ރައްޔިތުން މަޖިލީހުގެ އިންތިހާބަށް ފަހު ވޯޓް ގުނުމުގެ މަސައްކަތް މިއަދު ކުރަނީ (ދައުރު ފޮޓޯ/އަނޫފު ޖުނައިދު)
މަޖިލިސް 24: ޕީއެންސީ މަޖިލިހުގެ ބޮޑު މެޖޯރިޓީއަކާ ދިމާލަށް
މާލޭގެ ތިން ގޮނޑި ފިޔަވާ ހުރިހާ ގޮނޑިއެއް ސަރުކާރު ހިންގާ ޕީއެންސީން ނަގައިފި. އެމްޑީޕީއަށް ޒަމާނުއްސުރެ އޮންނަ މާލޭގެ ބޮޑު މެޖޯރިޓީއެއް ހޯދީ ސަރުކާރުން.
ޕީއެންސީ ބޮޑު މެޖޯރިޓީއަކާ ދިމާލަށް
މިއަދު އޮތް ރައްޔިތުންގެ މަޖިލިހުގެ އިންތިހާބުގައި މިހާތަނަށް ލިބުނު ނަތީޖާއަށް ބަލާއިރު ސަރުކާރު ނިސްބަތްވާ ޕީއެންސީއަށް ބޮޑު އަގުލަބިއްޔަތެއް އަންނަނީ ލިބެމުން. 'ދައުރު'ގެ ނަތީޖާއިން ފެންނަނީ މި ވަގުތު65 ދާއިރާއަށް ވުރެ ގިނަ ދާއިރާއިން ޕީއެންސީގެ ކެންޑިޑޭޓުން ކުރީގައި އުޅުއްވާ ތަން.
މިހާރުގެ މަޖިލިހުގައި ބޮޑު އަގުލަބިއްޔަތު ކޮންޓްރޯލް ކުރަމުން އަންނަ އެމްޑީޕީއަށް މި އިންތިހާބަކީ ވަރަށް ބޮޑު ނާކާމިޔާބީއެއް ކަމަށް ބެލެވޭ.
އިންތިހާބުން ފެންނަ އަނެއް މަންޒަރަކީ އެމްޑީޕީ ބައިބައިވެ، ދަ ޑިމޮކްރެޓްސް އުފެއްދުމުގެ ނަތީޖާ ވަރަށް ހިތިކަން. އެގޮތުން އެމްޑީޕީގެ ކުރީގެ އިސް މެމްބަރުންގެ ގޮތުގައި ހިމެނުނު އީވާ އަބްދުﷲ އާއި އަލީ އާޒިމް އަދި އިމްތިޔާޒު ފަހުމީ (އިންތި) ވެސް ވަނީ ކަޓާފައި. މިއީ މިދިއަ ތިން ދައުރުގައި މެމްބަރުކަން ކުރެއްވި ތިން ބޭފުޅުން.
ވޯޓް ގުނުން ކުރިއަށް
ބައެއް ފޮށިތައް ގުނަން ފަށައިފި
މާފަންނުސްޓޭޑިއަމްގައި ހުރި ނޮޅިވަރަމް ދާއިރާ އަދި ހާނިމާދޫ ދާއިރާގެ ވޯޓް ފޮށި މިހާރު ވަނީ ގުނަން ފަށާފައި.
މިއީ އެންމެ މަދުން ވޯޓު ލީ މަޖިލިސް އިންތިހާބު ބާ؟
ދާދި ދެންމެއަކު އިލެކްޝަންސް ކޮމިޝަނުން ނެރުނު ތަފާސްހިސާބަށް ބަލާއިރު މިއީ އާ ގާނޫނުއަސާސީގެ ދަށުން މިހާތަނަށް ބޭއްވި ރައްޔިތުންގެ މަޖިލިހުގެ އިންތިހާބުތަކުގެ ތެރެއިން އެންމެ މަދުން މީހުން ވޯޓު ލީ އިންތިހާބަށް ވުން ކައިރި. ވޯޓު ފޮށިތައް ބަންދުކުރަން ފެށިއިރު ވޯޓު ލީ ނިސްބަތް ހުރީ %72.96ގައި. އަދިވެސް ބައެއް ސެންޓަރުތަކުގައި ކިޔޫ އޮތުމުން އެ އަދަދު މައްޗަށް ދާނެ.
