3 މަސް ތެރޭ 2 ވަނަ ފަހަރަށް ޕިޗުން ރޭޓިން ދަށްކުރުމުން ކަންބޮޑުވޭ: އެމްޑީޕީ

ރޭޓިން އެޖެންސީ ފިޗުން ރާއްޖޭގެ ރޭޓިންް ތިން މަސް ތެރޭ ދެ ވަނަ ފަހަރަށް ދައްކުރުމުން ފެންނަނީ މާލީ ހާލަތު އިންތިހާއަށް ގޯސްވަމުންދާތަން ކަމަށް އިދިކޮޅު އެމްޑީޕީ އިން ބުނެފި އެވެ.

ވީ ކިހިނެއް؟ - ފިޗުން ވަނީ ރާއްޖޭގެ ރޭޓިން ސީސީސީ ޕްލަސް އަކުން ސީސީ އަކަށް މިއަދު ދަށްކޮށްފަ އެވެ. ރޭޓިން އަށް ބަދަލު ގެނައުމާ ގުޅިގެން އިދިކޮޅު އެމްޑީޕީ އިން މިއަދު ނެރުނު ބަޔާނުގައި ވަނީ އެކަމާ ކަންބޮޑުވުން ފާޅުކޮށްފަ އެވެ.

ތަފްސީލް - އެމްޑީޕީ އިން ބުނީ، ރިޔާސީ އިންތިހާބަށް ފަހު ފިޗުން ރާއްޖޭގެ ކްރެޑިޓް ރޭޓިން ދަށްކޮށްފައި ނުވާ ކަމަށާއި މިއީ އެމްޑީޕީ ސަރުކާރުގެ މާލީ ސިޔާސަތުތަކަށް ބައިނަލްއަގުވާމީ އިދާރާތަކުގެ އިތުބާރު އޮތް ކަން ހާމަވާ ކަމެއް ކަމަށެވެ. އަދި މާލީ އިސްލާހީ ފިޔަވަޅުތައް ތަންފީޒު ކުރާނެ ކަމުގެ ޔަގީންކަން އެ އިދާރާތަކަށް އޮތްކަން އެކަމުން އެނގޭ ކަމަށް އެ ޕާޓީ އިން ބުންޏެވެ.

ފިޗުން ރާއްޖޭގެ ކްރެޑިޓް ރޭޓިން ދަށްކުރުމަށް ނިންމި ނިންމުމުން އިގްތިސޯދީ ގޮތުން ކަންބޮޑުވާންޖެހޭ އެތައް ކަމެއް ފާހަގަކޮށްފައިވާ ކަމަށް އެމްޑީޕީ އިން ބުންޏެވެ. އެގޮތުން، ބޭރު ފައިސާގެ ރިޒާވް ބޮޑުތަނުން ދަށަށް ދިއުމާއި ބޭރުގެ ދަރަނި އަދާކުރުމަށް ބޭނުންވާ ފައިސާގެ މިންވަރު އިތުރުވުން ފިޗުން ފާހަގަކޮށްފައިވާ ކަން އެމްޑީޕީގެ ބަޔާނުގައި ވެސް ފާހަގަކޮށްފައިވެ އެވެ.

"ނަމަވެސް، މި ޕާޓީން ދެކޭގޮތުގައި މި މައްސަލަތަކާ ގުޅުންހުރި ކަންކަން ދެނެގަތުމަކީ މި ހާލަތުގެ ނުރައްކާތެރިކަން ވަޒަންކުރުމަށް ވަރަށް މުހިންމު ކަމެކެވެ." އެމްޑީޕީގެ ބަޔާނުގައި ބުންޏެވެ.

އެމްޑީޕީ އިން ބުނީ ސަރުކާރުގެ އަމަލުތަކުގެ ސަބަބުން ފަތުރުވެރިކަމަށާއި އިގުތިސާދަށް ގެއްލުން ވެފައިވާ ކަމަށެވެ. ހާއްސަކޮށް އިންޑިއާ އާއެކު އޮތް ގުޅުން ހީނަރުވުމުން ފަތުރުވެރިކަމަށް އަސަރުކޮށް އިންޑިއާ އިން އަންނަ ފަތުރުވެރިން މަދުވެ، އިގްތިސޯދީ ކުރިއެރުން ދަށް ކުރަން ޖެހިފައިވާ ކަމަށެވެ.

