އޭދަފުށީގައި 1000 ހައުސިން ޔުނިޓުގެ މަޝްރޫއުއެއް ވަރަށް އަވަހަށް ފައްޓާނަން: ރައީސް

ބ. އޭދަފުށީގައި 1000 ހައުސިން ޔުނިޓުގެ މަޝްރޫއުއެއް ވަރަށް އަވަހަށް ފައްޓަވަވާނެ ކަމަށް ރައީސް މުހައްމަދު މުއިއްޒު މިރޭ އިއުލާން ކުރައްވައިފި އެވެ.

ވީ ކިހިނެއް؟ - ރައީސް މިކަން އިއުލާންކުރެއްވީ އޭދަފުށީ ދާއިރާގެ މެމްބަރު ކަމަށް ކުރިމަތިލައްވާފައިވާ، މިހާރުގެ ވެސް އެ ދާއިރާގެ މެމްބަރުކަމުގެ ގޮނޑި ފުރުއްވަމުން ގެންދަވާ އަހްމަދު ސަލީމްގެ ވެބްސައިޓް އިފްތިތާހު ކުރުމަށް މިރޭ ޕީއެންސީ ޖަގަހައިގައި ބޭއްވި ހަފްލާގައި ވާހަކަފުޅު ދައްކަވަމުންނެވެ.

ބުނީ ކީކޭ ؟ - ރައީސް ވިދާޅުވީ އޭދަފުށީގައި 1،000 ހައުސިން ޔުނިޓް އެޅުމަށް ބޭނުންވާ ހުއްދަތައްދީ، އެ މަޝްރޫއު ވަރަށް އަވަހަށް އޭދަފުށީގައި ފައްޓަވާނެ ކަމަށެވެ. އެކަމަކީ މެމްބަރު ސަލީމްގެ އިސްނެންގެވުމުގެ ދަށުން، އެ ރަށުގައި ހިންގުމަށް އޭނާ ކުރެއްވި މަސައްކަތްތަކުގެ ނަތީޖާއެއް ކަމަށް ވެސް ރައީސް ވިދާޅުވި އެވެ.

މި ހައުސިން ޔުނިޓުގެ ފައިދާ އޭދަފުށީގެ އިތުރުން، ބ. އަތޮޅަށް ވެސް ކުރާނެ ކަމަށް ރައީސް ވިދާޅުވި އެވެ. އަދި އެ މަޝްރޫއުގެ ސަބަބުން އެ ދާއިރާއަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް ހައްލެއް ލިިބިގެންދާނެ ކަމަށް ވެސް ރައީސް ވިދާޅުވި އެވެ. ނަމަވެސް މި މަޝްރޫއުގެ އިތުރު ތަފްސީލެއް ނުދެއްވަ އެވެ.