މިފަހަރު ވޯޓުލުމުގެ ހައްގު ލިބިފައިވާ މީހުންގެ އަދަދަަކީ 284،663. މީގެ ތެރެއިން އީސީން ދެންމެ ތަފާސްހިސާބުތައް އާންމުކުރި އިރު ވޯޓު ލާފައި ވަނީ 207،693 މީހުން. ވޯޓު ނުލާ ތިބި މީހުންގެ އަދަދަކީ 76،970.
ކުރީގެ އިންތިހާބުތައް
-
2009: 78.15%
-
2014: 78.80%
-
2019: 81.32%
އިންތިހާބުގައި %72 މީހުން ވޯޓު ލާފައިވޭ
މިއަދު އޮތް ރައްޔިތުންގެ މަޖިލިހުގައި %72 މީހުން ވޯޓުލާފައިވާ ކަމަށް އިލެކްޝަންސް ކޮމިޝަނުން ބުނެފި. ވޯޓު ލާން ނުކުންނަ މީހުންގެ ނިސްބަތަށް ބަލާފައި، މިއަދު މެންދުރު އިލެކްޝަންސް ކޮމިޝަނުން އަންދާޒާކުރީ %70 އަށް ވުރެ ގިނަ މީހުން ވޯޓު ލާނެކަން. މިވަގުތު ވެސް ބައެއް ސެންޓަރުތަކުގައި ކިޔޫ އޮތުމުން %72 އަށް ވުރެ މައްޗަށް ދިއުން އެކަށީގެންވޭ.
މިހާރު ކުރިއަށްދާ ރައްޔިތުންގެ މަޖިލީހުގެ އިންތިޚާބު 2024ގައި 17:00 އާ ހަމައަށް ވޯޓުލާފައިވާ ނިސްބަތް #vihi24 pic.twitter.com/WcXeUBLWm9
— Elections Commission (@ElectionsMv) April 21, 2024
ވޯޓު ލާން ކަނޑައަޅާފައިވާ ގަޑި 5:30ގައި ހަމަވުމާ އެކު ސެންޓަރުތަކުގައި މިހާރު ވަނީ ކިޔޫ ބަންދުކޮށްފައި. އޭގެ މާނައަކީ މިހާރު ވޯޓު ލާން އިތުރު އެއްވެސް ބަޔަކަށް ނުދެވޭނެކަން. ގަޑި ޖެހުމުގެ ކުރިން ކިޔޫއަށް އަރާފައި ހުރި މީހަކަށް ވިއްޔާ ވޯޓު ލުމުގެ ފުރުސަތު ދޭނެ.
ކުރިއަށް އޮތް ފަސް އަހަރު ރާއްޖޭގެ މުޅި ސިޔާސީ މަސްރަހު ބައްޓަންވުން ބިނާވާނެ އާ ރައްޔިތުންގެ މަޖިލިހަށް މެމްބަރުން އިންތިހާބުކުރަން މިއަދު މުޅި ރާއްޖޭގައި ބާއްވާ އިންތިހާބުގައި ބައެއް ފޮށިތައް ބަންދުކޮށްފި. ވޯޓު ލާން އިލެކްޝަންސް ކޮމިޝަނުން ކަނޑައަޅާފައި އޮތީ ހެނދުނު 8:00 އިން ހަވީރު 5:30އަށް.
ބައެއް ސެންޓަރުތަކުގައި ކިޔޫ ދިގުވެއްޖެ
ވޯޓުލުން ނިމެން 10 މިނިޓަށް ވީ އިރު މާލޭގެ ބައެއް ސެންޓަރުތަކުގެ ކިޔޫ ވަނީ ދިގުވެފައި. އެގޮތުން މާފަންނު ސްޓޭޑިއަމްގައި ހަދާފައި ހުރި ސެންޓަރުގައި ގިނަ އަދަދެއްގެ ބަޔަކު ވޯޓު ލާން ގޮސް އެބަ ތިބި. އެ ސެންޓަރުގައި 20 ވޯޓު ފޮށި ވަނީ ބަހައްޓާފައި. ވޯޓުލުން ނިންމަން ހަމަޖައްސާފައި ވަނީ 5:30 ގައި.
