ޑިމާންޑު ނެތުމުން ސީޕްލޭން އެއާ އެމްބިއުލާންސް ކޮމާޝަލް ދަތުރުތަކަށް

އެއާ އެމްބިއުލާންސްގެ ގޮތުގައި ބޭނުންކުރަން ފެށި ސީޕްލޭން ކޮމާޝަލް ދަތުރުތަކުގައި ބޭނުން ކުރަން ފަށާފައިވާ ކަމަށާއި އެގޮތަށް ނިންމީ އެއާ އެމްބިއުލާންސްގެ ގޮތުގައި ބޭނުންކުރަން ފެށި ސީޕްލޭނަށް ޑިމާންޑު ނެތުމުން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

ވީ ކިހިނެއް؟ - އެއާ އެމްބިއުލާންސްގެ ގޮތުގައި މޯލްޑިވިއަންގެ ޑޭޝް-8 ގެ މަތިންދާބޯޓަކާއި ސީޕްލޭނެއް ބޭނުން ކުރަން ފެށީ މިދިޔަ މާޗު މަހު އެވެ. ސީޕްލޭނެއް އެއާ އެމްބިއުލާންސްގެ ގޮތުގައި ހާއްސަ ކުރީ އެއާޕޯޓު ނެތް ރަށްރަށުން ބަލި މީހުން އުފުލަން ފަސޭހައަކަށެވެ.

ތަފްސީލް - ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު އަމީން ބުދަ ދުވަހު ވިދާޅުވީ، ސީޕްލޭނެއް އެއާ އެމްބިއުލާންސެއްގެ ގޮތުގައި ބޭނުން ކުރަން ފެށި ނަމަވެސް އެއީ ދުވާލު އެކަނި ދުއްވޭ  އެއްޗަކަށްވުމުން ލިމިޓޭޝަންތަކެއް ހުރި ކަމަށެވެ.

"އަދި އޭގެ ސްޕީޑާ ބައެއް ހާލަތްތަކުގައި ޕްރެޝަރައިޒްކޮށް ދުއްވަން ޖެހޭތިއްޔާ އެކު، ބައިވަރު ލިމިޓޭޝަންތަކެއް ހުރުމުން އެންމެ ރަނގަޅު ގޮތަކ ޑޭޝް-8 އެއްގައި ހުރިހާ އިމަޖެންސީ އިކުއިޕްމެންޓު އަޅުވައިގެން އެއާ އެމްބިއުލާންސެއްގެ ގޮތުގައި އަދި ހާއްސަ މެޑިކަލް ޓީމަކާ އެކު ތައްޔާރު ކޮށްގެން 24 ގަޑިއިރު މަސައްކަތް ކުރުމަށް [ރައީސް] ނިންމެވީ،" މިނިސްޓަރު ވިދާޅުވި އެވެ.

އަމީން ވިދާޅުވީ ތަފާސްހިސާބަށް ބަލާއިރު އެއާ އެމްބިއުލާންސްގެ ހިދުމަތް ދޭން ފެށިތާ 5 މަސް ވީއިރު، ޑޭޝް 8 މަތިންދާބޯޓެއް އެކަމަށް ހާއްސަ ކޮށްފައި އޮތުމުން އެއްވެސް ދައްޗެއް ނެތި އެ ހިދުމަތް ފޯރުކޮށްދެވޭ ކަމަށެވެ. 

"ޑޭޓާ އިން އެބަ ފެނޭ ވޭތުވެ ދިޔަ 5 މަސް ދުވަހު ބައެއް މަސްތަކުގައި އެބަހުރި އެންމެ ރިކުއެސްޓެއް ވެސް ޕަބްލިކުން ނާދޭ ސީޕްލޭނަކަށް. ރިކުއެސްޓެއް ނެތް. އެހެންވީމާ އަޅުގަނޑާ، ހެލްތު މިނިސްޓަރާ ވެގެން ރައީސަށް ދެންނެވީ މި ރިސޯސަސް ޑުބްލިކޭޓް ވާތީ މި 5 މަހުގެ ރިކުއަމެންޓަށް ބަލާފައި އިތުރު ޓުއިން އޮޓާ ބޯޓެއް މިގޮތަށް އެއާ އެމްބިއުލާންސްގެ ގޮތުގައި ބޭއްވުމުގެ ބޭނުމެއް އަދި މިވަގުތު ނެތޭ،" އަމީން ވިދާޅުވި އެވެ.

"މި ހުރިހާ ޑޭޓާއަކާ އެކީ އަޅުގަނޑުމެން ރައީސަށް އެރުވީމާ ރައީސް ނިންމެވީ ޕަބްލިކަށް އެކަހަލަ ރިކުއަމެންޓެއް ނެތިއްޔާ އެ ބޯޓު އަނެއްކާ ވެސް ކުރިން އޮތްގޮތަށް ކޮމާޝަލް އޮޕަރޭޝަނަށް ބޭނުންކުރުމުގައި އެއްވެސް މައްސަލައެއް ނެތް ކަމަށް."

އަމީން ވިދާޅުވީ އެ ބޯޓު ކޮމާޝަލް ހިދުމަތުގައި ބޭނުން ކުރަން ފެށި ނަމަވެސް ބޭނުމެއް ޖެހިއްޖެ ހާލަތެއްގައި އެއާ އެމްބިއުލާންސްގެ ގޮތުގައި ވެސް ބޭނުން ކުރާނެ ކަމަށެވެ. އަދި އެންމެ އިސްކަން ދޭނީ އެ ބޭނުމަށް ކަމަށް ވެސް އޭނާ ވިދާޅުވި އެވެ.