ކުޑަކުދިން ކުށްކުރުމުގެ މައްސަލަތައް ހައްލުކުރަން ވަޒީރުންގެ ޓާސްކްފޯސްއެއް

ރޭ އއ. ރަސްދޫގައި ކުޑަކުއްޖަކަށް ގަނާކޮށް އަނިޔާކުރާ ވީޑިއޯއެއް ފެންމަތިވި މައްސަލައާ ގުޅިގެން މުޖުތަމައުގެ ތެރޭގައި ކުޑަކުދިންގެ ތެރޭގައި ގަނާ ކުރުމާއި އަނިޔާ ކުރުމުގެ މައްސަލަތައް ތަކުރާރުވިޔަ ނުދިނުމަށް ޓަކައި ރައީސް މުހައްމަދު މުއިއްޒު ހާއްސަ ޓާސްކްފޯސްއެއް އެކުލަވާލައްވައިފި އެވެ.

ވީ ކިހިނެއް؟ - ރޭ ސޯޝަލް މީޑިއާގައި ދައުރުވާން ފެށި ވީޑިއޯގައި ފެންނަނީ ކުޑަކުދިންތަކެއް އެމީހުންނަށް ވުރެ އުމުރުން ހަގު ކުއްޖަކަށް ގަނާކޮށް އަނިޔާކުރާ މަންޒަރެވެ. އެކަމާ ގުޅިގެން ކުޑަކުދިން ކުރާ މިފަދަ ކުށްތަކާ މެދު އެކަށީގެންވާ ފިޔަވަޅު ނޭޅޭ ކަމުގެ ކަންބޮޑުވުން ގިނަ ބަޔަކު ދަނީ ފާޅުކުރަމުންނެވެ. 

ބުނީ ކީކޭ؟ - މިފަދަ ހާދިސާތައް ތަކުރާރުވިޔަ ނުދިނުމަށް ޓަކައި ވަޒީރުންގެ ހާއްސަ ޓާސްކްފޯސްއެއް އެކުލަވާލާފައިވާކަން އިއުލާނުކުރެއްވީ މިރޭ ބޭއްވި ނޫސްވެރިންގެ ބައްދަލުވުމެއްގައި އެޓާނީ ޖެނެރަލް އަހުމަދު އުޝާމް އެވެ.

"ރޭގައި މި ދިމާވި ހިތާމަވެރި ހާދިސާއާ ގުޅިގެން ރައީސުލްޖުމްހޫރިއްޔާ ވަނީ މިކަންކަން ބަލައި މިކަންކަން ތަކުރާރުވިޔަ ނުދިނުމަށް ޓަކައި ސަރުކާރުގެ ވަޒީރުން އެކުލެވޭ ޓާސްކްފޯސްއެއް އެކުލަވާލާފައި،" އުޝާމް ވިދާޅުވި އެވެ.

އޭނާ ވިދާޅުވީ ޓާސްކްފޯސްގެ ބެލުމުގެ ދަށުން މަސައްކަތްތައް ކުރިއަށް ދާއިރު ގާނޫނީ ގޮތުން ކުރަންޖެހޭ ކަންކަން އެޓާނީ ޖެނެރަލްގެ އޮފީހުން ވެސް ކުރަމުން އަންނަ ކަމަށެވެ.

ތަފްސީލް - ގާނޫނުއަސާސީގެ ދަށުން ދައުލަތުން ކުޑަކުދިންނަށް ރައްކާތެރިކަމާއި އެހީތެރިކަން ފޯރުކޮށްދޭން ޖެހޭކަން ފާހަގަކުރައްވައި އުޝާމް ވިދާޅުވީ:

ކުށުގެ ވެށިން ފުލުހުންގެ ބެލުމުގެ ދަށަށް ގެންދެވޭ ކުޑަކުދިންނަށް ފަރުވާ ދިނުމަށް ފަހު އެކުދިން ހަމަ މަގަށް އަޅުވާ އަލުން މުޖުތަމައުއަށް ނެރުމަށް ޓަކައި ކުރީ ސަރުކާރުން ދ. ކުޑަހުވަދޫގައި ރިހެބިލިޓޭޝަން ސެންޓަރެއް ގާއިމްކުރި އެވެ. ނަމަވެސް ވެރިކަން ބަދަލުވި އިރު ވެސް އެ ސެންޓަރުން ހިދުމަތް ދޭން ފަށާފައެއް ނުވެ އެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކުޑަކުދިންގެ އަދުލުގެ ގާނޫނުގެ ދަށުން ގާއިމްކުރަން ޖެހޭ ރިހެބިލިޓޭޝަން ސެންޓަރުތައް މިހާތަނަށް ގާއިމްކުރެވިފައި ނުވުމުގެ ކަންބޮޑުވުން ހޯމްލޭންޑް ސެކިއުރިޓީ މިިނިސްޓަރު އަލީ އިހުސާން ވެސް ފާހަގަކުރެއްވި އެވެ. އޭނާ ވިދާޅުވި ގޮތުގައި:

އެހެންކަމުން އިހުސާން ވިދާޅުވީ ސަރުކާރުން މިހާރު ނިންމާފައިވަނީ ހއ. ހޯރަފުށީގައި ހުރި ސެންޓަރުގައި ކުޑަކުދިން ރިހެބިލިޓޭޓް ކުރުމުގެ މަސައްކަތް ފަށަން ކަމަށެވެ. 

"އަޅުގަނޑުމެން އިރާދަކުރެއްވިއްޔާ މި ފެށޭ ހަފްތާގައި އެތަން ހުޅުވާނަން. ހުޅުވާފައި މިހާރު އެޓް-ރިސްކުގައި ތިބި އެންމެ ބޮޑަށް އަޅުގަނޑުމެންނަށް ޕްރައޮރިޓީއަށް ލެވޭ އެތަނުގެ މެކްސިމަމް ކެޕޭސިޓީއަށް ނެގޭނެ ކުދިން އަޅުގަނޑުމެން އެތަނަށް ނަގައިގެން އަޅުގަނޑުމެން ރިހެބިލިޓޭޝަން ފަށާނަން." އިހުސާން ވިދާޅުވި އެވެ.

އޭނާ އިތުރަށް ފާހަގަކުރެއްވި ގޮތުގައި:

"އަޅުގަނޑުމެން ތިޔަ ބޭފުޅުންނަށް ދޭނެ ޔަގީންކަމަކީ މިކަމަށް ޖުމްލަ ހައްލެއް މި ސަރުކާރުގެ ތެރޭގައި ގެނެސްދޭނަމޭ،" މިނިސްޓަރު ވިދާޅުވި އެވެ.