ހަވީރު 4 ޖެހުމާ ހަމައަށް ވޯޓްލާފައި ވަނީ %63.73 މީހުން. އެއީ ވޯޓްލުމުގެ ހައްގު ލިބިގެންވާ 284،663 މީހުންގެ ތެރެއިން 181،406 މީހުން. އެހެން ކަމުން އަދިވެސް %36 މީހުން ވޯޓްނުލާ ކަމަށް ތަފާސްހިސާބުތަކުން
މިހާތަނަށް ވޯޓުލާފައިވަނީ:
އަންހެން: 88،230
ފިރިހެން:93،176
'އިންތިހާބާ ދިމާކޮށް ސަރުކާރުން ވަނީ ވޯޓަށް ނުފޫޒު ފޯރުވާފައ'
ކުރީގެ ރައީސް އަބްދުﷲ ޔާމީން ވޯޓުލެއްވުމަށްފަހު މީޑިއާތަކާ ބައްދަލުކުރައްވާ ވާހަކަދައްކަވަމުން ވިދާޅުވީ، ޑިމޮކްރަސީގައި ވޯޓުލާންވާނީ އެއްވެސް މަޖުބޫރު ކަމެއްނެތި އެމީހަކު ބޭނުންވާ މީހަކަށް ކަމަށް. އެކަމަކު މިހާރު އެކަން ހިނގަނީ އެހެން ނޫންކަން ފާހަގަކުރައްވާ އިންތިހާބާ ދިމާކޮށް ސަރުކާރުން ވޯޓަށް ނުފޫޒުފޯރުވަން ގިނަ ކަންތައްތަކެއް ކުރާ ކަމަށް ތުހުމަތުކުރެއްވި.
އެހެން ނަމަވެސް، ރައީސް ޔާމީންގެ ވެރިކަމުގައި ވެސް އެފަދަ ކަންކަން ހިނގާފައިވޭ އަދި އެ ތުހުމަތުތައް ވަރަށް ބޮޑަށް ކުރި.
ދެބައިކުޅައެއްބައި މީހުން ވޯޓްލައިފި
މިއަދު 3 ޖެހުމާ ހަމައަށް %56.26 މީހުން ވޯޓްލާފައިވާ ކަމަށް އިލެކްޝަންސް ކޮމިޝަނުން ދާދި ދެންމެއަކު ބުނެފި. އަދިވެސް %43.74 މީހުން ވޯޓް ނުލާ އެބަތިބި.
ޔާމީން ވޯޓް ލައްވައިފި
ކުރީގެ ރައީސް އަބްދުﷲ ޔާމީން ދާދި ދެންމެއަކު ވޯޓްލައްވައިފި. އެމަނިކުފާނު ވޯޓް ލެއްވީ އަހުމަދިއްޔާ ސްކޫލްގައި ހުރި ފޮއްޓަށް.
މިހާތަނަށް 3 މީހަކު ފުލުހުން ހައްޔަރުކޮށްފި
ރައްޔިތުން މަޖިލީހުގެ އިންތިހާބުގައި ހިނގި އެކި ކަންކަމާ ވިދިގެން މިހާތަނަށް ޖުމުލަ 3 މީހަކު ފުލުހުން ހައްޔަރުކޮށްފައިވާ ކަމަށް ފުލުހުން ބުނެފި އެވެ. އެއީ:
-
އެއީ ވޯޓް ކަރުދާސް ދެއްކި މައްސަލައަކާ ގުޅިގެން މާލެއިން އެކަކު
-
ވޯޓުލާ މަރުކަޒުގެ މަސްލަހަތު ނަގާލައި ވޯޓުލުމަށް ހުރަސްއެޅި މައްސަލައަކާ ގުޅިގެން ގދ. ފިޔޯރީއިން ދެ މީހަކު
ވޯޓްކިޔު ބަންދުވާނީ 5:30ގައި
ވޯޓްލާން ދެން ބާކީ އޮތީ 2ގަޑިއިރު. ވޯޓް ކިޔުތައް ބަންދުވާނީ ހަވީރު 5:30ގައި.
މަޖިލިސް އިންތިހާބު 24ގެ ވޯޓްލުން
އިންތިހާބުގެ ވޯޓުލުން ކުރިއަށް
1 ޖެހުމާ ހަމައަށް %60 މީހުން ވޯޓެއް ނުލާ
މެންދުރު 1 ޖެހުމާ ހަމައަށް ވޯޓްލާފައި ވަނީ %39.92 މީހުން. އެއީ ވޯޓްލުމުގެ ހައްގު ލިބިގެންވާ 284،663 މީހުންގެ ތެރެއިން 113،627 މީހުން. އެހެން ކަމުން އަދިވެސް %60 މީހުން ވޯޓްނުލާ ކަމަށް ތަފާސްހިސާބުތަކުން ދައްކާ. އީސީން ވަނީ މިއަދު ހަވީރު 5:30ގެ ކުރިން ވޯޓްލުމަށް ނިކުމެ ކިޔުގައި ޖެހުމަށް އާންމުންނަށް އިލްތިމާސްކޮށްފައި. ވަގުތު އިތުރުނުކުރާނެ ކަމަށް އީސީން ބުނޭ.
މިހާރު ޓްރެންޑް ހުރި ގޮތުން، 4 ގަޑިއިރާ ބައިގެ ތެރޭގައި ވޯޓްލާން ނިކުންނާނެ ކަމަށް ބެލެވެނީ %75 މީހުން. އާންމުކޮށް ދިވެހިން ވޯޓްލާން ނިކުންނަނީ މެންދުރުފަހު ކަމަށްވުމުން އިތުރުވުން ވެސް އެކަށީގެންވޭ.
12 ޖެހުމާ ހަމައަށް ވޯޓްލީ %32.75 މީހުން
މަޖިލީހުގެ އިންތިބާހުގައި 12 ޖެހުމާ ހަމައަށް ވޯޓްލާފައި ވަނީ ވޯޓްލުމުގެ ހައްގު ލިބިގެންވާ މީހުންގެ ތެރެއިން %32.75. އެއީ 93،224 މީހުން.
މަޖިލިސް 24 އިންތިހާބު އޮބްޒާވް ކުރުމުގައި ބޭރުގެ އޮބްޒާވަރުން އަންނަނީ ހަރަކާތްތެރިވަމުން.
ގަދަ ހޫނުގައި ވޯޓްލުން ކުރިއަށް
3 ގަޑިއިރުން ވޯޓްލީ %24 މީހުން
ހެނދުނު 11 ޖެހުމާ ހަމައަށް ވޯޓްލާފައި ވަނީ ވޯޓްލުމުގެ ހައްގު ލިބިފައިވާ މީހުންގެ ތެރެއިން %24.92 މީހުން.
މައުމޫން ވޯޓްލައްވައިފި
ކުރީގެ ރައީސް މައުމޫން އަބްދުލްގައްޔޫމް ވެސް ދާދި ދެންމެއަކު ވޯޓްލައްވައިފި.
ފުލުހުންްގެ އޮޕަރޭޝަން ކޮމިޝަނަރު ކައިރިން ބައްލަވަނީ
ފުލުހުން ދާދި ދެންމެއަކު އެކްސްގައި ކުރި ޕޯސްޓެއްގައި ބުނީ ޕޮލިސް ކޮމިޝަނަރު އަލީ ޝުޖާއު ގެންދަވަނީ އިންތިހާބާ ގުޅިގެން ފުލުހުން ހިންގާ އޮޕަރޭޝަން ކައިރިން ބައްލަވަމުން ކަމަށް. ފުލުހުންގެ މި އޮޕަރޭޝަންގެ ނަމަކީ އޮޕަރޭޝަން ބްލޫ ޓައިޑް.
ނަޝީދު ވޯޓްލައްވައިފި
ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވެސް ވަނީ އިންތިހާބުގައި ވޯޓު ލައްވާފައި. އިސްކަންދަރު ސްކޫލުގައި ހުރި ގަލޮޅު އުތުރު ދާއިރާގެ ފޮއްޓަށް ވޯޓު ލެއްވުމަށް ފަހު ނަޝީދު ވަނީ މަޖިލިސް އިންތިހާބުގައި ވީހާ ވެސް ގިނަ ބަޔަކު ވޯޓު ލާނެ ކަމަށް އުންމީދު ކުރައްވާކަމަށް ވިދާޅުވެފައި.
މި ހަރަކާތުގައި ހުރިހާ ބޭފުޅުން ވެސް ބައިވެރިވެ ވަޑައިގަންނަވާ. ދައުލަތުގެ މުހިއްމު އެއް ބާރު އުފެއްދުމުގައި ވޯޓު ނަގާ ދުވަސް މިއީ
10 ޖެހުމާ ހަމައަށް ވޯޓްލީ %16 މީހުން
އީސީން ދާދި ދެންމެއަކު ހާމަކުރި ގޮތުގައި މިއަދު ހެނދުނު 10 ޖެހުމާ ހަމައަށް ވޯޓްލާފައި ވަނީ ވޯޓްލުމުގެ ހައްގު ލިބިގެންވާ 284،663 މީހުންގެ ތެރެއިން %16.61 މީހުން. އެއީ 47،296 މީހުން.
ރައީސް ސޯލިހު ވޯޓްދެއްވުން
ވޯޓު ލުމުގެ ހައްގުގެ ބޭނުން ފުރިހަމައަށް އަދާކުރައްވާ: ސޯލިހު
ޖަމާލުއްދީނު ސްކޫލުގައި ހުރި ޅ. އަތޮޅުގެ ފޮއްޓަކަށް ވޯޓުލެއްވުމަށް ފަހު ކުރީގެ ރައީސް ސޯލިހު ވަނީ ވޯޓު ލުމުގެ ހައްގުގެ ބޭނުން އެންމެ ފުރިހަމައަށް އަދާކުރަން އިލްތިމާސް ކުރައްވާފައި.
"ވޯޓު ލުމުގެ ހައްގަކީ ރައްޔިތުންނަށް ލިބޭ ވަރަށް ބޮޑު ހައްގެއް. އެ ހައްގުގެ ބޭނުން ހިފުމަކީ ގައުމުގެ މަސްލަހަތަށް ވަރަށް މުހިންމު ކަމެއް،" ވޯޓު ލެއްވުމަށް ފަހު މީޑިއާއާ ވާހަކަފުޅު ދައްކަވަމުން ސޯލިހު ވިދާޅުވި.
މަޖިލިހުގެ ތާރީހުން މެމްބަރުންގެ މުސާރަ
މަތީގައި އެވާ ޗާޓުން އެ ފެންނަނީ ރައްޔިތުންގެ މަޖިލިހުގެ މެމްބަރުންގެ މުސާރައަށް އައި ބަދަލުތައް. އެންމެ ކުރިން ލިބެން ހުރި މައުލޫމާތުތަކުން އެނގޭ ގޮތުގައި 1980ގެ އަހަރުތަކުގެ ކުރީކޮޅު މަޖިލިހުގެ މެމްބަރަކަށް ލިބިވަޑައިގަންނަވަނީ 260ރ. އެއީ ފުލްޓައިމް ވަޒީފާއަކަށް ވުރެ ބޮޑަށް ޕާޓްޓައިމް ޒިންމާއެއްގެ ގޮތުގައި މަޖިލިހުގެ މަސައްކަތް އޮތް ދުވަސްވަރު. މެމްބަރުންގެ މުސާރަ 1990ގެ އަަހަރުތަކުގެ ކުރީކޮޅު 2،200ރ އަށް ބޮޑުކުރި. ދެން 2000ގެ އަހަރުތަކަށް އެޅެން އުޅެނިކޮށް 4،700ރ އަށް ބޮޑުކުރި. އެންމެ ބޮޑު ކުރިއެރުމެއް އައީ އާ ޑިމޮކްރަސީއަށް ބަދަލުވުމުގެ މަސައްކަތް ފެށި ދުވަސްވަރު ކަމަށްވާ 2006ގައި. މިހާރު މުސާރަ އާއި އެލަވަންސްގެ ގޮތުގައި ޖުމްލަ 82،000ރ ލިބިވަޑައިގަންނަވާ.
ޒުވާނުން އަދި ފެންނަލެއް މަދު
މިއަދު ކުރިއަށްދާ ރައްޔިތުންގެ މަޖިލިހުގެ އިންތިހާބުގައި އަލަށް 500-600އާ ދެމެދުގެ އަދަދެއްގެ ޒުވާނުންނަށް ވޯޓު ލެވޭނެ ކަމަށް، ކުރިން އިލެކްޝަންސް ކޮމިޝަނުން އޮތީ ބުނެފައި. އެއީ 17 މާޗު އާއި 21 އެޕްރީލްއާ ދެމެދު 18 އަހަރު ފުރޭ ކުދިންގެ އަދަދު. ކުރިން އިންތިހާބު ބާއްވަން އޮތީ 17 މާޗުގައި. އެކަމަކު ރޯދަމަހު އެއްވެސް އިންތިހާބެއް ނުބޭއްވޭ ގޮތަށް ގާނޫނަށް ބަދަލު ގެނައުމުން 21 އެޕްރީލަށް ފަސްކުރީ. މާލޭގެ ވޯޓު ސެންޓަރުތަކުން ޒުވާނުން އަދި މާ ގިނައިން ނުފެންނަ ކަމަށް 'ދައުރު'ގެ ރިޕޯޓަރުން ބުނޭ.
"އަދި މި ފެންނަނީ ކެންޑިޑޭޓުންގެ ކެމްޕޭނުގައި ބޮޑަށް އުޅޭ ޒުވާނުން ކަމަށް ލަފާކުރެވެނީ. އަނެއްހެން ވޯޓު ލާން އަދިއެއް ނާދޭ އަލަށް ވޯޓު ލާ ކުދިންނަށް ބެލެވޭ ކަހަލަ ކުދިންނެއް،" އެއް ރިޕޯޓަރަކު ބުންޏެވެ.
އާންމު ގޮތެއްގައި ގިނަ މީހުން ވޯޓު ލާން ނުކުންނަނީ މެންދުރު ފަހު. އެހެންކަމުން ހަވީރު އަތަށް ޖަހާލީމާ ޒުވާނުން ވެސް ގިނައިން ފެނުން އެކަށީގެންވޭ.
ވީހާވެސް އަވަހަށް ވޯޓުލައްވާ: ފުއާދު
މިއަދު ކުރިއަށްދާ މަޖިލިސް އިންތިހާބާ ގުޅިގެން ދެންމެ ޕީއެސްއެމްއަށް އިލެކްޝަންސް ކޮމިޝަނުގެ ރައީސް ފުވާދު ތައުފީގު ދެއްވި އިންޓަވިއުއެއްގައި ވިދާޅުވީ، ވޯޓުލުމަކީ ވަރަށް މުހިންމު ޒިންމާއެއް ކަމަށާއި އެއީ ގައުމީ ވާޖިބެއް ކަމަށެވެ. އަދި ވޯޓުލާތަން ޔަގީންކުރެއްވުމަށް ފަހު ވީހާ ވެސް އަވަހަށް ވޯޓުލައްވަން ވަޑައިގެންނެވުމަށް އޭނާ އިލްތިމާސްކުރެއްވި.
"އެމީހެއްގެ ފަރާތުން އެމީހަކު ދެކޭގޮތުގައި އެމީހެއްގެ އަޑު މަޖިލިސްގެ ތަޅުމުގައި އުފުލަން އެންމެ އެކަށީގެންވާ، މިކަމަށް އެންމެ ގާބިލު ކަމަށް ދެކިވަޑައިގަންނަވާ މީހަކަށް ވޯޓު ލެއްވީމާ ހުންނާނީ ރަނގަަޅަށް. އެއްގޮތަކަށް ވެސް މީހަކު ދޭ ފައިސާއެއްގައި ނުވަތަ ހަދިޔާއެއްގައި ނުހިއްޕެވުމަކީ ވަރަށް މުހިންމު ކަމެއް. އެއީ މިއަދު ކޮންމެ މީހަކީ ވެސް މިނިވަނެއްގެ ގޮތުގައި ހުރެގެން ވޯޓުލެއްވުމަކީ ހަމަ ވަރަށް މުހިންމު ކަމެއް. އެހެންވީމާ ވޯޓުލެއްވުމުގެ ވާޖިބު އަދާކުރައްވާށޭ އަޅުގަނޑު ދަންނަވާނީ،" ފުވާދު ވިދާޅުވި އެވެ.
ވޯޓްލުން ކުރިއަށްދާއިރު ވަރަށް ހޫނު ގަދަ. މިއަދުގެ ހޫނުމިން މާލެއަށް ހުރީ 32 ޑިގްރީ ސެލްސިއަސްގައި. އިހުސާސްކުރެވޭ ފިނިހޫނުމިން ހުރީ 39 ޑިގްރީ ސެލްސިއަސްގައި.
ފޮޓޯ - ވޯޓްލުން ކުރިއަށް ދަނީ
ހުރިހާ ފޮއްޓެއްގައި ވޯޓްލާން މިހާރު ފެށިއްޖެ
މީގެ އިރުކޮޅެއް ކުރިން އީސީން ބުނީ ރާއްޖޭގެ ހުރިހާ މަރުކަޒެއްގައި ވޯޓްލުން މިހާރު ފެށިފައިވާ ކަމަށް.
%96 ފޮށީގައި ވަގުތަށް ވޯޓްލާން ފެށުނު
އިލެކްޝަންސް ކޮމިޝަންގެ މެންބަރު ހަޒަން ޒަކަރިއްޔާ މީގެ އިރުކޮޅެއް ކުރިން ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ %96 ފޮށީގައި ވަގުތަށް ވޯޓުލުން ފެށުނު ކަމަށް. އެއީ 578 ފޮއްޓެއް. އަދި ހެނދުނު 9ޖަހާއިރު ހުރިހާ ފޮއްޓެއްގައި ވޯޓްލުން ފެށޭނޭ ކަމަށް ވިދާޅުވި.
ކޮންމެހެން ހަވީރުވަންދެން މަޑު ނުކުރައްވާ ހަމަ އެ ބޭފުޅަކު ވޯޓުލައްވަން ޖެހޭ މަރުކަޒަކަށް ވަޑައިގެން ވޯޓު ލެއްވުމަކީ އެބޭފުޅެއްގެ ހައްގެއް އަދި ޒިންމާ އެއް
ވޯޓްލުން ކުރިއަށް ދަނީ މިއަދު ހެނދުނު 8އިން ހަވީރު 5އަށް.
ރައީސް މުއިއްޒު ވޯޓްދެއްވަނީ
ރައީސްގެ އިލްތިމާސް: ވޯޓްލާން އަވަހަށް ނިކުންނަވާ
ތާޖުއްދީން ސްކޫލް ހޯލްގައި ހުރި ވޯޓް ފޮއްޓަށް ވޯޓްލުމަށް ފަހު ރައީސް މުއިއްޒު މީޑިއާތަކަށް އިލްތިމާސްކުރެއްވީ ހުރިހާ ރައްޔިތުން ވެސް ނިކުމެ ވީހާ ވެސް އަވަހަކަށް ވޯޓުލައި އެ މީހުންގެ ޒިންމާ އަދާކޮށްދެއްވުމަށް.
މަޖިލިހުގެ ތާރީހަށް ބަލައިލުމެއް
ރާއްޖޭގައި ފުރަތަމަ ފަހަރަށް 1932ގައި ރައްޔިތުންގެ މަޖިލިހެއް އުފެއްދި ފަހުން ވަރަށް ދިގު މުއްދަތެއް ދިޔައީ ވަކި އަދަދަކަށް މެމްބަރުން ކަނޑައަޅައި، ކޮންމެ އިންތިހާބެއްގައި އިތުރުނުވާ ގޮތަށް. އެކަން ބަދަލުވީ 2008ގެ އާ ގާނޫނުއަސާސީގައި ދާއިރާތައް ގިނަކޮށް، އަދި އާބާދީ އިތުރުވާ ނިސްބަތުން މެމްބަރުން ވެސް އިތުރުކުރެވޭ ގޮތަށް ކަނޑައެޅުމުން. އޭގެ ކުރިން އޮތީ 50 މެމްބަރުންގެ މަޖިލިހެއް. އެއީ ކޮންމެ އަތޮޅަކާއި މާލެއަށް ވެސް ދެ ގޮނޑި އަދި ރައީސުލްޖުމްހޫރިއްޔާ އަައްޔަންކުރައްވާ އަށް މެމްބަރުންގެ މައްޗަށް. މަތީގައި އޮތް ޗާޓުން ރާއްޖޭގެ ރައްޔިތުންގެ މަޖިލިހަށް އައި ބަދަލު ފެންނާނެ.
ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުން ތަކެއްޗާއެކު ވޯޓުލާ މަރުކަޒުތަކަށް ފޮނުވުމުގެ މަސައްކަތުގެ ތެރެއިން #vihi24 pic.twitter.com/SQh5nVixCU
— Elections Commission (@ElectionsMv) April 21, 2024
އިލެކްޝަންސް ކޮމިޝަންގެ މައި މަރުކަޒު، ދަރުބާރުގެއިން މާލޭ އެކި ސެންޓަރުތަކަށް ވޯޓާ ބެހޭ ސާމާނު ފޮނުވަނީ
ހުރިހާ މަރުކަޒެއްގައި ކަންކަން ހުރީ އިންތިޒާމްވެފައި: ކޮމިޝަން
ކުރިއަށް އޮތް ފަސް އަހަރަށް އިންތިހާބުކުރާ ރައްޔިތުންގެ މަޖިލިހުގެ އިންތިހާބުގައި ވޯޓު ލާން ފަށައިފި. ހުރިހާ ސެންޓަރެއްގައި ވޯޓު ކަރުދާސް އާންމުންގެ އަތަށް އަދި ނޭރިޔަސް، ރާއްޖޭގެ އެކި ހިސާބުތަކުގައި މިހާރު އަންނަނީ ވޯޓު ލަމުން. އިލެކްޝަންސް ކޮމިޝަނުން 'އެކްސް'ގައި ކުރި ޕޯސްޓެއްގައި ބުނީ 8:00 ޖަހާއިރަށް ވޯޓު ލާން ފެށޭ ވަރަށް ހުރިހާ ސެންޓަރެއްގައި ވެސް އިންތިޒާމްތައް ހަމަޖެހިފައި ހުރި ކަމަށް.
މިއަދު ވޯޓު ލުމުގެ ހައްގު 284،663 މީހުންނަށް ލިބޭ
މިއީ ތާރީހުގައި ވެސް އެންމެ ގިނަ ގޮނޑި ހިމެނޭ އިންތިހާބު
މިއީ ރާއްޖޭގެ ތާރީހުގައި ވެސް އެންމެ ގިނަ ގޮނޑިއަށް ވާދަކުރާ އިންތިހާބު. މިހާރާގެ ރައްޔިތުންގެ މަޖިލިހުގައި 87 މެމްބަރުން ހިމެނޭ އިރު މިއަދުގެ އިންތިހާބުގައި 93 ގޮނޑިއަށް މެމްބަރުން އިންތިހާބުކުރާނެ. މިހާ ބޮޑު ބަދަލެއް އަންނަނީ ކޮންމެ 5،000 މީހަކަށް މަޖިލިހުގައި ގޮނޑިއެއް ހާއްސަކުރަން ޖެހޭ ގޮތަށް ގާނޫނު އޮތުމުން.
މިއީ އަނެއްކާވެސް ރާއްޖޭގެ ސިޔާސީ ދާއިރާގައި ބޮޑު، ވަރުގަދަ ދުވަހެކެވެ. ފަސް އަހަރުން އެއް ފަހަރު އޮންނަ ރައްޔިތުންގެ މަޖިލިހުގެ އިންތިހާބަށް މުޅި ރާއްޖެ މި އޮތީ ތައްޔާރުވެ، ވޯޓު ފޮށިތައް ދޮށަށް ދާން ނިޔަތްގަނެގެންނެވެ.
ރައީސް މުހައްމަދު މުއިއްޒު އާއި އެމަނިކުފާނުގެ ސަޕޯޓަރުންނަށް މިއީ ރާއްޖޭގެ ތަރައްގީގެ ދުވެލި ބާރުކުރަން ރައްޔިތުންނަށް ލިބޭ ފުރުސަތެކެވެ. އެއާ ހިލާފަށް އިދިކޮޅު ފަރާތްތަކުން ކެމްޕޭން ނިންމާލީ މިއީ ޑިމޮކްރަސީ ސަލާމަތްކުރަން ރައްޔިތުންނަށް ލިބޭ ފުރުސަތެއް ކަމަށް ބުނަމުންނެވެ.
ރައްޔިތުންގެ މަޖިލިހުގެ ކެމްޕޭން، މިދިއަ ރޯދަމަހު ވެސް، ކުރިއަށް ދިޔައީ ވަރަށް ފޯރީގަ އެވެ. މިއީ ރޯދަމަހަކާ ދިމާކޮށް މިހާ ބޮޑު އިންތިހާބެއްގެ ކެމްޕޭންގެ ހަރަކާތްތައް ރާއްޖޭގައި ފެނުނު ފުރަތަމަ ފަހަރެވެ.
ވޯޓު ލާން ފަށާނީ 8:00 ޖަހާއިރު އެވެ. ނިންމަން ކަނޑައަޅާފައި އޮތީ ހަވީރު5:30 ގަ އެވެ.
ކޮމެންޓް