ގެއްލިގެން ހޯދި ކުޑަކުއްޖާ ޓެސްޓުތަކެއް ހެދުމަށް ތިނަދުއަށް

ގދ. ފިޔޯރީން އިއްޔެ ގެއްލިގެން ހޯދި، އުމުރުން 8 އަހަރުގެ ކުޑަކުއްޖާ އިތުރު ޓެސްޓުތަކެއް ހެއްދުމަށް އެ އަތޮޅު ތިނަދޫ ހޮސްޕިޓަލަށް ގެންގޮސްފި އެވެ.

ވީ ކިހިނެއް؟ - ކުޑަކުއްޖާ ގެއްލިގެން ފުލުހުންނަށް ރިޕޯޓުކުރީ ރޭ 7 ހާއިރު އެވެ. އެއާ އެކު، ރަށުގެ ރައްޔިތުންނާ ގުޅިގެން ކުރި މަސައްކަތުން ކުއްޖާ ފެނިފައިވަނީ ރޭ 11:30 ހާއިރު އެވެ.

ތަފްސީލް - ފިޔޯރީ ކައުންސިލުން 'ދައުރު'އަށް ބުނި ގޮތުގައި އެ ކުއްޖާ ފެނުނީ، ދިރިއުޅޭ ގެއާ މާ ދުރު ނޫން ހިސާބެއްގައި ހުންނަ ފަޅުގެއެއްގެ ތެރެއިންނެވެ. ވަރަށް ފަހުން މީހުން ދިރިއުޅުނު އެ ގޭގެ ގޯތިތެރެއިން ކުޑަކުއްޖާ ފެނުނު އިރު އެ ކުއްޖާ އޮތީ ވެއްޓިފަ އެވެ. އޭރު ކުއްޖާގެ ހޭ ވެސް ނެތެވެ.

ކައުންސިލް މެމްބަރު މުހައްމަދު ޝަހުމަތު ވިދާޅުވި ގޮތުގައި:

"ފެނުނު އިރު ހޭނެތިފައި އޮތީ. އެކަމަކު ބޮލަށް ފެން އެޅުމުން ހޭ އަރައިފި. އަނެއްހެން ބޭރުފުށުން އަނިޔާއެއް ލިބިފައެއް ނެތް،" ޝަހުމަތު ވިދާޅުވި އެވެ.

އޭނާ ވިދާޅުވީ ކުޑަކުއްޖާ އިއްޔެ ގެއިން ނުުކުމެެގެން ދިޔައީ މަންމަ ދެކެ ރުޅިއައިސްގެން ކަމަށާއި މީގެ ކުރިން ވެސް އެގޮތަށް ދާ ކަމަށެވެ. އެކަމަކު އިރުއޮއްސެންވާއިރަށް އެނބުރި ގެއަށް އަންނަ ކަމަށް އޭނާ ވިދާޅުވި އެވެ. ފުލުހުންނަށް ރިޕޯޓު ކުރީ، އިއްޔެ ފަހެއް ޖަހާކަންހާއިރު ބޭރަށް ނުކުތް ކުއްޖާ އިރު އޮއްސުނު ފަހުން ވެސް ގެއަށް ނައުމުން ކަމަށް ޝަހުމަތު ވިދާޅުވި އެވެ.