މިރިއަންދޫގައި އެކްސިޑެންޓުވި ސީޕްލޭންގައި ދަބަރު ޖަހާފައި ހުރި: ރިޕޯޓު

ބ. އަތޮޅުގައި ހިންގާ މިރިއަންދޫ ވެސްޓިން މޯލްޑިވްސް ރިސޯޓަށް ޖެއްްސުމުގެ ތެރޭގައި މިދިޔަ 9 ޖޫންގައި އެކްސިޑެންޓުވި ޓީއެމްއޭގެ ބޯޓުގައި ދަބަރު ޖަހާފައި ހުރި ކަމަށް ސިވިލް އޭވިއޭޝަން އޮތޯރިޓީ (ސީއޭއޭ) އިން އެ ހާދިސާ އަށް ފަހު ކުރިއަށް ގެންދިޔަ ތަހުގީގުގެ ޕްލިމިނަރީ ރިޕޯޓުގައި ބުނެފި އެވެ.

ވީ ކިހިނެއް؟ - މިދިޔަ ބުދަ ދުވަހު ސިވިލް އޭވިއޭޝަނުން އާންމުކުރި އެ ރިޕޯޓުގައި ބުނީ މިރިއަންދޫގައި ހިނގި އެކްސިޑެންޓަށް ފަހު، ރާއްޖޭގައި ސީޕްލޭންގެ ހިދުމަތް ދޭ އެއާލައިިންތަކާ އެކު އެ އިދާރާ އިން ކުއްލި ބައްދަލުވުމެއް ބޭއްވި ކަމަށާއި ސީޕްލޭންގައި ކަނދު ހަރުކުރުމާ ގުޅޭ ސޭފްޓީ އިންސްޕެކްޝަނެއް ކުރިއަށް ގެންދަން އެ އެއާލައިނުތަކަށް އެންގި ކަމަށެވެ.

ތަފްސީލް - ސިވިލް އޭވިއޭޝަނުގެ ރިޕޯޓުގައި ހިމަނާފައިވާ ފޮޓޯތަކުން، އެކްސިޑެންޓުވި ބޯޓުގެ ފްލޯޓު ފިޓިންގައި ދަބަރު ޖަހާފައި ހުރިތަން ފެނެ އެވެ.

ސިވިލް އޭވިއޭޝަނުން ބުނީ ސީޕްލޭން އޮޕަރޭޓަރުންނާ އެކު ބޭއްވި ކުއްލި ބައްދަލުވުމުގައި، ސީޕްލޭންތަކަށް ބޭރުފުށުން ފެންނަން ހުރި އެއްވެސް ގެއްލުމެއް ލިބިފައިވޭތޯ އާއި ބޯޓުތަކުގައި ދަބަރުގެ އަސަރު ހުރިތޯ އަދި ބޯލްޓް ހޯލްތަކާއި ބެއަރިންގްތައް ރަނގަޅަށް ހަރުކުރެވިފައި ހުރިތޯ ވަކިވަކިން ބަލަން އެންގި ކަމަށެވެ. އަދި ދަބަރުގެ އަސަރު ހުރި ނަމަ ބޯލްޓުތައް ފަދަ އެއްޗެހި ބަދަލު ކުރަން ވެސް އެންގި ކަމަށް އެ ރިޕޯޓުގައި ފާހަގަކޮށްފައިވެ އެވެ.

ސިވިލް އޭވިއޭޝަނުގެ ތަހުގީގުން ފާހަގަވި ކަންކަމާ ގުޅޭގޮތުން ރިޕޯޓުގައި ބުނެފައިވަނީ:

ސިވިލް އޭވިއޭޝަނުގެ ރިޕޯޓުގައި ބުނީ އެ ބޯޓު މިރިއަންދޫ އަށް ޖެއްސުމަށް ފަހު، ބޯޓު ފަހަތަށް ޖަހަން އުޅުމުގެ ތެރޭ އާދަޔާހިލާފު އަޑެއް އިވި، ބޯޓު ކަނާތް ފަރާތަށް އަރިވި ކަމަށާއި ބޯޓުގެ ކަނާތް ފަޅީގެ ކަނދު ވަކިވެފައިވާކަން ކްރޫއަށް ފާހަގަވި ކަމަށެވެ.

ނަމަވެސް މި ހާދިސާގައި އެއްވެސް ފަސިންޖަރަކަށް ގެއްލުމެއް ނުލިބި، ބޯޓުގައި ތިބި އެންމެން ސަލާމަތް ކުރެވުނު ކަން ރިޕޯޓުގައި ފާހަގަކޮށްފައިވެ އެވެ.

އެ ރިޕޯޓުން އެނގޭ ގޮތުގައި، ޑިންގީތަކެއްގައި ކަފުޖަހައިގެން އެއްގަމަށް އެރުވި އިރު ބޯޓުގެ އެތެރެ އޮތީ ދިޔަވެފަ އެވެ.