ފިޔޯރީން ގެއްލުނު ކުއްޖާ ފެނިއްޖެ؛ އޮތީ ހޭނެތިފައި

ގދ. ފިޔޯރީގައި ގެއްލިގެން ހޯދަމުންދިޔަ އަށް އަހަރުގެ އަންހެން ކުއްޖާ ފެނިއްޖެ އެވެ.

ވީ ކިހިނެއް؟ - އެ ކުއްޖާ ގެއްލިގެން ފުލުހުނަށް ރިޕޯޓުކޮށްފައި ވަނީ ރޭ ހަތެއް ޖަހާކަންހާއިރު އެވެ. އެއާއެކު ރަށުގެ ރައްޔިތުން ގުޅިގެން ކުއްޖާ ހޯދުމުގެ މަސައްކަތް ފުލުހުން ފެށި އެވެ.

ތަފްސީލު - ރޭ 11:30 ހާއިރު، ފުލުހުން މީޑިއާތަކަށް ފޮނުވި މެސެޖެއްގައި ބުނީ އެ ކުއްޖާ މިހާރު ފެނިފައިވާ ކަމަށެވެ. އިތުރު ތަފްސީލެއް ނުދެ އެވެ.

އެ ރަށު ކައުންސިލްގެ ރައީސް ފައިޒަރު ރަޝީދު 'ދައުރު'އަށް ވިދާޅުވީ ކުއްޖާ ފެނުނީ އޭނާ ދިރުއުޅޭ ގެއާ 300އެއްހާ ފޫޓު ދުރުގައި ހުރި ފަޅު ގޯއްޗެއް ތެރޭ ހޭނެތިފައި އޮއްވާ ކަމަށެވެ.

"ބޭރު ފުށުން ނެތް އެއްވެސް ކަހަލަ ގެއްލުމެއް، ފެންނަ ފެނުމަށް ހާލު ރަނގަޅު. އެކަމަކު ކޮންމެވެސް ވަރަކަށް ބިރުގެންފައި ހުރީ،" ފައިޒަރު ވިދާޅުވި އެވެ.

އޭނާ ވިދާޅުވި ގޮތުގައި މިހާރު އޮކްސިޖަން ގުޅާފައި، ސިއްހީ މަރުކަރުގައި ބަލަން ޖެހޭ ކަންކަން ޑޮކްޓަރުން އަންނަނީ ބަލަމުންނެވެ.