ބޮޑު އީދަށް މާލޭގެ މަގުތައް ޒީނަތްތެރިކޮށް، ގިޑިގެ ހަދާފައި. އީދާ ދިމާކޮށް ގެތައް ޒީނަތްތެރިކޮށް ދިއްލުމުގެ މުބާރާތެއް ކުރިއަށް ގެންދަން އައްޑޫ ސިޓީ ކައުންސިލުން ވަނީ ނިންމާފައި (ދައުރު ފޮޓޯ/ މުޒައްޔިން ނާޒިމް)
އީދަށް އައްޑޫގެ ގެތައް ދިއްލާ ޒީނަތްތެރިކުރުމުގެ މުބާރާތެއް
މިއަހަރުގެ އަލުހާ އީދު ފާހަގަ ކުރުމަށް އައްޑޫ ސިޓީ ކައުންސިލުން އިންތިޒާމުކޮށްގެން އެ ސިޓީގެ ގޭގެ ޒީނަތްތެރި ކުރުމުގެ މުބާރާތެއް ކުރިއަށް ގެންދަން ނިންމައިފި އެވެ.
ވީ ކިހިނެއް؟ - އެ ކައުންސިލުން މިދިޔަ ހަފްތާ ކުރި އިއުލާނެއްގައި ބުނީ، އައްޑޫ ގައި އަލުހާ އީދު ކުލަ ގަދަކޮށް ފާހަގަ ކުރަން ނިންމާފައިވާ ކަމަށާއި އީދުގެ ހަރަކާތްތައް އަންނަ މަހުގެ 16 އިން 22 އަށް އައްޑޫގެ 6 ރަށުގައި ކުރިއަށް ގެންދާނެ ކަމަށެވެ.
ތަފްސީލް - އެއްވަނަ އަަށް 15،000ރ ގެ އިނާމު ލިބޭ ގެތައް ޒީނަތްތެރިކޮށް ދިއްލުމުގެ މުބާރާތެއް ކުރިއަށް ގެންދަން ނިންމާފައިވާއިރު، ކޮންމެ ގޭބިސީއެއްގެ ވެސް ދޮރުމައްޗަށްވާ ސަރަހައްދު ރައްޔިތުންނަށް ފެންނާނެހެން، ރާއްޖޭގެ އީދުގެ ސަގާފަތާއި، އިސްލާމީ ވަންތަކަން ރަމްޒުކޮށްދޭ ގޮތަށް ޒީނަތްތެރި ކުރަންޖެހެ އެވެ.
ގެތައް ދިއްލާ ޒީނަތްތެރިކުރުމުގެ މުބާރާތުގެ1 ވަނަ 2 ވަނަ އަދި3 ވަަނަ ހޮވާ ޖުމްލަ30،000ރ ގެ ފައިސާގެ އިނާމު ދޭން ވަނީ ނިންމައިފަ އެވެ.
-
1 ވަނަ އަށް15،000ރ
-
2 ވަނަ އަށް10،000ރ
-
3 ވަނަ އަށް5،000ރ
މި މުބާރާތުގައި ކޮންމެ ގޭބީސީ އަކުން އެކަކަށް ބައިވެރިވެވޭއިރު ޒީނަތްތެރިކޮށްފައިވާ ގޭގެ ފޮޓޯ ލޭންޑްސްކޭޕުކޮށް ނަގާ ގޫގުލް ފޯމެއް މެދުވެރިކޮށް ސިޓީ ކައުންސިލަށް ހުށަހަޅަންޖެހެ އެވެ.
އަައްޑޫ ސިޓީ ކައުންސިލުގެ އިއުލާނުގައި ބުނީ؛
-
ފޮޓޯތައް ސިޓީ ކައުންސިލްގެ ފޭސްބުކް ޕޭޖުގައި ޖޫން18 ވަނަ ދުވަހު އާންމު ކުރާނެ
-
ވަނަތައް ހޮވަނީ ލިބޭ ލައިކް އަދި ހާޓް ރިއެކްޓުތަކަށް ބަލައި އެއަށް%80 މާކްސް އަދި ޖަޖުންގެ ޕެނަލަކުންދޭ %20 އަށް ބަލައިގެން
-
ފޭސްބުކް ރިއެކްޓުތައް ބަލައިގަންނާނީ21 ޖޫން އާއި ހަމައަށް
-
އެންމެ ގިނަ ރިއެކްޓު ލިބޭ10 ފަރާތެއް ހޮވާ ފަނޑިޔާރުންގެ ޕެނަލުން 1 ވަނަ، 2 ވަނަ އަދި 3 ވަނަ ހޮވާނެ
ގެތައް ޒީނަތްތެރިކުތުމުގެ މުބާރާތުގައި ބައިވެރިވުމުގެ އެންމެ ފަހު ދުވަހަކީ 17 ޖޫން ވަނަ ދުވަހުގެ ރޭގެ10 ޖަހާއިރަށެވެ
މުބާރާތުގައި ބައިވެރިވާ ފަރާތްތަކުން ގެތައް ދިއްލާ ޒީނަތްތެރި ކުރެވިފައިވޭތޯ އެއަވަށެއްގެ އަވަށު އޮފީހުން ބަލައި ޔަގީން ކުރާނެ ކަމަށް ވެސް ސިޓީ ކައުންސިލުން ބުންޏެވެ.
ގުޅުންހުރި - ގެތައް ޒީނަތްތެރިކުރުމުގެ މުބާރާތެއްގެ އިތުރުން ސިޓީ ކައުންސިލުން ވަނީ އައްޑުގައި ހުންނަ ސަރުކާރު އޮފީސްތަކާއި އަމިއްލަ ވިޔަފާރި ކުރާ ތަންތަން ޒީނަތްތެރިކުރުމުގެ މުބާރާތެއް ވެސް ކުރިއަށް ގެންދަން ނިންމައިފަ އެވެ.
މުވައްސަސާތަކާއި ވިޔަފާރިތަކަށް ހާއްސަ މުބާރާތަށް ވެސް ފައިސާގެ އިނާމު ހުށަހަޅާފައިވެ އެވެ.
-
1ވަނަ: 10،000ރ
-
2 ވަނަ: 7،500ރ
-
3 ވަނަ: 5،000ރ
ފާހަގަ ކުރެވޭ - ރާއްޖޭ ހުރިހާ ސިޓީއަކާއި އަތޮޅުގެ ވެރިކަން ކުރާ ރަށެއްގަައި ކުލަގަދަކޮށް އީދު ފާހަގަކުރުމަށް ސަރުކާރުގެ ވައުދެކެވެ. އެގޮތުން މިދިޔަ ކުޑަ އީދުގައި މާލެ އާއި އަތޮޅު ވެރިކަން ކުރާ ރަށްތަކާއި ސިޓީތަކުގައި ބޮކި ދިއްލާ ޒީނަތްތެރިކުރި އެވެ.