ރައީސް އޮފީހުގެ ލީގަލް ސެކްރެޓްރީގެ މަގާމަށް އަައްބާސް އައްޔަންކޮށް ލިޔުން ހަވާލުކޮށްދެއްވަނީ: އޭނާ ވަނީ މިއަދު އާ ޕީޖީ ކަމަށް އައްޔަންކޮށް ލިއުން ހަވާލުކޮށްފައި (ފައިލް ފޮޓޯ/ ރައީސް އޮފީސް)
ޕީޖީގެ މަގާމަށް އައްބާސް އައްޔަން ކޮށްފި
ހުސްވެފައިވާ ޕްރޮސެކިއުޓާ ޖެނެރަލް (ޕީީޖީ)ގެ މަގާމަށް ރައީސް އޮފީހުގެ ލީގަލް ސެކްރެޓަރީގެ މަގާމުގައި ހުންނެވި އައްބާސް ޝަރީފް ރައީސް މުހައްމަދު މުއިއްޒު މިއަދު އައްޔަންކުރައްވައިފި އެވެ.
ވީ ކިހިނެއް؟ - ޕީޖީގެ މަގާމަށް ހަ ބޭފުޅަކު ކުރިމަތިލެއްވި އެވެ. ނަމަވެސް އެ މަގާމަށް އައްޔަންކުރަން ރައީސް މުއިއްޒު މަޖިލީހަށް ފޮނުއްވީ އައްބާސްގެ ނަން އެކަންޏެވެ. އައްބާސް އެ މަގާމަށް އައްޔަންކުރަން މަޖިލީހުން ފާސްކޮށްފައިވަނީ ދައުރުން ބޭރު އިއްޔެ ބޭއްވި ހާއްސަ ޖަލްސާގައި އެކަމަށްޓަކައި ނެގި ވޯޓުގައި ބައިވެރިވި 85 މެމްބަރުންގެ އިއްތިފާގުންނެވެ.
ތަފްސީލް - ޕީޖީގެ މަގާމަށް އައްބާސް އައްޔަންކުރައްވާފައިވާކަން އޭނާ ވަނީ 'ދައުރު' އަށް ކަށަވަރުކޮށްދެއްވައިފަ އެވެ. އައްބާސް އެ މަގާމަށް އައްޔަންކުރައްވައި މަގާމުގެ ފަތްކޮޅު ހަވާލުކޮށްދެއްވާފައިވަނީ މިއަދު އެވެ.
އައްބާސްއަކީ 2011 އިން 2015އަށް ހައި ކޯޓުގެ ފަނޑިޔާރުކަން ކުރެއްވި ބޭފުޅެކެވެ. ޕީޖީގެ މަގާމަށް އައްބާސް އައްޔަންކުރަން ފެންނަ ކަމަށް މަޖިލީހުން އިއްޔެ ނިންމިއިރު އެކަމާ ގުޅޭ ބަހުސްގައި ވާހަކަދެއްކެވި ހުރިހާ ޕާޓީއެއްގެ މަޖިލިސް މެމްބަރުން ވެސް ވިދާޅުވީ އައްބާސް އަށް އިތުބާރު އޮތް ކަމަށެވެ. އަދި އެ މަގާމުގެ ޒިންމާ ހަމަހަމަކަމާއި އިންސާފުވެރިކަމާ އެކު އަދާކުރައްވަން އެދިވަޑައިގަތެވެ.
ނަމަވެސް 2009 ވަނަ އަހަރުން ފެށިގެން މިއަދާ ހަމަޔަށް ޕީޖީގެ މަގާމުގައި ހުންނެވި އެއްވެސް ބޭފުޅަކަށް އެ ބޭފުޅެއްގެ ދައުރު ފުރިހަމަ ކުރެވިފައި ނުވުމުގެ ކަންބޮޑުވުން ވެސް ބައެއް މެމްބަރުން ފާޅުކުރެއްވި އެވެ. އެގޮތުން ހަނިމާދޫ ދާއިރާގެ އެމްޑީޕީ މެމްބަރު އަބްދުލްގަފޫރު މޫސާ އިއްޔެެގެ ބަހުސްގައި ވިދާޅުވީ ޕީޖީގެ މަގާމުގައި ހުންނަވާ ބޭފުޅަކަށް ދައުރު ފުރިހަމަ ކުރުމުގެ ފުރުސަތު ދެވޭނީ އެ މަގާމުގައި ހުންނަވާ ބޭފުޅަކަށް އެއިރެއްގައި އޮންނަ ސަރުކާރަކުން އިތުބާރުކޮށްގެން ކަމަށެވެ. އެކަމަށްޓަކައި އެއްވެސް ޕީޖީއަކު އެއިރެއްގައި އޮންނަ ސަރުކާރަކަށް ދަތިވާކަމެއް ނުވަތަ ހިންގުމަށް އުނދަގުވާނެ ކަމެއް ވެސް ނުކުރައްވާނެކަން ސަރުކާރުތަކުން ގަބޫލުކުރަންޖެހޭ ކަމަށް އޭނާ ވިދާޅުވި އެވެ.
އެނގުން މުހިންމު - ޕީޖީގެ މަގާމު ހުސްވީ، ކުރިން އެ މަގާމުގައި ހުންނެވި ހުސައިން ޝަމީމު މިދިޔަ މަހުގެ 22ގައި އިސްތިއުފާ ދެއްވަމުންނެވެ. އޭނާ އިސްތިއުފާ ދެއްވީ އިތުބާރު ނެތް ކަމަށް ބުނެ މަޖިލީހުން އޭނާ ވަކިކުރަން ނިންމާފައި ވަނިކޮށެވެ.