ޕީޖީން ބުނީ ކޯޓުން ދިން މުއްދަތުގައި ޖިހާދުގެ މައްސަލަ ހުށަހަޅަން ވަކި ގޮތެއް ނިންމާނެ ކަމަށް

ކ. ފުށިދިއްގަރު ފަޅު މައްސަލައިގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ކޮށްފައިވާ ދައުވާ ކްރިމިނަލް ކޯޓުން ބޭރުކޮށްލި ނިންމުމުގެ އިސްތިއުނާފު އަލުން ހުށަހެޅުމާ މެދު، ކޯޓުން ދިން މުއްދަތުގައި ވަކި ގޮތެއް ނިންމާނެ ކަމަށް ޕްރޮސެކިއުޓާ ޖެނެރަލް (ޕީޖީ) އިން މިއަދު ބުނެފި އެވެ.

ވީ ކިހިނެއް؟ - މި ސަރުކާރުގެ އިސް މަގާމެއްގައި ހުންނެވި ޖިހާދަށް ދައުލަތުން އުފުލާފައިވާ މައްސަލަ އަނބުރާ ޕީޖީ އޮފީހަށް ފޮނުވާލީ އޭނާއަށް ޗިޓު ރައްދު ނުކުރެވިގެންނެވެ. ހައި ކޯޓުގެ ނިންމުމުން އެނގުނު ގޮތުގައި:

ކީކޭ ބުނީ؟ - އެ ކަމާ ގުޅޭ ގޮތުން ސުވާލުކުރުމުން ޕީޖީ އޮފީހުގެ މީޑިއާ އޮފިޝަލް އަހުމަދު ޝަފީއު 'ދައުރު'އަށް މިއަދު ވިދާޅުވީ އެޑްރެސް ސާފުކުރުމުގެ މަސައްކަތް ކުރަމުންދާ ކަމަށެވެ. އަދި ކޯޓުން ދިން މުއްދަތުގައި މައްސަލަ އަލުން ހުށަހެޅުމާ މެދު ގޮތެއް ނިންމާނެ ކަމަށް އޭނާ ވިދާޅުވި އެވެ.

އެނގުން މުހިންމު - ޖިހާދު މި ވަގުތު ހުންނެވީ އޮފްޝޯ ފައިނޭންސިންގެ ހިދުމަތް ދިނުމަށް މި ސަރުކާރުން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން ކަމުގަ އެވެ.

އެނގިފައިވާ ގޮތުގައި، ޖިހާދު ދިރިއުޅޭ އެޑްރެހަށް ޗިޓު ފޮނުވި އިރު އޭނާ ހުންނެވީ ރާއްޖޭން ބޭރުގަ އެވެ.

މައްސަލައިގެ ހުލާސާ - ޖިހާދުގެ މައްޗަށް ދައުވާކޮށްފައިވަނީ ކުރީގެ ރައީސް މުހައްމަދު ވަހީދުގެ ވެރިކަމުގައި އޭރުގެ ފިނޭންސް މިނިސްޓަރުގެ މަގާމުގައި ހުންނެވި އިރު، ސްޕެޝަލް ޓޫރިސްޓް ޒޯނެއްގެ ގޮތުގައި ފުށިދިއްގަރު ފަޅު ތަރައްގީ ކުރުމަށް ސަރުކާރުގެ %50 ހިއްސާވާ ގޮތަށް ޖޮއިންޓް ވެންޗާ އެއްބަސްވުމެއް ހަދަން ވަޒީރުންގެ މަޖިލީހުން ނިންމާފައި ވަނިކޮށް، ދައުލަތުގެ %25 ހިއްސާ އޮންނަ ގޮތަށް ޖޮއިންޓް ވެންޗާ ކުންފުންޏެއް ހެދުމަށް ޕްރައިމް ކެޕިޓަލް މޯލްޑިވްސް ލިމިޓެޑާ އެކު އެއްބަސްވުމުގައި ސޮއިކުރެއްވި މައްސަލާގަ އެވެ.

ފަސް މަންޒަރު - ޖިހާދުގެ މައްޗަށް ދައުލަތުން އުފުލި ދައުވާ ކްރިމިނަލް ކޯޓުން ބޭރުކޮށްލީ މިދިޔަ 25 ޖުލައިގަ އެވެ. ހައި ކޯޓުގައި ދައުލަތުން އެ ނިންމުން އިސްތިއުނާފް ކުރީ މިދިޔަ މަހުގެ 29 ގަ އެވެ. މި މަހުގެ 11 ގައި، މައްސަލަ ބަލައިވެސް ގަތެވެ. އެ ގޮތުން: