ޒަމާނަށް ފެތޭ ޕާޓީއަކަށް ހަދަން އެމްޑީޕީގެ މަގު ޗާޓެއް ހަދަނީ

ޒަމާނަށް ފެތޭ ޕާޓީއަކަށް އިދިކޮޅު މައި ޕާޓީ، އެމްޑީޕީ ހެދުމަށްޓަކައި މަގު ޗާޓެއް އެކުލުވާލުމުގެ މަސައްކަތް އެޕާޓީން ފަށައިފި އެވެ.

ވީ ކިހިނެއް؟ - އެ މަސައްކަތް ޕާޓީގެ ފަރާތުން މިހާރު ފަށާފައިވާކަން، ރޭ ބޭއްވި އެމްޑިޕީ ގައުމީ މަޖިލިސް ބައްދަލުވުމުގައި އެޕާޓީގެ ޗެއާޕާސަން ފައްޔާޒު އިސްމާއިލް ވަނީ މެންބަރުންނާ ހިއްސާ ކުރައްވާފަ އެވެ. 

ތަފްސީލު - އެ ބައްދަލުވުމާ ގުޅޭ ގޮތުން އެމްޑީޕީން އެ ޕާޓީގެ ވެބްސައިޓުގައި ބުނި ގޮތުގައި:

"ރާއްޖޭގެ ސިޔާސީ މަޝްރަހަށް ބޮޑެތި ބަދަލުތަކެއް ފާއިތުވީ އަހަރުތަކުގައި އައިސްފައިވާއިރު އެ ބަދަލުތަކާ އެއްވަރަށް ޕާޓީގެ ހިންގުމަށް ވެސް ބަދަލު ގެނެސް މުއައްސަސާއެއްގެ ގޮތުގައި އިންސްޓިޓިއުޝަނަލައިޒް ކުރުމަކީ ރާއްޖޭގެ ޑިމޮކްރަސީ ކުރިއެރުވުމަށް މުހިއްމު ކަމެއް ކަމުގައި ޗެއާޕާސަން ވިދާޅުވި އެވެ.،" ގައުމީ މަޖިލިސް ބައްދަލުވުމާ ގުޅޭ ގޮތުން އެމްޑީޕީގެ ވެބްސައިޓުގައި ޝާއިއުކޮށްފައި ވާ ލިޔުމުގައި ބުނެފައިވެ އެވެ.

"އެކަމަށް ވާސިލުވުމުގެ ގޮތުން ހަރުދަނާ މަގުޗާޓެއް އެކުލަވާލުމުގެ މަސައްކަތް ކުރައްވަމުން އަންނަ ކަމުގައި ޗެއާޕާސަން ވިދާޅުވި އެވެ." 

އެމްޑީޕީން ބުނި ގޮތުގައި، މި މަގުޗާޓަކީ އެމްޑީޕީގެ ވިސްނުމާއި ފިކުރާއި ތަސައްވުރު އަދި މިޝަން ރަނގަޅަށް ބަޔާންކުރެވިފައިވާ މުސްތަގުބަލުގެ ލީޑަރުން އުފައްދާނެ މަގުޗާޓަކަށް ހެދުމަށް ފައްޔާޒު ވަނީ ގައުމީ މަޖިލީހުގައި އެދިވަޑައިގެންފަ އެވެ. 

އޭގެ އިތުރުން، އެމްޑީޕީގެ ފިކުރަކީ ސިޔާސަތުތަކުގެ މައްޗަށް އެކުލެވޭ އެއްޗަކަށް ހެދުމުގެ މުހިންމުކަން ފައްޔާޒު ފާހަގަކުރެއްވި ކަމަށް އެ ލިޔުމުގައިވެ އެވެ. އަދި އެމްޑީޕީގެ ސިޔާސަތުތަކަށް ތާއީދުކުރާ މީހުން އެމްޑީޕީއަށް ވޯޓު ދިނުން އިތުރުކުރާނެ ގޮތްތައް މަގުޗާޓުގައި ހިމެނުމުގެ މުހިންމުކަން އޭނާ ފާހަގަ ކުރެއްވާފައިވެ އެވެ. 

"މި މަސައްކަތް ކުރުމުގައި ގައުމީ މަޖިލީހުގެ މެމްބަރުންނާ ފުޅާ ދާއިރާއެއްގައި މަޝްވަރާ ކުރެވޭނެ ކަމަށާއި އަދި މި މަސައްކަތުގެ މައުލޫމާތު ޕާޓީގެ ހުރިހާ މެމްބަރުންނާއި އާންމު ރައްޔިތުންނާ ވެސް ކުރިއަށް އޮތް ދުވަސްތަކުގައި ހިއްސާކުރައްވާނެ ކަމުގައި،" ފައްޔާޒު ވިދާޅުވި ކަމަށް އެމްޑީޕީން ބުނެފައިވެ އެވެ.