ތެޔޮ ސްޓޯރޭޖު މާގިރި ފަޅަށް ބަދަލުކުރަން ނިންމައިފި

މާލެ އަތޮޅު ފުނަދޫގައި ގާއިމުކޮށްފައިވާ ތެޔޮ ސްޓޯރޭޖު ކ. މާގިރި ފަޅަށް ބަދަލުކުރަން ސަރުކާރުން ނިންމައިފި އެވެ.

ވީ ކިހިނެއް؟ - މިކަން ހާމަކުރީ، މިއަދު ބޭއްވި ކެބިނެޓު ބައްދަލުވުމުގައި ނިންމި ކަންކަން ހާމަކުރުމަށް މިހާރު ރައީސް އޮފީހުގައި ކުރިއަށްގެންދާ ނޫސްވެރިންގެ ބައްދަލުވުމުގައި އެ އޮފީހުގެ މިނިސްޓަރު އަބްދުﷲ ނާޒިމް އެވެ.

އޭނާ ވިދާޅުވި ގޮތުގައި، ތެޔޮ ސްޓޯރޭޖު، ކ. ކަނޑުއޮއްގިރި ކައިރީގައި އޮންނަ މާގިރި ފަޅަށް ބަދަލުކުރުމުގެ ކަންކަން އެސްޓީއޯއިން ކުރަން ވަޒީރުންގެ މަަޖިލީހުން ނިންމާފައިވާ ކަމަށެވެ.

ނަމަވެސް، މިކަމާ ގުޅޭ އިތުރު ތަފްސީލެއް މިއަދުގެ ނޫސްވެރިންގެ ބައްދަލުވުމުގައި ނާޒިމް ނުދެއްވަ އެވެ.

ގުޅުން ހުރި ކަމެއް - ފުނަދޫގައި ތެޔޮ ރައްކާކުރުން ހުއްޓާލައި އެ ރަށް އިގްތިސޯދީ ހަބަކަށް ބަދަލު ކުރަން ނިންމާފައިވާކަން، ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ ދެ ވަނަ ފިޔަވަހި އިފްތިތާހު ކުރުމަށް މި މަހުގެ 4 ވަނަ ދުވަހުގެ ރޭ ދަރުބާރުގޭގައި ބޭއްވި ރަސްމިއްޔާތުގައި ރައީސް މުހައްމަދު މުއިއްޒު ވަނީ އިއުލާންކުރައްވާފަ އެވެ. ފުނަދުއަށް ގެންނަން ނިންމާފައިވާ އިގްތިސޯދީ ބޮޑު ބަދަލު އެ ރޭ ދައްކާލާފައިވެ އެވެ.

ރައީސް މުއިއްޒު އެ ރޭ ވިދާޅުވެފައިވާ ގޮތުން:

ފަސްމަންޒަރު - ފުނަދޫ އަކީ އެސްޓީއޯ އިން ރާއްޖެއަށް އެތެރެކުރާ ތެޔޮ ރައްކާކުރަން ބޭނުންކުރާ މައި ރަށެވެ. ނަމަވެސް، މާލެ އާއި އެއާޕޯޓާ އެހާ ކައިރި ތަނެއްގައި ތެޔޮ ފަދަ ނުރައްކާތެރި އެއްޗެއް ރައްކާކުރާތީ ކުރިމަތިވެދާނެ ހާދިސާއެއްގެ އިންޒާރު އެކި ފަރާތްތަކުން ދެ އެވެ.

ފުނަދޫގައި ތެޔޮ ރައްކާކުރުން ހުއްޓާލަން އެކި ސަރުކާރުތަކުން މަސައްކަތް ކުރިޔަސް، މިހާތަނަށް އައި އިރު ވެސް އެކަން އޮތީ ނުވެ އެވެ.

ފުނަދޫގައި ތެޔޮ ރައްކާކުރުން ހުއްޓާލައި އެ ރަށް ކޮންވެންޝަން ޓޫރިޒަމަށް ހާއްސަކުރުމަކީ، މިދިޔަ ރިޔާސީ އިންތިހާބުގެ ތެރޭގައި އޭރުގެ ރައީސް އިބްރާހިމް މުހައްމަދު ސޯލިހު ވެސް ވެވަޑައިގެންނެވި ވައުދެކެވެ.