 ބޭކާރު އަދި ރޭވުމެއްނެތި ސަރުކާރުން ކުރާ ހަރަދުތަކުގެ ސަބަބުން ރިޒާވް ހީނަރުވެފައިވާ ކަމަށް ވެސް އެމްޑީޕީ އިން ބުންޏެވެ.

އެ ޕާޓީ އިން ބުނީ މިއަހަރު ފަތުރުވެރިކަމުގެ ދާއިރާއަށް ޖުމުލަކޮށް އަންނަ ކުރިއެރުމާ އެކު، ޑޮލަރުން ލިބޭ އާމްދަނީ %15 އިތުރުވެފައި ވީނަމަވެސް، ދައުލަތުގެ ހަރަދު ބޮޑުވުމުގެ ސަބަބުންނާއި ރިޒާވް ސަޕޯޓްކުރުމަށް ބޭނުންވާ ފައިސާ ހޯދުމަށް ސަރުކާރު ނުކުޅެދުމުގެ ސަބަބުން ބޭރު ފައިސާގެ ރިޒާވް މި އަހަރު ވަރަށް ބޮޑަށް ހީނަރުވެފައިވާ ކަމަށެވެ.

ދަތި ދަނޑިވަޅެއްގައި މި ވަގުތު ސަރުކާރުން ކޮންމެހެން ކުރަންނުޖެހޭ ހަރަދުތަކެއް ވެސް ކޮށްފައިވާ ކަމަށް އެ ޕާޓީ އިން ބުންޏެވެ. 

އެމްޑީޕީ އިން ބުނީ އެ ޕާޓީގެ ސަރުކާރުން ފަށައިފައިވާ މާލީ އިސްލާހުގެ ޕްރޮގްރާމް މި ސަރުކާރުން ކުރިއަށް ނުގެންގޮސް މަޑުޖައްސާލާފައިވާ ކަމަށެވެ. އެކަމުގެ ސަބަބުން ހަރަދު ކުޑަކުރުމަށް އަޅަން ޖެހޭ ފިޔަވަޅުތައް އަޅަން ޖެހޭ ދަނޑިވަޅުގައި އަޅާފައިނުވާ ކަމަށް އެ ޕާޓީ އިން ބުންޏެވެ.

އިސްލާހީ ފިޔަވަޅުތައް ނާޅައިފި ނަމަ އޭގެ ސަބަބުން ރޭޓިން ދަށްވާނެކަން ފާއިތުވި ޖޫން މަހު ވެސް ރޭޓިން އެޖެންސީތަކުން ހާމަކޮށްފައިވެ އެވެ.  

އެމްޑީޕީ އިން ވަނީ މާލިއްޔަތަށް އޮތް ނުރައްކާތައް ކުޑަކުރުމަށް އިސްލާހީ ފިޔަވަޅުތައް ވަގުުތުން އެޅުމަށް ގޮވާލައިފަ އެވެ.

"ބަޖެޓަށް ފައިސާ ހޯދުމުގައި ކުރިއެރުން ނުލިބޭ ކަމާއި މާލީ އިސްލާހުތައް ލަސްވަމުންދާކަމާއި އަދި މިހާރު މާލީ ދާއިރާގައި ހާމަކަން ކުޑަވަމުންދާކަމާ މެދު މީގެ ކުރިން ވެސް އެތައް ފަހަރެއްގެ މަތިން ކަންބޮޑުވުން ފާޅުކޮށް، އެކަންކަން އިސްލާހުކުރުމަށް މި ޕާޓީން ސަރުކާރަށް ގޮވާލާފައިވާނެއެވެ." އެމްޑީޕީގެ ބަޔާނުގައި ބުންޏެވެ.

އެ ޕާޓީގެ ބަޔާނުގައި، ކްރެޑިޓް ރޭޓިން މަތިވާނެ ކަންކަމުގެ ގޮތުގައި ފިޗުން ފާހަގަކޮށްފައިވާ ކަންތައް ލަސްނުކޮށް ކުރުމަށް ވެސް ގޮވާލާފައިވެ އެވެ.