އައްޑޫ ޕޯޓް ބައިނަލްއަގުވާމީ ސީފުޑް ހަބަކަށް ހަދާނަން: ވަޖީހު

އައްޑޫގެ ޕޯޓް ގެއްލުމުގައި ހިންގުން ނިމުމަކަށް ގެނެސް އެތަނުގައި ބައިނަލްއަގުވާމީ ސީފުޑް ހަބެއް ގާއިމް ކުރުމުގެ ވިސްނުން ސަރުކާރުން ގެންގުޅޭ ކަމަށް އެމްޕީއެލްގެ ސީއިއޯ މުހައްމަދު ވަޖީހު އިބްރާހިމް މިއަދު ވިދާޅުވެއްޖެ އެވެ.

ވީ ކިހިނެއް؟ - ވަޖީހު މިގޮތަށް ވިދާޅުވީ، ރާއްޖެ ހުރަސްކޮށް އުތުރުން ދަތުރުކުރާ ބައިނަލްއަގުވާމީ އާގު ބޯޓްފަހަރުތަކަށް ބޭނުންވާ ހިދުމަތްތައް ފޯރުކޮށްދޭ އޮފްޝޯ ބަންކަރިންގެ ހިދުމަތް ފެއްޓުމަށް މިއަދު ހއ. ހޯރަފުށީގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުންނެވެ.

ތަފްސީލު - އެ ރަސްމިއްޔާތުގައި ވާހަކަ ދައްކަވަމުން ވަޖީހު ވިދާޅުވީ އައްޑޫގެ ތަރައްގީގަށް "ބޮޑު ބަދަލެއް" ގެންނަން ބޭނުންވާ ކަމަށާއި ޕޯޓެއް އޮތުމަކުން އަދި ނުފުދޭ ކަމަށެވެ. އަދި މިހާރު އެ ޕޯޓް ހިންގަމުން އަންނަނީ ވެސް ގެއްލުމުގައި ކަމަށް އޭނާ ވިދާޅުވި އެވެ.

"ޕޯޓަށް ކޯލް ކުރާ ވެސެލްތައް ނުދާ ކަމަށްވާ ނަމަ، ކޮބާތޯ ޕޯޓެއްގެ ބޭނުމަކީ؟ އައްޑޫ އަދި ކުޅުދުއްފުށިގައި ވެސް ޕޯޓެއް އޮންނަތާ ވެއްޖެ 19 އަހަރު. ގެއްލުމުގައި ހިންގަނީ، އެމްޕީއެލްއިން ހަރަދުކޮށްގެން،" އޭނާ ވިދާޅުވި އެވެ.

ވަޖީހު ވިދާޅުވީ މި ސަރުކާރުގެ އަމާޒަކީ ފައިދާވާނެ ތަނަކަށް އައްޑޫގެ ޕޯޓް ހެދުމަށެވެ. އަދި އެކަން ކުރުމަށް ވިސްނުންތަކެއް ގެންގުޅެމުންދާ ކަމަށް އޭނާ ވިދާޅުވި އެވެ.

"ޒަމާނުއްސުރެ ރާއްޖޭގައި މަސްވެރިކަން ވަކި ގޮތަކަށް ކުރަމުންދާތާ އެތައް ޒަމާނެއް ވެއްޖެ. ރާއްޖޭގެ މިއޮތް ހުރިހާ ރިސޯޓުތަކަށް ބޭނުންވާ ހުރިހާ ސީފުޑް އިމްޕޯޓް މި ކުރަނީ،" އޭނާ ވިދާޅުވި އެވެ.

"އަޅުގަނޑުމެންގެ ވިސްނުން މި ބަދަލުކޮށްލަނީ، އައްޑު އަތޮޅުގައި އިންޓަނޭޝަނަލް ސީފުޑް ހަބެއް ގާއިމް ކުރުމަށްޓަކައި."

އެ ވިސްންނުން އެގޮތަށް އައީ ވަޖީހު ވިދާޅުވި ގޮތުގައި ދުނިޔޭގެ މިކަމާ ގުޅުން ހުރި ބޮޑު ޖަމިއްޔާއަކުން ހެދި ދިރާސާއަކުން ދައްކާ ގޮތުން މި އޭޝީއާ ބައްރުގައި ވެސް އިންޓަނޭޝަލް ފިޝް ހަބެއް ގާއިމް ކުރުމަށް އެންމެ މުހިންމު މަންޒިލަކީ އައްޑޫ ކަމަށްވާތީ އެވެ.

އޭގެ އިތުރުން އޭނާ ވިދާޅުވީ، އެންމެ ކަމެއް ކޮށްގެންވެސް ނުފުދޭނެ ކަމަށާއި ދެންވެސް ހުރި ފުރުސަތުތައް ބަލައި ފައިދާ ނެރެވޭނެ ގޮަތަކަށް ޕޯޓް ބައްޓަން ކުރާނެ ކަމަށެވެ.

"މިސާލަކަށް އަވައްޓެރި ސްރީލަންކާގެ ހަމްބަންޓޮޓާ ޕޯޓުގައި ޗައިނާގެ ވެހިކަލްތައް ގެނެސްގެން އެސެމްބަލްކޮށްގެން އޭގެ މަންފާ އެ ނަގަނީ. ކީއްތޯ ވާނީ، އަޅުގަނޑުމެން އައްޑުގައި އެއިން ވިސްނުމަކަށް ދިޔައިއްޔާ؟" އޭނާ ވިދާޅުވި އެވެ

ގުޅުން ހުރި - އެ ރަސްމިއްޔާތުގައި އެމްޕީއެލްގެ އެހެން ބައެއް މަސައްކަތްތަކާ ގުޅޭ ގޮތުން ވާހަކަ ދައްކަވަމުން ވަޖީހު ވިދާޅުވީ:

މިއަދު ފެށި ބަންކަރިން ހިދުމަތުގެ ދެ ވަނަ ފިޔަވަހީގެ ދަށުން ހޯރަފުށި ފަޅުން ބިން ހިއްކައިގެން އެ ހިދުމަތް އިތުރަށް ފުޅާ ކުރާނެ ކަމަށް ވަޖީހު ވިދާޅުވި އެވެ. އޭގެ ތެރޭގައި ހިއްކާ ސަރަހައްދުގައި ތެޔޮ އަދި ކޮންޓެއިނާ ޓާމިނަލްއެއް ގާއިމް ކުރުމުގެ ވިސްނުން އޮތް ކަމަށް އޭނާ ވިދާޅުވި އެވެ.