މުނި އެންޓަޕްރައިސަސްއިން އިމާރާތްކުރި މަސްޖިދް ހަސަން އާދަމް: މިއީ ހުޅުމާލޭ ދެވަނަ ފޭސްގައި ދިރިއުޅޭ މީހުންނަށް ލިބޭނެ އިތުރު ފަސޭހަައެއް (ފޮޓޯ/އިސް
ހުޅުމާލޭ ފޭސް 2 ގައި ރީތި މިސްކިތެއް، ހުޅުވުން ހުކުރުދުވަހު
ހުޅުމާލޭ ފޭސް ދޭއްގައި އަނެއްކާވެސް ރީތި، ޒަމާނީ މިސްކިތެއް އިމާރާތްކޮށް ހުޅުވަން ތައްޔާރުވެއްޖެ އެވެ.
ވީ ކިހިނެއް؟ - ހުޅުމާލޭގެ އިރުމަތީ ފަރާތު ބޮޑު މަގަށް ވާ ގޮތަށް ހިޔާ ފްލެޓަށް ވުރެ ދެކުނުގައި ދެ ބުރިއަށް ހަދާފައިވާ މި މިސްކިތަކީ ރާއްޖޭގައި ފުޅާ ދާއިރާއެއްގައި ގެދޮރުގެ ސާމާނު ވިއްކާ މުނި ހޯމްކެއާގެ ވެރިފަރާތް، މުނި އެންޓަޕްރައިސަސްގެ ހަދިޔާއެކެވެ.
ތަފްސީލް - އިސްލާމިކް އެފެއާޒް މިނިސްޓްރީން މިއަދު ބުނީ އަންނަ ހުކުރުދުވަހު މަސްޖިދް ހަސަން އާދަމް ހުޅުވާނެ ކަމަށެވެ.
މި މިސްކިތާ ބެހޭ ގޮތުން ހާމަކުރި ބައެއް މައުލޫމާތުތަކުން އެނގޭ ގޮތުގައި؛
-
މިސްކިތުގައި އެއްފަހަރާ 1،500 މީހުންނަށް ނަމާދުކުރެވޭނެ
-
ނަމާދުކުރާ ބައިގެ ބޮޑުމިން: 16،388 އަކަފޫޓު
-
މުޅި މިސްކިތުގެ ބޮޑުމިން: 19،341 އަކަފޫޓު
ހުޅުމާލޭ ފޭސް ދޭއްގައި 2021ގައި ފުރަތަމަ ހުޅުވީ ވެސް އަމިއްލަ ފަރާތަކުން އިމާރާތްކުރި މިސްކިތެކެވެ. މަސްޖިދުލް އަމީލް ޖަލީލް ނިސްބަތްވަނީ 1990ގެ އަހަރުތަކުގެ މެދުތެރޭގައި އަވަހާރަވި އަމީލްއަށެވެ. މިސްކިތް ބިނާކުރީ އޭނާގެ އާއިލާއިންނެވެ.
މިހާރު 30،000އަށް ވުރެ ގިނަ މީހުން ދިރިއުޅެމުން އަންނަ ހުޅުމާލޭ ދެވަނަ ފޭސްއަށް އާބާދީގެ ނިސްބަތުން އަދިވެސް މިސްކިތްތައް މަދެވެ. ދެ ފަރާތަކުން ހަދިޔާކުރި ދެ މިސްކިތުގެ އިތުރުން ހިޔާ ފްލެޓްތަައް ކައިރީގައި ވަގުތީ ދެ މިސްކިތް މިވަގުތު އެބަ ހުއްޓެވެ.
