'ގަން-ފޮނަދޫ' މި ދައުރުގައި ސިޓީއަކަށް ވާނެ: ފައިސަލް

ދެކިވަޑައިގަތުމަށް ބޭނުންފުޅުވަނީ 'ގަން-ފޮނަދޫ' ސިޓީ އަކަށް ވެގެންދާތަން ކަމަށާއި ލ. އަތޮޅުގެ ރައްޔިތުން މި ސަރުކާރަށް ތާއީދު ކުރުން މަތީ ދެމިތިބުމަށް ޓޫރިޒަމް މިނިސްޓަރު އިބްރާހިމް ފައިސަލް އިލްތިމާސް ކުރަެއްވައިފަ އެވެ.

ވީ ކިހިނެއް؟ - ނިމިގެން ދިޔަ ރައްޔިތުންގެ މަޖިލީހުގެ އިންތިހާބުގައި ލ. އަތޮޅުން ސަރުކާރަށް ލިބުނު ކާމިޔާބީ ފާހަގަކުރުމަށް އިއްޔެ އެ އަތޮޅު ފޮނަދޫގައި ބޭއްވި ހަރަކާތްތަކުގެ ތެރެއިން ހަވީރު ބޭއްވި ސައިކަލު ބުރަށް ފަހު ވާހަކަ ދައްކަވަމުން މިނިސްޓަރު ފައިސަލް ވިދާޅުވީ ކައުންސިލްތަކުގެ އިންތިހާބު އަންނަ އިރު ގަން-ފޮނަދޫ ސިޓީ އަކަށް ބަދަލުވާނެ ކަމަށެވެ.

"ބުނީ ކީކޭ؟ - "އިރާދަކުރެއްވިއްޔާ ދެން އަންނަ ލޯކަލް ކައުންސިލް އިންތިހާބެއްގައި މިތަނުގައި ބޭއްވޭނީ މޭޔަރު ކަމުގެ އިންތިހާބު. ސިޓީއެއްގެ ދަރަޖަ އަށް މިތަން ބަދަލު ކުރެވި މިތަނުގައި ދެން އަޅުގަނޑުމެން އިންތިހާބު ކުރާނީ ގަން-ފޮނަދޫ ސިޓީގެ މޭޔަރު،" އޭނާ ވިދާޅުވި އެވެ.

ފައިސަލް ވިދާޅުވީ ގަން-ފޮނަދޫ ސިޓީ އަކަށް ބަދަލު ކުރުމަށް ބޭނުންވާ ހުރިހާ ކަމެއް މި ސަރުކާރުގައި ގާއިމް ކުރާނެ ކަމަށެވެ. އެގޮތުން ވިދާޅުވީ

"އިރާދަކުރެއްވިއްޔާ ރާއްޖޭގައި އެންމެ ފުރިހަމައަށް ގާއިމްވެފައި އޮތް ސިޓީ އަށް ގަން-ފޮނަދޫ ވެގެންދާނީ ރައީސް މުއިއްޒުގެ މި ސަރުކާރުގައި." ފައިސަލް ވިދާޅުވި އެވެ.

ފައިސަލް ވިދާޅުވީ ރާއްޖޭގެ ސިޔާސީ ބާރުވެރިކަން މިއަދު ލ. އަތޮޅާއި ހަމައަށް ގޮސްފައިވާ ކަމަށެވެ. އެކަން ލ. އަތޮޅާ ހަމައަށް ގެނެސްދެއްވީ ރައީސް މުއިއްޒު ކަމަށް ވެސް އޭނާ ވިދާޅުވި އެވެ.

ފައިސަލްގެ ބައްޕާފުޅު، ރައީސް މުހައްމަދު މުއިއްޒުގެ އިސް ވަޒީރު އަދި ފޮނަދޫ ދާއިރާގެ އިންތިހާބީ މެންބަރު އަބްދުއްރަހީމް އަބްދުﷲ އަށް އިޝާރާތް ކުރައްވާ ވިދާޅުވީ މިހާރު ވެރިކަން ކުރާ ޕާޓީ، ޕީއެންސީ އަކީ އަބްދުއްރަހީމް ކުރެއްވި ބުރަ މަސައްކަތެއް ކަމަށެވެ.

"...ރާއްޖޭގައި މިއަދު ގާއިމްވެފައި މިއޮތް ޕީއެންސީގެ ސަރުކާރަކީ، މި ޕާޓީ ނިސްބަތްވަނީ މި ލ. އަތޮޅަށް. މިއީ މި ލ. އަތޮޅުގެ ދަރިއަކު ކުރި ވަރަށް ބުރަ މަސައްކަތް.31 އަހަރު ވަންދެން ލ. އަތޮޅުގެ ދަރިޔަކު ރާއްޖޭގެ ސިޔާސީ މައިދާނުގައި ކުރި މަސައްކަތް،" ފައިސަލް ވިދާޅުވި އެވެ.