މާލޭ ބޮޑުތަކުރުފާނު މަގުގައި ފެންބޮޑުވެ ސިފައިން ފެންހިއްކުމުގެ މަސައްކަތުގައި (ފޮޓޯ/އެމްއެންޑީއެފް)
ވިއްސާރައިގައި ގެއްލުންވި 5 ގެއެއްގެ މީހުންނަށް ވަގުތީ ބޯހިޔާވަހިކަން ދެނީ
އިއްޔެ މާލެއަށް ކުރި ގަދަ ވިއްސާރައިގައި ބޯކޮށް ވާރޭވެހި ފެންބޮޑުވުމުގެ ސަބަބުން ގެއްލުން ލިބުނު ބައެއް ގެތަކުގެ މީހުންނަށް ވަގުތީ ބޯހިޔާވަހިކަން ދިނުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ނިންމައިފި އެވެ.
ވީ ކިހިނެއް؟ - އިއްޔެ މެންދުރު ގުގުރުމާ އެކު ބޯކޮށް ވާރޭވެހި މާލޭގެ ބައެއް ސަރަހައްދުތައް ފެންބޮޑުވި އެވެ. އެއާ އެކު މަގުތަކުން ފެން ހިންދުމުގެ މަސައްކަތް ކުރީ ސިފައިން ނުކުމެގެންނެވެ.
ތަފްސީލު - އެންޑީއެމްއޭއިން ބުނީ އިއްޔެގެ ވިއްސާރައާ ގުޅިގެން ހެދި ރެޕިޑް އެސެސްމަންޓުން:
-
ދިރިއުޅެން ދަތި ނުވަ ގެއެއް ފާހަގަވި
-
އޭގެ ތެރެއިން ފަސް ގެއެއްގައި ދިރިއުޅޭ 34 މީހުން ބަދަލުކުރުމަށް ވަގުތީ ބޯހިޔާވަހިކަން ދަނީ ހަމަޖައްސަމުން؛ އެއީ ކެއިންބުއިމާ ވެސް އެކުގައި
-
އެ ފަސް ތަނުގައި ދިރިއުޅެން ދަތިވާ ވަރަށް ފެން ބޮޑުވެ، ފާހާނާ ކުރުމަށް ބުރޫ އަރައި، ނަޖިސް ވަނީ ލީކުވެފައި
ވަގުތީބޯހިޔާވަހިކަމާއެކު ކެއިންބުއިންވެސް ހަމަޖައްސައިދެވޭނެ، އަދި މާދަމާއަކީ ސްކޫލްތަކުގެ އިމްތިހާން ވެސް ފެށޭ ދުވަހެއް ކަމުން ސްކޫލް ދަރިވަރުންނަށްވެސް ކަންކަން ފަސޭހަވާނެ ގޮތަށް އިންތިޒާމްތައް މިދަނީ ހަމަޖައްސަމުން، މިހާތަނަށް 73 ތަނެއްގައި 495 ވެލިބަސްތާ ވަނީ ޖެހިފަ
— NDMA Maldives (@NDMAmv) April 13, 2024
ފާހަގަކޮށްލެވޭ ކަމެއް - އިއްޔެގެ ވިއްސާރައާ ގުޅިގެން އެމްއެންޑީއެފްއިން ފެން ހިންދުމުގެ މަސައްކަތް ކުރީ މާލޭގެ އަށް ސަރަހައްދެއްގައި 14 ޕަންޕު ޖައްސައިގެންނެވެ. އޭގެ ތެރޭގައި އައިޖީއެމްއެޗް، އެސްޓީއޯ ފުށް ގުދަން، ދިރާގު އޮފީސް، ވެސްޓް ޕާކް، ޖެލީ ޕިއްޒާ، ދަރުބާރުގެ، ފުޑްކޯޓް ސަރަހައްދު ހިމެނެ އެވެ.
ކޮމެންޓް