ހުޅުމާލޭގައި ޕާކިން 15 އިމާރާތާއި އިތުރު ޒޯންތައް ހަދަނީ

ހުޅުމާލޭގައި އުޅަނދު ޕާކު ކުރަން ވަކި ސަރަހައްދުތަކެއް ހާއްސަކޮށް ކުލި ދައްކައިގެން އުޅަނދު ޕާކު ކުރެވޭނެ އިންތިޒާމު ހަމަޖައްސަން ނިންމާފައިވާ ކަމަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.

ވީ ކިހިނެއް؟ - މީޑިއާ އާ ވާހަކަ ދައްކަވަމުން ފަޒުލް މިއަދު ވިދާޅުވީ، އެގޮތަށް ހާއްސަ ކުރާނީ މަގުގެ އެތެރޭގައި ހުންނަ ތަންތައް ކަމަށާއި އެފަދަ ސަރަހައްދުތައް ވިޒިޓާސް ޕާކިންގެ ގޮތުގައި ވެސް ކަނޑައަޅާނެ ކަމަށެވެ.

ތަފްސީލް - އެޗްޑީސީގެ އެމްޑީ ވިދާޅުވީ އަގު ދައްކާގޮތަށް އަދި ނުދައްކާ ގޮތަށް ވެސް ޕާކު ކުރާނެ ޖާގަ ހަމަޖައްސަން ނިންމާފައިވާ ކަމަށެވެ.

މީގެ އިތުރުން ހުޅުމާލޭ ތަރައްގީކުރުމުގެ ޕްލޭންގެ ތެރެއިން 15 ވަރަކަށް ޕާކިން އިމާރާތް އަޅަން ނިންމާފައިވާ ކަމަށް ވެސް އޭނާ ވިދާޅުވި އެވެ.

"މިއީ ގާތްގަނޑަކަށް ދަންނަވާ ނަމަ ގާތްގަނޑަކަށް 4،000 ޕާކިންގެ ފުރުސަތު،" ފަޒުލް ވިދާޅުވި އެވެ.

އޭނާ ވިދާޅުވީ މި ޖާގަތަކާއެކު ކާރުފަދަ އުޅަނދުތައް ޕާކުކުރާނެ ދާއިމީ ޖާގަތައް ލިބޭނެ ކަމަށެވެ. ކުރިއަށް އޮތް 3 މަސް ތެރޭ ފަށާ އެ މަޝްރޫއިން ޕާކިން ޖާގަ ދޭނީ ވިޔަފާރި އުސޫލުން ކަމަށް ވެސް އޭނާ ވިދާޅުވި އެވެ.

މާލޭގައި ނުގަވައިދުން ޕާކު ކުރުމާއި މަގުތައްމަތީ އުޅަނދު ތޮއްޖެހުމުގެ މައްސަލަ ހައްލު ކުރަން ސަރުކާރުން ވަނީ މަސަައްކަތްތަކެއް ފަށައިފަ އެވެ.

މާލޭ ސިޓީ ކައުންސިލާ ގުޅިގެން މާލޭގެ ބައެއް މަގުތަކުގެ ކަންމަތިތަކުގައި ޕާކު ކުރުން ހުއްޓުވަން ރަތް ރޮނގު ދަމަން ވަނީ ނިންމައިފަ އެވެ.