ގދ. ތިނަދޫ (ކ) އާއި ކާޑެއްދޫ.
ތިނަދޫ-ކާޑެއްދޫ ބްރިޖުގެ ފީސިބިލިޓީ ދިރާސާ ހަދައިދޭނެ ބަޔަކު ހޯދަނީ
ގދ. ތިނަދޫ އާއި އެ އަތޮޅު ކާޑެއްދޫ ބްރިޖަކުން ގުޅުވާލާ މަޝްރޫއުގެ ކޮންސަލްޓެންސީ މަސައްކަތް ކުރާނެ ފަރާތެއް ހޯދަން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން މިއަދު އިއުލާންކޮށްފި އެވެ.
ވީ ކިހިނެއް؟ - ކާޑެއްދޫ އެއާޕޯޓް ބައިނަލްއަގްވާމީ ވައިގެ ބަނދަރަކަށް ބަދަލުކޮށް، ތިނަދުއާ ބުރިޖަކުން ގުޅުވާލުމަކީ ރައީސް މުހައްމަދު މުއިއްޒުގެ ވައުދެކެވެ.
އަންނަ އަހަރަށް ފާސްކުރި ދައުލަތުގެ ބަޖެޓުގައި މި މަޝްރޫއަށް 4.4 މިލިއަން ރުފިޔާ ވަނީ ކަނޑައަޅާފަ އެވެ.
ތަފްސީލު - އިންފްރާސްޓްރަކްޗާ މިނިސްޓްރީން މިއަދު އިއުލާނު ކުރީ ތިނަދޫ-ކާޑެއްދޫ ލިންކު މަޝްރޫއުގެ ޕްރެލިމިނަރީ ދިރާސާތަކާއި އެސެސްމަންޓުތަކާއި ފީސިބިލިޓީ ސްޓަޑީގެ ކޮންސަލްޓެންސީ މަސައްކަތް ކޮށްދޭނެ ފަރާތެއް ހޯދުމަށެވެ.
މި މަސައްކަތާ ގުޅޭ ޓާމްސް އޮފް ރިފަރެންސްގައިވާ ގޮތުން:
-
މި މަޝްރޫއުގެ މައިގަނޑު މަގްސަދަކީ ތިނަދޫ އާއި ކާޑެއްދޫއާ ދެމެދު މިހާރަށް ވުރެ ރައްކާތެރި ގޮތަކަށް ދަތުރު ކުރެވޭނެ ގޮތެއް ހަމަޖައްސައިދީ، އެއް ރަށުން އަނެއް ރަށަށް މީހުންނާއި މުދާ ގެންދިއުމަށް ހޭދަވާ ވަގުތު ކުޑަކުރުން
-
ތިނަދު އާއި ކާޑެއްދުއާ ދެމެދު އަޅާ ބްރިޖުގެ ދިގުމިނަށް ލަފާކޮށްފައިވަނީ 3-3.5 ކިލޯމީޓަރު
-
ބްރިޖުގެ އިތުރަށް ހައިވޭ ލިންކް ރޯޑެއް ހިމަނަން ޖެހިދާނެ
-
ކޮންސަލްޓެންސީ މަސައްކަތަށް ދޭނީ ސޮއިކުރާ ތާރީހުން ފެށިގެން 45 ދުވަސް
އެނގުން މުހިންމު - ޝައުގުވެރިކަން ފާޅުކޮށް، އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ސުންގަޑިއަކީ މި މަހުގެ 31 ވާ ބުރާސްފަތި ދުވަހުގެ މެންދުރު 12 އެވެ.
މިކަމަށް ކުރިމަތިލާ ފަރާތްތައް އިވެލުއޭޓް ކުރުމުގައި ބަލާނެ މައިގަނޑު ކަންތައްތަކަކީ:
-
މަދުވެގެން 10 އަހަރުދުވަހުގެ މަސައްކަތުގެ ތަޖުރިބާ ލިބިފައިވުން
-
މަސައްކަތާ ގުޅޭ ދާއިރާއިން މަދުވެގެން ހަތް އަހަރުގެ ތަޖުރިބާ ލިބިފައިވުން