ތެލެސީމިއާ ހޮސްޕިޓަލަށް 100 މިލިއަން ދީފި ނަމަ އުރީދޫގެ ޓެކްސް ކުޑަކޮށްދޭން މަޝްވަރާކޮށްފި

ތެލެސީމިއާ ހޮސްޕިޓަލެއް އަޅަން 100 މިލިއަން ރުފިޔާ އާއި އެޑްވާންސް ޓެކުހުގެ ގޮތުގައި 200 މިލިއަން ރުފިޔާ އެއްފަހަރާ ސަރުކާރަށް ދެއްކުމުން އުރީދޫއިން ދައުލަތަށް ދައްކާ ޓެކްސް ކުޑަކުރަން އިކޮނޮމިކް ކައުންސިލުގައި މަޝްވަރާކޮށްފި އެވެ.

ވީ ކިހިނެއް؟ - މިއަދު ރައީސް އޮފީހުން ބޭއްްވި ނޫސްވެރިންގެ ބައްދަލުވުމުގައި އެ އޮފީހުގެ މިނިސްޓަރު މުހައްމަދު ނާޒިމް ވިދާޅުވީ މިއީ ކެބިނެޓަށް ނުގެނެވި، ހަމައެކަނި އިކޮނޮމިކް ކައުންސިލްގައި މަޝްވަރާކޮށްފައިވާ ކަމެއް ކަމަށެވެ.

ބުނީ ކީކޭ؟ - "2005 ވަނަ އަހަރު އުރީދޫއަށް ޓެލެކޮމިއުނިކޭޝަން ލައިސެންސް ދޫކުރީ ލައިސެންސް ފީގެ ގޮތުގައި އެ ކުންފުނީގެ އާމްދަނީގެ ފަސް އިންސައްތަ ދެއްކުމުގެ އިތުރުން ރާއްޖޭގެ އައިޓީސީ ދާއިރާ ކުރިއެރުވުމަށްޓަކައި ކުންފުނީގެ އާމްދަނީގެ އެއް ޕަސެންޓު ހިމެނޭ ގޮތަށް ދައުލަތަށް ޖުމްލަ ހަ ޕަސެންޓު ދައްކާ ގޮތަށް ހަމަޖެހިފައިވާތީ އެކަމާ މަޝްވަރާ ކުރެވި، ދެ ކުންފުނިން [ދިރާގާއި އުރީދޫ] ވެސް ދައުލަތަށް ދައްކާ ނިސްބަތް ފަސް އިންސައްތައަށް ހަމަޖެއްސުން،" ނާޒިމް ވިދާޅުވި އެވެ.

"މި ދެންނެވި ގޮތަށް ކަންކަން ކުރަނީ އެޑްވާންސް ޓެކްސްއެއްގެ ގޮތުގައި އުރީދޫއިން ޓެކްސް ލައިސެންސް ފީގެ ގޮތުގައި މިހާރު ސަރުކާރަށް ދައްކާފައިވާ 100 މިލިއަން ރުފިޔާގެ ބަދަލުގައި 200 މިލިއަން ރުފިޔާއަށް އިތުރުކޮށް، އެއް ފަހަރާ [އެ ފައިސާ] ސަރުކާރަށް ދެއްކުމާ އެކު، ތެލެސީމިއާ ހޮސްޕިޓަލެއް އެޅުމަށް 100 މިލިއަން ރުފިޔާގެ އެހީއެއް އުރީދޫއިން ދިނުމަށް އެއްބަސްވާ ވަގުތަށް."

އެނގުން މުހިންމު - ތެލެސީމިއާ ބައްޔަށް ހާއްސަކޮށްގެން މާލޭގައި އާ ހޮސްޕިޓަލެއް ހަދަން ސަރުކާރުން ނިންމައި އެކަން އިއުލާންކުރީ 10 ޑިސެމްބަރު 2023ގައި ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގަ އެވެ.

އެކަމަށް ހަރަދުވާނީ ގާތްގަނޑަކަށް ކިހާ އަދަދެއްގެ ފައިސާތޯ 'ދައުރު'ން އެ ދުވަހު ސުވާލުކުރުމުން އެ އޮފީހުގެ އަންޑަ ސެކެޓްރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ހަލީލު ވިދާޅުވީ 25 މިލިއަން ޑޮލަރު (385 މިލިއަން ރުފިޔާ) އެކަމަށް ހަރަދުވާނެ ކަމަށް ލަފާ ކުރެވޭ ކަމަށެވެ.