ހީވަނީ އިންޑިއާގެ މުހިއްމުކަން ރައީސަށް އިހުސާސް ކުރެއްވިއްޖެހެން: ފައްޔާޒު

'އިންޑިއާ-އައުޓް' ސްލޯގަންގެ ޖޯޝުގައި ވެރިކަމަށް ވަޑައިގެންނެވި ނަމަވެސް، އެ ގައުމުގެ މުހިއްމުކަން ރައީސް މުހައްމަދު މުއިއްޒުއަށް މިހާރު ކޮންމެވެސް ވަރަކަށް އިހްސާސްކުރެއްވޭ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.

ވީ ކިހިނެއް؟- އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިޔަމް ޖައިޝަންކަރު ރަސްމީ ދަތުރެއްގައި މިއަދު ރާއްޖެ ވަޑައިގަންނަވާއިރު، އެކަމާ ގުޅޭގޮތުން އިންޑިއާގެ ނޫހަކަށް ދެއްވި އިންޓަވިއުއެއްގައި ފައްޔާޒު ވަނީ އިންޑިއާ އާއި ރާއްޖެއާ މިހާރު އޮތް ގުޅުމާ ބެހޭ ގޮތުން ވާހަކަ ދައްކަވައިފަ އެވެ.

އޭނާ ވިދާޅުވި ގޮތުގައި ޖައިޝަންކަރު ރާއްޖެއަށް ކުރައްވާ މި ދަތުރުގެ އަސްލު މަގްސަދެއް އެނގިވަޑައެއް ނުގަންނަވަ އެވެ. އެކަމަކު ރާއްޖެ އާއި އިންޑިއާއާ ދެމެދު އަބަދު ވެސް އޮންނަނީ ވަރަށް މުހިއްމު، ގާތް ގުޅުމެއް ކަމަށާއި މި ދަތުރުގެ ސަބަބުން އެ ގުޅުން އަލުން ގާއިމުވުމުގެ އާ ފެށުމަކަށް ވާނެ ކަމަށް އުއްމީދުކުރައްވާ ކަމަށް ވިދާޅުވި އެވެ.

ރައީސް މުއިއްޒުގެ ސަރުކާރުން، އިންޑިއާއަށް ވުރެ ޗައިނާ އިސްކުރުމާ ގުޅޭގޮތުން ނޫސްވެރިޔާ ކުރި ސުވާލަށް ޖަވާބު ދެއްވަމުން ފައްޔާޒު ވިދާޅުވީ، ވެރިކަމަށް ވަޑައިގެންނެވި އިރު، މި ސަރަހައްދުގެ ސިޔާސީގުޅުންތަކާ ގުޅޭގޮތުން މުއިއްޒަށް ކަންކަން އެނގިވަޑައިގަންނަވާނެ ކަމަށް އުއްމީދު ކުރެއްވި ކަމަށެވެ. އެކަމަކު ފެނުނީ، އެމަނިކުފާނާއި އެކުގައި އޮތް ޓީމުން، ވަރަށް ގިނަ ޅައެއްޗެހި އަޅުއްވާތަން ކަމަށް ވިދާޅުވި އެވެ.

"އެކަމަކު އަޅުގަނޑުމެން އެމްޑީޕީން ވަރަށް އުއްމީދުކުރަން މިއީ [ޖައިޝަންކަރުގެ ދަތުރަކީ] މި ގުޅުން ވަރުގަދަ ކުރުމަށް ސަރުކާރުން ކުރާ ކަމެއް ކަމަށް،" ފައްޔާޒު ވިދާޅުވި އެވެ.

އޭނާ ވިދާޅުވި ގޮތުގައި ސަރުކާރުން އަމަލު ކުރަމުން އަންނަ ގޮތުން، ސަރުކާރުން ވިސްނާ ގޮތާއި ހިނގަމުން އަންނަ ގޮތާ ގުޅޭގޮތުން އެއްޗެއް ލަފާކުރުމަކީ އުނދަގޫކަމެކެވެ.

ސިޔާސީ މީހުންގެ ނަޒަރުގައި ރާއްޖޭގައި ތިބި އިންޑިއާ ސިފައިން ބޭރު ކުރުމުގެ ނަމުގައި، ކުރީގެ ރައީސް އަބްދުﷲ ޔާމީން ފެއްޓެވި 'އިންޑިއާ އައުޓް' ކެމްޕޭނަކީ، ވެރިކަމަށް ވަޑައިގަތުމަށް އެ މަނިކުފާނު ހިންގެވި ހަރަކާތެކެވެ. ފައްޔާޒު ވިދާޅުވި ގޮތުގައި، ކެމްޕޭނުގެ ތެރެއިން މުއިއްޒު ވެސް އެކަމުގައި ބައިވެރިވެ ވަޑައިގެންނެވި ނަމަވެސް، ނާގާބިލްކަމުގެ ސަބަބުން ފަހުން އެ މަނިކުފާނަށް އެކަމުން ރެކިވަޑައިގަންނަވަން ނޭނގުނީ އެވެ.

އެކަމަކު މިހާރު، އިންޑިއާގެ މުހިއްމުކަން ކޮންމެވެސް ވަރަކަށް ރައީސަށް އިހުސާސްކުރެއްވޭހެން ހީފުޅުވާ ކަމަށް އޭނާ ވިދާޅުވި އެވެ.

ފައްޔާޒު ދެން ވާހަކަ ދެއްކެވީ އެމްޑީޕީގެ ސަރުކާރުގައި ގައުމުތަކާ މެދު ބޭއްވި ގުޅުމާ ގުޅޭގޮތުންނެވެ. އޭނާ ވިދާޅުވީ އަވަށްޓެރި ހުރިހާ ގައުމުތަކަކާ ވެސް އެކުވެރި ގުޅުމެއް ބޭއްވުމަށް އެމްޑީޕީން ވަރަށް އިސްކަމެއް ދިން ކަމަށެވެ. ޗައިނާއާ ވެސް ގުޅުން ބޭއްވި ކަމަށާއި އެކަމަކު އެންމެ ބޮޑު އިސްކަމެއް ދިނީ ގައުމީ ސަލާމަތާއި އިންޑިއާ ކަނޑުގެ ރައްކާތެރިކަމާއި އަމާންކަމަށް ކަމަށް ވިދާޅުވި އެވެ.

އެނގުން މުހިއްމު- ޖައިޝަންކަރުގެ މި ދަތުރަކީ ރައީސް މުހައްމަދު މުއިއްޒުގެ ސަރުކާރުގައި އިންޑިއާގެ ވަޒީރަކު ރާއްޖެއަށް ކުރައްވާ ފުރަތަމަ ރަސްމީ ދަތުރެވެ.

ފޮރިން މިނިސްޓްރީން އިއްޔެ ބުނީ ޖައިޝަންކަރު ރާއްޖެ ވަޑައިގަންނަވަނީ ތިން ދުވަހުގެ ރަސްމީ ދަތުރުފުޅެއްގައި ކަމަށެވެ. ރާއްޖޭގެ ފޮރިން މިނިސްޓަރު މޫސާ ޒަމީރުގެ ދައުވަތަކަށް ކުރައްވާ މި ދަތުރުފުޅުގައި އަންނަ އާދިއްތަ ދުވަހުގެ ނިޔަލަށް ޖައިޝަންކަރު ރާއްޖޭގައި މަޑުކުރައްވާނެ އެވެ. 

މި ދަތުރުފުޅުގައި: