ރަސްދޫގައި އަނިޔާ ލިބުނު ކުއްޖާއަށް އެ ރަށު ޒުވާނުންގެ ހާއްސަ ހަދިޔާއެއް

އއ. ރަސްދޫ މިސްކިތުގެ ފާހާނާ ތެރޭގައި ކުޑަކުއްޖަކަށް އަނިޔާކޮށް ބުލީކުރި މައްސަލައިގައި އަނިޔާ ލިބުނު 12 އަހަރުގެ ކުއްޖާއަށް، އެ ރަށުގެ ޒުވާނުން ހަދިޔާ ދީފި އެވެ.

ވީ ކިހިނެއް؟- މިދިޔަ ބުރާސްފަތި ދުވަހުގެ ރޭ ކުޑަކުއްޖާ މިސްކިތުގައި ތަރާވީސް ނަމާދަށް ހުއްޓައި އެ ކުއްޖާ ގަދަކަމުން ފާހާނާ ތެރެއަށް ގެންގޮސް އަނިޔާކޮށްފައިވަނީ 13 އަހަރާއި 14 އަހަރުގެ ދެ ފިރިހެން ކުދިންނެވެ. އެ މައްސަލަ ސީރިއަސް މައްސަލައެއްގެ ގޮތުގައި ފުލުހުން މިހާރު ދަނީ ބަލަމުންނެވެ.

ކުޑަކުދިންނަށް ކުރާ އަނިޔާ އާއި ބުލީއާ ދެކޮޅުކަން ހާމަކުރުމުގެ ގޮތުން ރަސްދޫގެ އާރަސް ބޮޑުބެރު ގުރޫޕުން އިއްޔެ ވަނީ ކުޑަކުއްޖާއަށް ޒިޔާރަތްކޮށް، ގިނަ ހަދިޔާތަކެއް ދީފަ އެވެ. މި ގުރޫޕުގައި މުޅިން ވެސް ހިމެނެނީ ކުޑަކުދިންނާއި ޒުވާނުންނެވެ.

އެނގުން މުހިއްމު- ކުޑަކުއްޖާއަށް އަނިޔާކުރި 14 އަހަރުގެ ފިރިހެން ކުއްޖާއަކީ، އެ ބޮޑުބެރު ގުރޫޕުގެ މެމްބަރެކެވެ. އަނިޔާކުރާ ވީޑިއޯ އާއްމުވުމާ އެކު އެ ގުރޫޕުން ވަނީ ވަގުތުން އޭނާ ވަކިކޮށްފަ އެވެ.

އާރަސް ބޮޑުބެރު ގުރޫޕުން ބުނިގޮތުގައި ބުލީ އާއި އަނިޔާއާ އެ ގުރޫޕުން ދެކޮޅު ހަދާއިރު، އެކަމުން ސަލާމަތްކޮށްދިނުމަށް، ޒުވާނުންގެ ހައިސިއްޔަތުން ކުރެވެން ހުރިހާ ކަމެއް ކުރާނެ އެވެ. އަދި އެފަދަ އަނިޔާ ލިބިފައިވާ ކުދިން، އެކަމުން އަރައިގަންނަން މަސައްކަތް ކޮށްދޭނެ ކަމަށް ވެސް ބުންޏެވެ.

ކުޑަކުއްޖާއަށް އަނިޔާ ކުރާ ވީޑިއޯ އާއްމުވުމާ އެކު، ރަސްދޫގެ ގިނަ އަދަދެއްގެ ޒުވާނުން ހިމެނޭ ގޮތަށް، ކުށްވެރިވާ ކުދިންގެ ގޭދޮށަށް ގޮސް ވަނީ އަޑުއުފުލައިފަ އެވެ.