އިސްލާމީ ދިރާސާތަކާއި އެސައިންމެންޓް ހަދަން ތިބެވޭ ގޮތަށް މިސްކިތެއް އަޅަނީ

އިސްލާމީ ދިރާސާތަކާއި ދަރިވަރުންނަށް އެސައިންމަންޓް ހަދަން ތިބެވޭ ގޮތަށް ހުޅުމާލޭގައި ދެ ބުރީގެ މިސްކިތެއް އަޅަން ނިންމާފައިވާކަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ އިއުލާންކުރައްވައިފި އެވެ.

ތަފްސީލް - ޝަހީމް މިސްކިތުގެ ކުރެހުމަކާ އެކު ފޭސްބުކުގައި ވިދާޅުވީ މަދީނާ އިންވެސްޓްމަންޓުގެ ފަރާތުން ހުޅުމާލޭގައި ބިނާކުރާ އެ މިސްކިތުގެ ނަމަކީ 'މަސްޖިދު އުންމުލްމުއުމިނީން އާއިޝާ ރަޟިﷲ އަންހާ' ކަމަށެވެ. މިއީ ކީރިތި ރަސޫލާގެ އަނބިކަނބަލަކަށް ނިސްބަތްކޮށް ރާއްޖޭގައި ނަންދޭ ފުރަތަމަ މިސްކިތްކަން ވެސް ޝަހީމް ފާހަގަކުރެއްވި އެވެ.

އެނގުން މުހިންމު - މި މިސްކިތް ބިނާކުރާ އަލް މަދީނާ އިންވެސްޓްމަންޓަކީ ޝަހީމްގެ މަސްލަހަތު އޮންނަ ކުންފުންޏެކެވެ.

ޝަހީމްގެ ފޭސްބުކް ޕޯސްޓުގައި ވާގޮތުން:

ޝަހީމް ވިދާޅުވިގޮތުގައި އަންނަ މަހުގައި މި މިސްކިތުގެ ބިންގާ އަޅައި މަސައްކަތް ފެށުމަށް ފަހު ދޮޅު އަހަރުން މިސްކިތް ނިމޭނެ އެވެ.

މި މިސްކިތުގެ މަޝްރޫއު އިއުލާންކުރައްވައި ޝަހީމް މިރޭ ޕޯސްޓްކުރެއްވި ކުރެހުން މީގެ ކުރިން ވެސް އާއްމުކުރެއްވި އެވެ. އެކަަމަކު އޭރު އެ ކުރެހުން ނެރުއްވީ އަރަބި ތައުލީމު ދިނުމަށް ޝަހީމް ހުޅުމާލޭގައި އަޅުއްވާ ސްކޫލުގެ މަޝްރޫއު އިއުލާންކުރައްވަމުންނެވެ. 

'މަދީނާ އިންޓަނޭޝަނަލް ސްކޫލް'ގެ ނަމުގައި ޕްރީ ސްކޫލުން ފެށިގެން އޭ ލެވެލްއާ ހަމައަށް ކިޔަވައިދޭނެ ސްކޫލެއް އަޅަން ނިންމާފައިވާކަން ޝަހީމް ހާމަކުރެއްވީ ރިޔާސީ އިންތިހާބު ޕީޕީއެމް-ޕީއެންސީ އިން ކާމިޔާބުކުރި ދަނޑިވަޅުގައި މިދިޔަ އޮކްޓޫބަރު މަހު އެެވެ.

ބިމެއް ހަމަނުޖެހިގެން މީގެ ކުރިން މަޑުޖެހިފައި އޮތް އެ ސްކޫލުގެ މަސައްކަތަށް ބިން ހަމަޖެހިފައިވަނީ ވަގުތީ މިސްކިތް ހުރި ތަނުގައި މިސްކިތެއް ވެސް ބިނާކުރާ ގޮތަށެވެ. އޭރު އެޗްޑީސީން ބުނިގޮތުގައި މިސްކިތް ތަރައްގީކުރާނީ ސްކޫލާއި މިސްކިތް ގުޅިގެންދާ ގޮތަށެވެ.