަމަށް ވެސް އެ ތަނުން ބުންޏެވެ.
މެޓުން ވަނީ ކަނޑުދަތުރު ކުރާ ފަރާތްތަކުން މޫސުމަށް ބެލުމަށް ފަހުގައި ނޫނީ ދަތުރު ނުކުރުމަށް އިލްތިމާސްކޮށްފަ އެވެ.