ގުރުއާން ހިތުދަސްކުރި ރައީފް (ކ) އަށް ތޮއްޑޫ ކައުންސިލުން ދޭ ފައިސާގެ ހަދިޔާ، އެ ރަށު ކައުންސިލްގެ ރައީސް ކަރަމް ހަވާލުކޮށްދެއްވަނީ
ހާފިޒުންނަށް ތޮއްޑޫ ކައުންސިލުން ދޭން ބުނި ބައި ލައްކަ ރުފިޔާ ލިބުނީ ރައީފަށް
ގުރުއާން ހިތުދަސް ކުރާ ތޮއްޑޫގެ ކޮންމެ މީހަކަށް، އެ ރަށު ކައުންސިލުން ދޭން ވައުދުވި ބައި ލައްކަ ރުފިޔާގެ އިނާމު، ތޮއްޑޫގެ ޒުވާނެއް ކަމުގައިވާ އަލީ ރައީފު ހޯދައިފި އެވެ.
ވީ ކިހިނެއް؟ - ގުރުއާން ކިޔެވުމަށް ލޯބި ޖެއްސުމަށް އަދި ރަށުގައި ހާފިޒުން އުފެއްދުމަށް، ތޮއްޑޫ ކައުންސިލުން މި ފައިސާގެ އިނާމު ހުށަހެޅީ 2022 ވަނަ އަހަރު އެވެ. އޭރު ކައުންސިލުން ބުނީ ގުރުއާން ކްލާހަކުން ވިޔަސް އަމިއްލަ ގޮތުން ވެސް ހާފިޒު ކަމުގެ ސަނަދު ހާސިލް ކުރާ އެ ރަށުގެ ކޮންމެ މީހަކަށް އެ އިނާމު ދޭނެ ކަމަށެވެ.
ތަފްސީލް - މިދިޔަ ތިން އަހަރުގެ ތެރޭގައި ތޮއްޑުއިން ހާފިޒު ކަމުގެ ސަނަދު ހޯދީ 21 އަހަރުގެ ރައީފެވެ.
ކައުންސިލުން ބުނި ގޮތުގައި:
-
ގުރުއާން ހިތުދަސްކުރުމުގެ މަސައްކަތް އޭނާ ފެށީ އުމުރުން 9 އަހަރުގައި
-
ގުރުއާން ހިތުދަސްކޮށް، ސަނަދު ހޯދުމަށް ނުވަ އަހަރު ނެގި
-
ރައީފަކީ ރަށުގެ ފެނަކައިގައި މަސައްކަތް ކުރާ ޒުވާނެއް ކަމަށް
އޯޓިޒަމް ހުންނަ ރައީފުގެ މި ކާމިޔާބީ ކުލަގަދަކޮށް ތޮއްޑޫގައި ވަނީ ފާހަގަކޮށްފަ އެވެ.
ތޮއްޑޫ ކައުންސިލުން ދިން މި ފައިސާގެ އިނާމުގެ ތެރެއިން 25،000ރ. އަކީ އެ ތަނުގެ ފައިނޭޝަނަލް ޕްލޭނިންގެ ތެރޭގައި ހިމަނައިގެން ދިން ހަދިޔާ އެކެވެ. ބާކީ 25،000ރ. ދެއްވީ ކައުންސިލްގެ ރައީސް އަހުމަދު ކަރަމް އެވެ.
ތޮއްޑޫ ކައުންސިލުން ކުރިން ބުނިގޮތުގައި ރޯދަ މަހު ރަށުގައި ތަރާވީސް ކުރުމަށް، ރާއްޖޭން ބޭރުން ހާފިޒަކު ގެނައުމަށް ވެސް ބައި ލައްކަ ރުފިޔާ ހަރަދުވެ އެވެ. އެހެންވެ، އެ ވަރުގެ ފައިސާގެ އިނާމެއް ހުށަހެޅީ، ރަށުގެ ޒުވާނުން އެކަން ކުރަން ހިތްވަރުދިނުމަށް ކަމަށް ބުނެފައި ވެ އެވެ.