ޑިމޮކްރެޓްސްގެ މަޖިލިސް ކެމްޕޭނަށް ނަޝީދު ރާއްޖެ ވަޑައިގަންނަވަނީ

ކުރިއަށް އޮތް ރައްޔިތުންގެ މަޖިލީހުގައި ވާދަކުރާ ދަ ޑިމޮކްރެޓްސްގެ ކެމްޕޭންގައި ބައިވެރިވެވަޑައިގަންނަވަން ކުރީގެ ރައީސް މުހައްމަދު ނަޝީދު ރާއްޖެ ވަޑައިގަންނަވަން ހަމަޖެހިއްޖެ އެވެ.

ވީ ކިހިނެއް؟ - މިއަދު ދަ ޑިމޮކްރެޓްސްއިން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ މާފަންނު މެދު ދާއިރާގެ މަޖިލިސް މެމްބަރު އިބްރާހިމް ރަޝީދު ވިދާޅުވީ ޑިމޮކްރެޓްސްގެ ކުރިއަށް އޮތް ކެމްޕޭން ބައްދަލުވުންތަކުގައި ނަޝީދު ބައިވެރިވެވަޑައިގަންނަވާނެ ކަމަށެވެ.

ބުނީ ކީކޭ؟ - އެކަމާ ގުޅޭ ގޮތުން 'ދައުރު'އާ ވާހަކަދައްކަވަމުން އިބްރާހިމް ރަޝީދު މިރޭ ވިދާޅުވީ ކެމްޕޭންގައި ބައިވެރިވެވަޑައިގަންނަވަން ނަޝީދު ރާއްޖެ ވަޑައިގަންނަވާނީ މި މަހުގެ 19ގައި ކަމަށެވެ. ދެން އެނބުރި ވަޑައިގަންނަވާނީ އިންތިހާބު ނިމުމުން ކަމަށް ވެސް އޭނާ ވިދާޅުވި އެވެ.

އިބްރާހިމް ރަޝީދު ވިދާޅުވި ގޮތުން ޑިމޮކްރެޓްސްގެ ކުރިއަށް އޮތް ތިން ކެމްޕޭން ޖަލްސާއެއްގައި ނަޝީދު ބައިވެރިވެވަޑައިގަންނަވާނެ އެވެ. އެއީ:

އެނގުން މުހިންމު - ރައްޔިތުންގެ މަޖިލީހުގެ ރައީސްކަން ވެސް ކުރައްވާފައިވާ، މައްޗަންގޮޅީ މެދު ދާއިރާގެ މެމްބަރު ނަޝީދު ވަގުތީ ގޮތުން ސިޔާސީ ދާއިރާއާ ދުރަށް ޖެހިވަޑައިގެންނެވިކަން އިއުލާން ކުރެއްވީ މިދިޔަ ޑިސެމްބަރުމަހު އެވެ.

އޭގެ ސަބަބެއް ކަމަށް އެމަނިކުފާނު ވިދާޅުވެފައިވަނީ ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކްރެޓަރީ ޖެނެރަލްގެ މަގާމު ލިބިވަޑައިގަތުމެވެ. އެ މަގާމު އަދާކުރައްވަން ނަޝީދު މިހާރު ދިރިއުޅުއްވަނީ ގާނާގަ އެވެ.