ޑރ. އަފްޒަލްގެ އާދޭސް: މާސްކް އެޅުން ދޫކޮށް ނުލާ

ކޮވިޑް ފެތުރުން ކޮންޓްރޯލް ކުރުމަށް އެޅޭނެ އެންމެ މުހިންމު ފިޔަވަޅަކީ މާސްކު އެޅުން ކަމަށާއި މާސްކު އެޅުން އަދިވެސް ހުއްޓާނުލައި ކުރިއަށް ގެންދިއުމަށް އެޗްޕީއޭގެ އެޕިޑަމިއޮލޮޖިސްޓު ޑރ. އިބްރާހިމް އަފްޒަލް މިއަދު އިލްތިމާސްކުރައްވައިފި އެވެ.

އެންގުން މުހިންމު - ކޮވިޑްގެ ކޭސްތައް އިތުރުވުމާ އެކު، މިދިޔަ ފެބްރުއަރީ 7 އިން ފެށިގެން ރާއްޖޭގެ ހުރިހާ ރަށެށްގައި މާސްކު އެޅުން ވަނީ މަޖުބޫރުކޮށްފަ އެވެ. އޭގެ ކުރިން ވެސް، ކޮވިޑް އެންމެ ބޮޑަށް ފެތުރެމުންދިޔަ މާލޭގައި މަސްކު ނާޅާ އުޅުމަކީ މަނާކަމެވެ. މާސްކް ނާޅާ ނަމަ 1،000ރ. އިން ޖޫރިމަނާ ކުރެ އެވެ.

ކޮވިޑް  ކޭސްތައް މަދުވެ، ކުރިން އެޅި ހަރުކަށި ފިޔަވަޅުތަކަށް ލުއި ދިނުމާ އެކު މިހާރު ކޮންމެވެސް ވަރަކަށް ބައެއް މީހުން މާސްކު އެޅުމުގެ އާދަ ވަނީ ދޫކޮށްލާފަ އެވެ.

ވީ ކިހިނެއް؟ - އެޗްޕީއޭ އިން މިއަދު ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ކަންބޮޑުވުން ފާޅުކުރެއްވީ ރާއްޖޭގައި ކޮވިޑުގެ ކޭސްތައް އަދިވެސް ފެންނަމުން ދާ އިރު، ބައެއް މީހުން މާސްކު ނާޅާތީ އެވެ.

"ވަރަށް މުހިންމު ކަމެއް، ބޭރު ތެރޭ އުޅޭ ހުރިހާ ވަގުތެއްގައި ވެސް މާސްކު އެޅުން. މާސްކު އެޅުމަކީ، މި ބަލިން ރައްކާތެރިވުމަށް އެޅޭ އެންމެ ބޮޑު އެއް ފިޔަވަޅު. އެކަން އަދިވެސް ދޫކޮށްލާ ހިސާބަކަށް އަޅުގަނޑުމެންގެ ހާލަތު އަދި ނުދޭ. އެހެންވީމަ އަދިވެސް މާސްކު އެޅުން މުހިންމު،" ހެލްތް މިނިސްޓްރީގައި މިއަދު މެންދުރުފަހު ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވި އެވެ.

"އަޅުގަނޑުމެންގެ އިރުޝާދަކީ، މާސްކު އަޅާށޭ. އަދި އަޅާއިރުވެސް ރަނގަޅަށް އަަޅާށޭ."

އަންނަ މަހު ސްކޫލްތައް ބަންދުވާނެ އެވެ. އެއާ އެކު، ކޮންމެ ސްކޫލު ބަންދަކާ ދިމާކޮށް ވެސް ކުރާ ގޮތަށް، ގިނަ ބަޔަކު އެކި ތަންތަނަށް ދަތުރު ކުރާނެ އެވެ. އެހެންވެ އަފްޒަލް މިއަދު ދެއްވި ނަސޭހަތަކީ، ވީހާ ވެސް ބޮޑަށް ބަލިން ރައްކާތެރިވެގެން ތިބުމަށެވެ.

"ވީހާ ވެސް ބޮޑަށް [ބޭރަށް ނުނިކުމެ] ނޫނީ ކޮންމެހެން ދާން ޖެހިންގެން ނޫނީ ބޭރުގައި ނޫޅުމާއި މީހުން އެއްވާ ތަންތަނަށް ވެސް ދާ ނަމަ، ވީހާ ވެސް ބޮޑަށް ގައިދުރުކަން ބެހެއްޓުން މުހިންމު،" އޭނާ ވިދާޅުވި އެވެ.