އަލީ ރަމީޒުގެ 'ތިޔައޭ ރަސޫލަކީ' މަދަހަ އަލުން ނެރުމުން ވެސް އާއްމުންގެ ބޮޑު ލޯތްބެއް

އަލީ ރަމީޒުގެ މަޝްހޫރު މަދަހަ، 'ތިޔައޭ ރަސޫލަކީ'ގެ އާ ރެކޯޑިންއަށް ގިނަ ބައެއްގެ ލޯތްބާއި ތައުރީފް ބަންޑުންކޮށްލައިފި އެވެ.

ވީ ކިހިނެއް؟- ކުރީގެ މަޝްހޫރު ލަވަކިޔުންތެރިޔާ، އޭނާގެ ފޭސްބުކް އެކައުންޓުގައި މި މަދަހަ އާއްމުކުރުމާ އެކު، ކުޑައިރުކޮޅެއްގެ ތެރޭގައި އެތައް ސަތޭކަ ބަޔަކު މަދަހަ ޝެއާކޮށް، އޭގެ ރީތިކަމަށް ތައުރީފް ކުރަން ފެށި އެވެ.

އަހަރުތަކަކަށް ފަހު، މިދިޔަ ނޮވެމްބަރު މަހު އަލީ ރަމީޒު އޭނާގެ އަޑު އާއްމުންނަށް އިއްވާލި އެވެ. މިހާރު މިއުޒިކާ ދުރަށް ގޮސްފައިވާ ކުރީގެ ލަވަކިޔުންތެރިޔާ، ސޯޝަލް މީޑިއާގައި އެ ދުވަހު އެހީ އަދިވެސް އޭނާގެ އަޑުގައި "ޓަޗު' ހުރިތޯ އެވެ.

ޖަވާބުގައި އެންމެންހެން ވެސް ބުނީ އޭނާގެ އަޑަށް ބަދަލެއް ނާންނަ ކަމަށާއި އަދިވެސް އެއީ 'ރަން އަޑު' ކަމަށެވެ. އަލީ ރަމީޒު އެ ދުވަހު ވެސް ކިޔާލީ، އޭނާގެ ރަން ދުވަސްވަރު ރެކޯޑުކުރި 'ތިޔައޭ ރަސޫލަކީ' މަދަހައިގެ ތަންކޮޅެކެވެ. 

ތަފްސީލު- ކުރިން ވެސް ވަރަށް މަޝްހޫރުވި 'ތިޔައޭ ރަސޫލަކީ' މަދަހަ އަލީ ރަމީޒު އަލުން ރެކޯޑު ކުރި އިރު، ޅެމަށް ވަނީ ބައިތައް އިތުރުކޮށްފަ އެވެ. ޅެން ހަދާފައިވަނީ އާދަމް ހަލީމް އަދުނާނެވެ.

އާ ބަނޑިތަކާ އެކު އަލީ ރަމީޒުގެ މި މަދަހަ އިއްވާލި އިރު، އޭގެ ވީޑިއޯއިން ފެންނަނީ މަޝްހޫރު ކުރެހުންތެރިޔާ މުހައްމަދު ސިރުހާން (ސިރޫ)ގެ ކުރެހުންތަކެވެ. އެއީ ވީޑިއޯއަށް ހާއްސަކޮށްގެން ސިރުހާން ކުރެހި، މަންޒަރުތަކެކެވެ. 

މި މަދަހައަށް ގިނަ ބައެއްގެ ތައުރީފް އަންނަނީ ލިބެމުންނެވެ. ކުރީގެ މަދަހައަށް ވުރެ ރީތިކަމަށާއި މިހާ ދުވަސް ވީއިރު ވެސް އޭނާގެ އަޑަށް ބަދަލެއް ނާންނަ ކަމަށް ބުނެ ގިނަ ބަަޔަކު ކޮމެންޓު ކުރި އެވެ.