މައުލޫމާތު ނުދޭ މަައްސަލާގައި ފިޔަވަޅު އެޅުމަކީ ހައްލެއް ނޫން: އައިކޮމް

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދައުލަތުގެ އިދާރާތަކުން ހޯދުމަށް އެދޭ މައުލޫމާތު ފޯރުކޮށް ނުދީގެން ފިޔަވަޅު އެޅުމަކީ ހައްލެއް ކަމަށް ދެކެވަޑައިނުގަންނަވާ ކަމަށް އިންފޮމޭޝަން ކޮމިޝަނަރު އާހިދު ރަޝީދު މިއަދު ވިދާޅުވެެއްޖެ އެވެ.

ވީ ކިހިނެއް؟ - އިންފޮމޭޝަން ކޮމިޝަނަރުގެ އޮފީހުގެ މަސައްކަތްތަކާ ގުޅޭ ގޮތުން ރައްޔިތުންގެ މަޖިލީހުގެ މިނިވަން މުވައްސަސާތަކުގެ ކޮމެޓީއަށް އެ އޮފީހުގެ ބޭފުޅުން ވަނީ މިއަދު ހާޒިރު ކޮށްފަ އެވެ.

ތަފްސީލް - މެެންބަރެއްގެ ސުވާލަށް ޖަވާބު ދެއްވަމުން އިންފޮމޭޝަން ކޮމިޝަނަރު އާހިދު ކޮމެޓީގައި ވިދާޅުވީ:

"އިދާރާތަކާ އެކު މަޝްވަރާކޮށްގެން އެކަން ރަނގަޅު ކުރެވޭތޯ ބަލަމުން މިދަނީ. އެކަމަކު ވަކި ހިސާބަކުން އަޅުގަނޑުމެން ވެސް އެބަ ޖެހޭ ދައުލަތުގެ މިންވަރުގައި މި ކަންބޮޑުވުން ކަމާ ބެހޭ ފަރާތްތަކާ އެކު ވާހަކަދައްކައި މި ކަމަށް ހައްލެއް ހޯދަން މަސައްކަތް ކުރަން،" އާހިދު ވިދާޅުވި އެވެ.

އޭނާ ވިދާޅުވީ މައުލޫމާތު ހިއްސާ ނުކުރާ މައްސަލާގައި ކަމާ ބެހޭ ފަރާތްތަކާ އެކު ރިޕޯޓެއް އެކުލަވާލަން ނިންމާފައިވާ ކަމަށެވެ.

"އަޅުގަނޑަށް ސީދާ ގަބޫލު ނުކުރެވެނީ މިކަން ހައްލު ކުރެވޭނީ ޖޫރިމަނާކޮށްގެން ފިޔަވަޅު އަޅައިގެންނޭ. އެެހެން ނަމަވެސް އެ ހިސާބަށް ގޮސްގެން އެކަން ކުރަން ޖެހިއްޖެ ނަމަ ކުރަން ޖެހޭނެެ،" އާހިދު ވިދާޅުވި އެވެ.

މައުލޫމާތު ނުދީގެން މިހާތަނަށް ޕްރޮސެކިއުޓާ ޖެނެރަލްގެ އޮފީހަށް ދެ މައްސަލައެއް ހުށަހަޅާފައިވާ ކަމަށް އާހިދު ވިދާޅުވި އެވެ. އެ އޮފީހަށް ފޮނުވަން ޖެހޭ 10 ވަރަކަށް މައްސަލަ އަދިވެސް އެބައޮތް ކަމަށް އޭނާ ވިދާޅުވި އެވެ.

އިންފޮމޭޝަން ކޮމިޝަނަރުގެ އޮފީހަށް ހުށަހެޅޭ މައްސަލަތައް ގާނޫނުގައި ބުނާ 30 ދުވަހުގެ ތެރޭ ބަލައި ނިންމުމަށް އިސްކަންދޭ ކަމަށް ކޮމިޝަނަރު ފާހަގަކުރެއްވި އެވެ.

އިންފޮމޭޝަން ކޮމިޝަނަރުގެ އޮފީހަށް މިވަގުތު ދިމާވެފައިިވާ އެންމެ ބޮޑު ގޮންޖެހުމަކީ، އޭނާ ވިދާޅުވި ގޮތުގައި، އޮފީސް ޖާގައިގެ ދަތިކަމާއި މުވައްޒަފުންގެ ދަތިކަމެވެ. އެ އޮފީހުގެ މަސައްކަތްތައް ކުރިއަށް ގެންދަން އެކަށީގެންވާ ބަޖެޓު ނުލިބުމަކީ ވެސް ގޮންޖެހުމެއް ކަމަށް އެ އޮފީހުން ފާހަގަކުރި އެވެ.

ފާހަގަ ކުރެވޭ - މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މި އަހަރު އެންމެ ގިނަ އިން މައުލޫމާތު ހޯދަން އެދިފައިވަނީ ރައީސް އޮފީހުންނެވެ. އެ އޮފީހުން މައުލޫމާތު ހޯދަން 103 ހުށަހެޅުމެއް ލިބިފައި ވާއިރު، 57 ހުށަހެޅުމެއް ފިނޭންސް މިނިސްޓްރީން މައުލޫމާތު ހޯދަން އެހި ހުށަހަޅާފައިވާ ކަމަށް އިންފޮމޭޝަން ކޮމިޝަނަރު ވިދާޅުވި އެވެ.