ސްކޫލު ވައިބާ ގުރޫޕުތައް އަނެއްކާވެސް މައްސަލައަކަށް ވެއްޖެ

ޓީޗަރުންނާ ބެލެނިވެރިންނާ ގުޅުވައިދޭ، އެއަށް ވުރެ ބޮޑަށް ސްކޫލުގެ ނޯޓިސް ބޯޑުތަކަށް ބަދަލުވެފައިވާ ވައިބާ ގުރޫޕުތަކަށް، މި ފަހުން ގެނައި ބަދަލާ ގުޅިގެން އަނެއްކާވެސް ބެލެނިވެރިންގެ މެދުގައި ހިޔާލުތަފާތުވެއްޖެ އެވެ.

ވީ ކިހިނެއް؟- ސްކޫލްތަކުން ބެލެނިވެރިންނާ މުއާމަލާތު ކުރަން ހަދާފައިވާ ވައިބާ ގްރޫޕްތަކުން، ވަކިވަކި ކްލާސްތަކަށް ރަސްމީ ގްރޫޕްތައް ބޭނުން ނުކުރަން އެޑިއުކޭޝަން މިނިސްޓްރީން މިދިޔަ ޖޫން މަހުގެ ތެރޭގައި ވަނީ އަންގާފަ އެވެ. އެއާ އެކު، ކޮންމެ ކްލާހަަކަށް ގުރޫޕެއް އޮތުމުގެ ބަދަލުގައި، މިހާރު މުއާމަލާތު ކުރަމުން ގެންދަނީ ކޮންމެ ގްރޭޑެއްގައި ހިމެނޭ ހުރިހާ ކްލާސްތައް ހިމެނޭ ގޮތަށް އެއް ގުރޫޕެކެވެ.

އެޑިއުކޭޝަން މިނިސްޓްރީން މިގޮތަށް އެންގީ ވެސް، އެފަދަ ގްރޫޕްތައް ހިންގަމުންދާ ގޮތުން އެކި އުނދަގޫތައް ވާކަމަށް ބުނެ ބެލެނިވެރިންގެ ޝަކުވާތައް ގިނަވުމުންނެވެ.

ތަފްސީލު - އެޑިއުކޭޝަނުގެ މި ނިންމުމަށް މާގިނަ ދުވަހެއް ނުވަނީސް، ސޯޝަލް މީޑިއާގައި ވަރަށް ގިނަ ބެލެނިވެރިން ދަނީ، މިއާ ބަދަލު ކަމުނުދާ ކަމަށް ބުނަމުންނެވެ.

އެގޮތުން ޝުއޫރު ފާޅުކުރެއްވި، ކަރުންމަތީގެ ހާއްސަ ޑޮކްޓަރު އަދި ބެލެނިވެރިޔާ މައުރޫފް ހުސެއިން ވިދާޅުވީ ދެތިން ކުއްޖަކު ސްކޫލަށް ގެންދާ ނަމަ، މިހާރު އެއީ ބެލެނިވެރިންނަށް ވަރަށް ބޮޑު މަސައްކަތެއް ކަމަށެވެ. އޭނާ ވިދާޅުވި ގޮތުގައި:

"ކޮންމެ ގްރޭޑެއްގައި އެތައް ގިނަ ކްލާސް ތަކެއް އޮންނަ އިރު އެ މެސެޖްފުނީގެ ތެރެއިން ތިމާގެ ދަރިފުޅުގެ ކުލާހުގެ މެސެޖް ހޯދުމަކީ ކުޑަ ކަމެއް ނޫނެވެ." ފޭސްބުކްގައި ލިޔުއްވި ޕޯސްޓެއްގައި މައުރޫފް ވިދާޅުވި އެވެ.

މިއީ އެހެން ބެލެނިވެރިންނަށް ވެސް ކުރެވޭ އިހުސާސެއް ނަމަ ޝެއާކޮށްދިނުމަށް އެދި ކުރި އެ ޕޯސްޓު، 500އަށް ވުރެ ގިނަ މީހުން ޝެއާ ކުރި އެވެ.

"އަސްލުވެސް. ވައިބާގެ ބަދަލުގައި ކްލާސް ކޮމިއުނިކޭޝަން އެޕެއް މިހާރު އެޑިއުކޭޝަނުން ހަދަން ވެއްޖެއެއްނު،" ފަޒްލީ ކިޔާ މީހަކު ފޭސްބުކްގައި ލިޔުނެވެ.

"ތި ވައިބާ އުވާލާފައި، ކުރީގައި ހަދާހެން ބޯޑުގައި ލިޔެފައި ކުދިންގެ ނޯޓު ފޮތުގައި ކިޔަން ބުނެބަލަ. ލިޔުން ވެސް އޭރުން ރީތިވާނެ. މާދަމާއަށް އެގޮތް މާރަނގަޅުވާނެ،" އެހެން މީހަކު ބުންޏެވެ.

ހިޔާލުފާޅުކުރާ ބައެއް ބެލެނިވެރިން ބުނިގޮތުގައި އެތައް ކްލާހެއް ހިމެނޭ ގުރޫޕަކުން، ވަކި ކްލާހެއްގެ މެސެޖަކަށް ފާރަލައި، އެ ހޯދުމަކީ އުނދަގޫ ކަމެކެވެ. އަދި އޭގެ ސަބަބުން ބައެއް މެސެޖުތައް ނުފެނި ދާ ކަމަށް ވެސް އެ މީހުން ބުނެ އެވެ.

ބައެއް ބެލެނިވެރިންގެ ނަޒަރުގައި މިކަމަށް އޮތް ހައްލަކީ، ޒިންމާ ނެގުމަށް ވީހާވެސް ބޮޑަކަށް ދަރިވަރުންނަށް ދަސްކޮށްދިނުމެވެ. އެގޮތުން ވައިބާ މެދުވެރިކޮށް މުއާމަލާތުކުރުމުގެ ބަދަލުގައި، 'ޕޭރެންޓް ޓީޗާ ކޮމިއުނިކޭޝަން' ފޮތުގައި ލިޔެ، އެ ފޮތް ބެލެނިވެރިންނަށް ދެއްކުމަކީ ކުދިންގެ ޒިންމާއަކަށް ހެދިދާނެ އެވެ. 

"ބައެއް ފަހަރު ޓީޗަރުން ލިޔެފައި، އަނެއް ބައިފަހަރު ކުދިން ލައްވާ ލިޔުއްވުން ކިހިނެއް ވާނެތޯ؟. އޭރުން ކުދިންނަށް އެ ކުދިންގެ ޒިންމާ ވެސް ދަސްވާނެ،" ބެލެނިވެރިއަކު ބުންޏެވެ.