މަނީ އެކްސްޗޭންޖެއްގައި މީހަކު ބޭރު ފައިސާ މާރު ކުރަނީ. (ދައުރު ފޮޓޯ/މުހައްމަދު އަމާން)
ޑޮލަރު ވިއްކާ ކަމަށް ބުނެ އޮޅުވާލައިގެން ފައިސާ ހޯދުން އިތުރުވަނީ
ޑޮލަރު ވިއްކާ ކަމަށް ބުނެ ސޯޝަލް މީޑިއާގެ އެކި ވަސީލަތްތައް މެދުވެރިކޮށް މަކަރާއި ހީލަތުން ފައިސާ ހޯދުން އިތުރުވަމުންދާ ކަމަށް ފުލުހުން މިއަދު ބުނެފި އެވެ.
ވީ ކިހިނެއް؟ - ސޯޝަލް މީޑިއާގެ އެކި ވަސީލަތްތަކުގައި ޑޮލަރު ވިއްކާ ކަމަށް ބުނެ އިޝްތިހާރު ކޮށްފައި ހުންނަ މީހުންގެ އަތުން ޑޮލަރު ގަތުމަށް ފައިސާ ޓްރާންސްފާ ކުރުމުން ޑޮލަރު ނުލިބޭ މައްސަލަތައް ދޭތެރެ ދޭތެރެއިން ފެންމަތިވެ އެވެ.
ތަފްސީލް - ފުލުހުން މިއަދު ވަނީ އެފަދަ މައްސަލަތައް އަނެއްކާވެސް އިތުރުވަމުންދާތީ އެކަމަށް ސަމާލުވުމަށް އިލްތިމާސް ކޮށްފަ އެވެ.
ބޭރު ފައިސާ ގަނެ ވިއްކުމުގެ މުއާމަލާތްތައް ކުރާއިރު، އިތުބާރު ހުރި އަދި ގާނޫނީ ގޮތުން ހުއްދަ ލިބިފައިވާ ފަރާތްތަކާއެކު ނޫނީ މުއާމަލާތް ނުކުރުމަށް ފުލުހުން އިލްތިމާސް ކުރެ އެވެ.
އެ އިދާރާ އިން ބުނީ ސްކޭމުތަކުގެ ޝިކާރައަކަށް ވުމުން ސަލާމަތްވުމަށް އެފަދަ ކަންތަކަށް ސަމާލުވާން ޖެހޭ ކަމަށެވެ.
ފާހަގަ ކުރެވޭ - ކަޅު ބާޒާރުގައި ޑޮލަރު ވިއްކާ ބިދޭސިންނަށް އިމިގްރޭޝަނާއި ފުލުހުން ދަނީ ފިޔަވަޅު އަޅަމުންނެވެ.
މީގެ އިތުރުން ސަރުކާރުން ވަނީ، ރާއްޖެ އަށް ދިމާވެފައިވާ ބޭރު ފައިސާ ނުލިބުމުގެ މައްސަލަ ހައްލު ކުރުމަށް ބޭންކިން ނިޒާމުގެ ތެރެއިން ނޫނީ ޑޮލަރު މާރު ނުކުރެވޭ ގޮތަށް ގާނޫނުތައް އިސްލާހު ކުރަން ވެސް ނިންމައިފަ އެވެ.