ބައިނަލްއަގުވާމީ މަސައްކަތްތެރިންގެ ދުވަސް ނުވަތަ މޭ ޑޭ ފާހަގަކުރުމަށް މޯލްޑިވްސް ޓްރޭޑް ޔޫނިއަނުން އިސް ނަގައިގެން 1 މޭ 2022 ވަނަ ދުވަހުގެ ހަވީރު މާލޭގައި ބޭއްވި ހިނގާލުމެއްގެ ތެރެއިން. (ދައުރު ފޮޓޯ/އަބްްދުﷲ ޔަޝާއު)
ޔޫނިނަން ރަޖިސްޓްރީ ކުރުމަށް ނަގާ ބޮޑު ފީތައް ކުޑަކޮށްފި
ޔޫނިއަނެއް ރަޖިސްޓްރީ ކުރުމަށް މީގެ ކުރިން ދައްކަން އޮތް ފީ އެތައް ގުނައެެއް ކުޑަކޮށް، ގަވައިދު އިސްލާހުކޮށްފި އެވެ.
ވީ ކިހިނެއް؟ - ނިމިގެން ދިޔަ 19 ވަނަ މަޖިލީހުގައި ފާސް ކުރި އިންޑަސްޓްރިއަލް ރިލޭޝަންސް ގާނޫނުގެ ދަށުން ޔޫނިއަން އުފެއްދުމުގެ ހުއްދަ ދީފައި ވާއިރު، އެކަމަށް ހާއްސަކޮށްގެން މިދިޔަ ޖުލައި މަހު އެންމެ ފުރަތަމަ ހެދި ގަވައިދުގެ ދަށުން ޔޫނިއަން ރަޖިސްޓްރޭޝަން ފީގެ ގޮތުގައި ނަގަން އޮތީ 5،000ރ. އެވެ. އެއީ ބޮޑު ފީއެއް ކަމަށް ބުނެ ބައެއް ފަރާތްތަކުގެ ކަންބޮޑުވުން އޮތެވެ.
އެ ކަންބޮޑުވުންތަކަށް ހައްލު ގެނެސްފައި މި ވަނީ، 'ޔޫނިއަންތައް ރަޖިސްޓްރީކޮށް ހިންގުމާ ގުޅޭ އުސޫލުތައް ކަނޑައެޅުމުގެ ގަވައިދު'އަށް ހަޔާ އެޑިއުކޭޝަން މިނިސްޓްރީން ގެނައި އިސްލާހުގެ ދަށުންނެވެ. އެ އިސްލާހު އިއްޔެ ސަރުކާރުގެ ގެޒެޓްގައި ވަނީ ޝާއިއުކޮށްފަ އެވެ.
ތަފްސީލު - މި އިސްލާހުގެ ދަށުން އެންމެ ބޮޑު ބަދަލަކަށް އޮތީ ޔޫނިއަން ރަޖިސްޓްރީ ކުރުމުގެ ފީތައް ކުޑަ ކުރުމެެވެ. އެގޮތުން:
-
މަސައްކަތްތެރިންގެ ވޯކް ޕްލޭސް ޔޫނިއަންއަކަށް ދެން ނަގާނީ 500ރ. އަދި މަސައްކަތްތެރިންގެ އިންޑަސްޓްރީ ޔޫނިއަންއަކަށް 1،000ރ.
-
ވަޒީފާ ދޭ ފަރާތްތަކުގެ ޔޫނިއަންތަކަށް 1،500ރ.
-
ދެ ޔޫނިއަން ނުވަތަ އެއަށް ވުރެ ގިނަ ޔޫނިއަން އެއްކޮލުމަށް 1،000ރ.
-
މަސައްކަތްތެރިންގެ ފެޑްރޭޝަނަކަށް 2،500ރ.؛ މީގެ ކުރިން ދައްކަން އޮތީ 10،000ރ.
-
ވަޒީފާ ދޭ ފަރާތުގެ ފެޑްރޭޝަނަކަށް 2،500ރ.
-
ނޭޝަނަލް ޔޫނިއަން ސެންޓަރަކަށް 5،000ރ.
-
ނޭޝަނަލް އެޕްލޯޔާސް ޔޫނިއަންއަކަށް 5،000ރ.
ފެޑްރޭޝަންތަކުގެ ރަޖިސްޓްރީ ފީއަކަށް މީގެ ކުރިން އޮތީ 10،000ރ. އެވެ. އޭގެ އިތުރުން، ނޭޝަނަލް ޔޫނިއަން ސެންޓަރު އަދި ނޭޝަނަލް އެޕްލޯޔާސް ޔޫނިއަން ރަޖިސްޓްރޭޝަން ފީއަކަށް ކުރިން އޮތީ 15،000ރ. އެވެ.