ރައްޔިތުންގެ މަޖިލީހަކީ ރައީސް މުއިއްޒުގެ ތަނެއް: އަބްދުއްރަހީމް

ރައްޔިތުންގެ މަޖިލީހަކީ ރައީސް މުހައްމަދު މުއިއްޒުގެ ތަނެއް ކަމަށް މަޖިލީހުގެ ރައީސް އަދި ވެރިކަންކުރާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.

ވީ ކިހިނެއް؟ - އަބްދުއްރަހީމް މިހެން ވިދާޅުވީ ރޭ ޕީއެންސީގެ މައި ޖަގަހައިގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ބުނީ ކީކޭ؟ - ކުރީގެ ރައީސް އަބްދުﷲ ޔާމީން، މަޖިލީހުގެ މެންބަރުން ހައްލަން މަސައްކަތް ކުރާނެ ކަމަށް ވިދާޅުވަމުން އަބްދުއްރަހީމް ވިދާޅުވީ ރައްޔިތުންގެ މަޖިލީހުގެ ސުޕަމެޖޯރިޓީ ޕީއެންސީއަށް ދީ، މަޖިލީހުގައި މިހާރު ތިބި މެންބަރުން ރައްޔިތުން އިިންތިހާބުކުރީ ރައީސް މުއިއްޒުގެ ސަރުކާރު ހިންގައި އެކަމަށް އެހީތެރިވުމަށް ކަމަށެވެ.

"ރައީސް ޔާމީން ކިތަންމެ ހިތްދަތިވިޔަސް މިއަދުގެ ރައްޔިތުންގެ މަޖިލީހަކީ ރައީސް މުއިއްޒުގެ މަޖިލީހެއް. ރައީސް މުއިއްޒަށް ރައްޔިތުން ދީފައި އޮތް މަޖިލީހެއް،" އަބްދުއްރަހީމް ވިދާޅުވި އެވެ.

އެހެންކަމުން، މަޖިލީހުގެ މެންބަރުން އެކަމަށް ސަމާލުކަންދީ، ގައުމާއި ރައްޔިތުންގެ ލާބަ އާއި މަންފާއަށް މަސައްކަތްކޮށް، މި ގައުމު ތަރައްގީކުރަން މުއިއްޒަށް އެހީތެރުވުމަށް އަބްދުއްރަހީމް ނަސޭހަތްތެރިވެވަޑައިގެންނެވި އެވެ.

ރައީސް މުއިއްޒަށް ވެރިކަން ކުރަން ނޭނގޭ ކަމަށް، ރައީސް މުއިއްޒު އިންތިހާބުކުރުމުގައި އުޅުއްވުމަށް ފަހު ޕީޕީއެމް އާއި ޕީއެންސީން ވަކިވެވަޑައިގެން އާ ޕާޓީއެއް އުފައްދަވާފައިވާ ޔާމީން ވިދާޅުވި ވިދާޅުވުމަށް ވެސް އަބްދުއްރަހީމް ރައްދު ދެއްވި އެވެ. އެ މަނިކުފާނު ވިދާޅުވީ މަޖިލީހުގެ ސުޕަމެޖޯރިޓީ ޕީއެންސީއަށް ދިނުމަކީ މުއިއްޒަށް ވެރިކަން ކުރަން އެނގޭކަމުގެ ހެއްކެއް ކަމަށެވެ.

"ވެރިކަން ކުރަން ރައީސް މުއިއްޒަށް ނޭނގުނު ނަމަ މަޖިލީހުގެ މެޖޯރިޓީ ރައީސް މުއިއްޒަށް ލިބިވަޑައެއްނުގަންނަވާނެ. ރައްޔިތުންގެ މަޖިލީހުގެ މިއަދުގެ މެޖޯރިޓީ ރައީސް މުއިއްޒަށް ލިބުން އެއްޗެއް އެއީ ރައީސް ޔާމީނަށް ދިން އެއްޗެއް ނޫން،" އަބްދުއްރަހީމް ވިދާޅުވި އެވެ. 

"ވެރިކަން ހޯދީމަ ބުނީ އެއީ [ޔާމީނަށް ހާއްސަކޮށް ރިޔާސީ އިންތިހާބުގައި ބެހެއްޓި] ހުސް ގޮނޑި ހިފައިގެންނޭ ހޯދީ. އެހެން ބުނީމަ އަޅުގަނޑުމެން ނުކުތީ [މަޖިލިސް އިންތިހާބުގެ ކެމްޕޭނަށް] ހުސްގޮނޑިއާ ނުލާ ނުކުމެ 75 ގޮނޑި މުއިއްޒަށް ރައްޔިތުން ދިނީ. ހުސް ގޮނޑި ހިފައިގެން ދުވުނު މީހުންނަށް 93 ގޮނޑީގެ ތެރެއިން އެންމެ ގޮނޑިއެއް ވެސް ނުދިން،" އެ މަނިކުފާނު ވިދާޅުވި އެވެ.

އަބްދުއްރަހީމް ވަނީ ރޭ ވެސް ޔާމީނަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން، އެ މަނިކުފާނާއި ޕީއެންސީގައި ތިއްބެވި އިސް ލީޑަރުންނާ އެއްވަރަށް ޔާމީނަށް އިހުލާސްތެރިވާނޭ ބަޔަކު ނުތިބޭނެ ކަމަށް ވެސް އެ މަނިކުފާނު ވިދާޅުވި އެވެ.