ރައްޔިތުންގެ މަޖިލީހުގެ ޖަލްސާއެއްގެ ތެރެއިން ޕީޕިއެމްގެ ޕާލިމަންޓްރީ ގްރޫޕުގެ ލީޑަރު، އޭދަފުށި ދާއިރާގެ މެންބަރު އަހްމަދު ސަލީމް (ރެޑްވޭވް ސަލީމް). (ފޮޓޯ/ މަޖިލިސް)
ރައީސް މަސައްކަތް ކުރައްވަނީ އިދިކޮޅުގެ އެއްވެސް މީހަކު ވެސް ފަލީހަތް ނުކޮށްވޭތޯ: ސަލީމް
އިދިކޮޅުގެ އެއްވެސް މީހަކު ވެސް ފަލީހަތް ނުކޮށްވޭތޯ ރައީސް މުހައްމަދު މުއިއްޒު މަސައްކަތް ކުރައްވާ ކަމަށާއި ނަމަވެސް އެ މީހުން ފަތުރާ ދޮގު ވާހަކަތަކާ ގުޅިގެން އެކަން ކުރައްވަންޖެހެނީ ކަމަށް ޕީޕީއެމްގެ ޕީޖީ ލީޑަރު، އަދި އޭދަފުށީ ދާއިރާގެ މެމްބަރު އަހްމަދު ސަލީމް މިރޭ ވިދާޅުވެއްޖެ އެވެ.
ވީ ކިހިނެއް؟ - ސަލީމް މިހެން ވިދާޅުވީ އޭނާގެ ވެބްސައިޓް އިފްތިތާހުކުރުމަށް މިރޭ ޕީއެންސީ ޖަގަހައިގައި ބޭއްވި ހަފްލާގައި ވާހަކަ ދައްކަވަމުންނެވެ. ރައީސްއަށް ވަރަށް ބޮޑަށް ތައުރީފު ކުރައްވައި ސަލީމް ވާހަކަ ދެއްކެވި އެވެ.
ބުނީ ކީކޭ؟ - ސަލީމް ވިދާޅުވީ މިދިޔަ ސަރުކާރުން ކަންކަން ކޮށްފައިވަނީ ރާވައިގެން ކަމަށާއި އެފަދައިން ކޮށްފައިވާ ކަންކަމުގެ ތަފްސީލުތައް، ތަފްސީލުކޮށް ހާމަކޮށްދިނުމަށް ސަރުކާރާ ޕީއެންސީން ހަވާލުވުމަށް ފަހު އޭނާ ރައީސް އަރިއަހު އެދިވަޑައިގަތް ކަމަށެވެ.
އެކަމަކު މީހުން ފަލީހަތް ކުރެއްވުމުގެ ވިސްނުންފުޅު ރައީސް ނުގެންގުޅުއްވާތީ، އެހާ އަވަހަށް އެކަންކަން ހާމަނުކުރަން ރައީސް ނިންމެވީ ކަމަށް ސަލީމް ވިދާޅުވި އެވެ. ނަމަވެސް ކުރީގެ ސަރުކާރުން އެކަންކަން މި ސަރުކާރުގެ ބޮލުގައި އަޅުވަން ފަށާފައިވާކަން ފާހަގަކުރައްވައި، ސަލީމް ވިދާޅުވީ އެކަމުގެ ތެދުދޮގު އަދި ކަން އޮތް ގޮތް ރައީސް ހާމަކުރަންވަން ފެއްޓެވީ އެހާ ހިސާބުން ކަމަށެވެ.
"މީހުން ފަލީހަތް ނުކުރުމަށް އެމަނިކުފާނު [ރައީސް މުއިއްޒު]ގެ ވިސްނުން ހުރީ. އެމަނިކުފާނަކީ އިލްމުވެރިއެއްގެ ދަރިއެއް، އަނބިކަނބަލުންނަކީ އަޅުގަނޑުމެންގެ މެޑަމްއަކީ އިލްމުވެރިއެއްގެ ދަރިކަނބަލެއް. އެބޭފުޅުން މަސައްކަތްޕުޅު ކުރެއްވީ ވީހާ ވެސް ބޮޑަށް މީހުން ފަލީހަތް ނުކޮށް މިކަން ކުރިއަށް ގެންދެވޭތޯ،" ސަލީމް ވިދާޅުވި އެވެ.
އެއަށް ފަހު ސަލީމް ވަނީ އެކަމަކީ މާތްﷲ ވެސް ނުރުއްސަވާ ސިފައެއް ކަމަށާއި ރަސޫލު ބޭކަލުންގެ ހަޔާތްޕުޅުން ފެނިވަޑައިގެންފައި ވަނީ އެފަދަ މިސާލުތައް ކަމަށެވެ. ނަމަވެސް ވަކި ހާލަތަކަށް ކަންކަން ދިއުމުން އަނިޔާވެރިންގެ ކަންކަން ބޭޒާރު ކުރައްވާނެކަން މާތްﷲ ވަހީކުރައްވާފައިވާކަން ވެސް އޭނާ ފާހަގަކުރެއްވި އެވެ.
ސަލީމް އިތުރަށް ވިދާޅުވީ ކުރީގެ ސަރުކާރުން ހިންގާފައިވާ ކަންކަން ރައީސް މިހާރު ހާމަކުރައްވާފައިވާ ކަންކަމަށް ވުރެ ވެސް އިތުރު ކަމަށެވެ. އެމްޑީޕީއަށް ރިޔާސީ އިންތިހާބުގައި ނާކާމިޔާބުލިބި ވެރިކަން ބަދަލުވުމާ އެކު ފެށީ ދޮގު ވާހަކަތައް ފަތުރައި ސަރުކާރަށް ޖެއްސުންކޮށް، ސަރުކާރު ވައްޓާލަން ކަމަށް ވެސް ސަލީމް ތުހުމަތުކުރެއްވި އެވެ.
އެކަން ނުވީ އެ ފުރުސަތު މަޖިލީހުގެ ތެރެއިން ސަރުކާރުގެ މެމްބަރުން ނުދެއްވުމުން ކަމަށް ސަލީމް ވިދާޅުވި އެވެ. އަދި ކުރިއަށް އޮތްތަނުގައި ވެސް ސަރުކާރުގެ ޓިކެޓުގައި މަޖިލީހަށް ވަޑައިގަންނަވާ ބޭފުޅުން ރައީސް މުއިއްޒުއަށް "ހަރާން ކޯރު ވެގެން ނުވާނެ" ކަމަށް ވެސް އޭނާ ވިދާޅުވި އެވެ.
އޭނާ ހުންނެވީ ރައީސްއާ އެކު ކަމަށާއިި މަޖިލީހަށް މެޖޯރިޓީ ހޯދުމަށް އަދި ސަރުކާރު ދެމެހެއްޓުމަށް ކުރަން ޖެހޭ ހުރިހާ ކަމެއް ކުރައްވާނެ ކަމަށް ވެސް ވިދާޅުވި އެވެ.
ކޮމެންޓް (4)
ވިސްނާ
ސައްލޫ
އޭދަފުށި ދަރިއެއް
ސަސަސ