އޭދަފުށީގައި 1،000 ހައުސިން ޔުނިޓު އަޅަން ޗައިނާ ކުންފުންޏަކަށް ދެނީ

ބ. އޭދަފުށީގައި 1،000 ހައުސިން ޔުނިޓު އަޅަން ޗައިނާ ސަރުކާރު ހިއްސާވާ ކުންފުންޏަކާ އެކު ފަހުމުނާމާއެއްގައި ސޮއިކޮށްފި އެވެ.

ތަފްސީލު - މިއަދު ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގައި ބޭއްވި ރަސްމިއްޔާތެއްގައި އެ މަޝްރޫއު ހިންގަން ފަހުމުނާމާގައި ސޮއިކުރީ ޗައިނާގެ ސަރުކާރު ހިއްސާވާ 'ސިނޯހައިޑްރޯ ކޯޕަރޭޝަން'އާ އެކީގަ އެވެ.

މިނިސްޓްރީގެ ފަރާތުން އެ ފަހުމުނާމާގައި ސޮއިކުރެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެވެ.

ގުޅުން ހުރި ކަމެއް - އޭދަފުށީގައި 1،000 ހައުސިން ޔުނިޓު އެޅުމަށް ފަހުމުނާމާއެއްގައި ސޮއިކޮށްފައި މިވަނީ އެފަދަ މަޝްރޫއެއް ވަރަށް އަވަހަށް ހިންގާނެ ކަމަށް ރައީސް މުހައްމަދު މުއިއްޒު މިދިޔަ އޭޕްރީލް މަހު ވިދާޅުވެފައި ވަނިކޮށެވެ.

ނިމިދިޔަ ރައްޔިތުންގެ މަޖިލިސް އިންތިހާބުގެ ކެމްޕޭންގައި އެ ރަށަށް ވަޑައިގެން ރައީސް ވިދާޅުވީ އޭދަފުށީގައި 1،000 ހައުސިން ޔުނިޓް އަޅަން ބޭނުންވާ ހުއްދަތައް ދީ، އެ މަޝްރޫއު ވަރަށް އަވަހަށް އޭދަފުށީގައި ފައްޓަވާނެ ކަމަށެވެ.

އެ މަޝްރޫއުގެ ފައިދާ އޭދަފުށީގެ އިތުރުން، މުޅި ބ. އަތޮޅަށް ވެސް ކުރާނެ ކަމަށާއި އެއީ އެ ދާއިރާއަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް ހައްލެއް ލިބޭނެ މަޝްރޫއެއް ކަމަށް ވެސް ރައީސް އޭރު ވިދާޅުވި އެވެ.