2 ނައިބު ވަޒީރަކު އިންޑިއާއަށް މަލާމާތްކުރުން ކުށްވެރިކޮށް ވަަކިކުރަން ގޮވާލަނީ

ސަރުކާރުގެ ދެ ނައިބު މިނިސްޓަރަކު އެ ގައުމުގެ ބޮޑު ވަޒީރު ނަރެންދުރަ މޯދީ އަށާއި އިންޑިއާއަށް ބަދުބަސް ބުނެ މަލާމާތް ރައްދުވާ ގޮތަށް އެކްސްގައި ކުރި ޕޯސްޓު ތަކަކާ އެކު ފާޑުކިޔުން އަމާޒުވެ އެ ބޭފުޅުން މަގާމުން ވަކިކުރަން ގޮވާލާ އަޑު ގަދަވެއްޖެ އެވެ. 

މައްސަލައިގެ ފެށުން - މިދިޔަ ބުރާސްފަތި ދުވަހު، އިންޑިއާގެ ބޮޑުވަޒީރު ނަރެންދުރަ މޯދީ ވަނީ މި ފަހުން އެމަނިކުފާނު ލަކްޝަދީޕަށް ކުރެއްވި ޒިޔާރަތެއްގައި އެ ސަރަހައްދުގައި ފަތުރުވެރިކަން ކުރިއެރުވުމާ ގުޅޭ ވީޑިއޯ އެއް އާންމު ކުރައްވައިފަ އެވެ.

އެއާއެކު، އިންޑިއާގެ ބައެއް މީހުން ވަނީ، މޯދީގެ އެ ވީޑިއޯ އަކީ އިންޑިއާ މީހުން ޗުއްޓީ ހޭދަ ކުރަން ރާއްޖެ ދާން ނުޖެހޭނެ ކަމާއި ގައުމުގައި ތިބެގެން ވެސް ރާއްޖޭގެ ރީތިކަން ތަޖުރިބާ ކުރެވޭނެކަން ރައްޔިތުންނަށް އަންގައިދެއްވަން އާންމު ކުރެއްވި ވީޑިއޯ އެއް ކަމަށް ބުނެފަ އެވެ.

ތަފްސީލް - ރައްދު ދޭން އެކްސުގައި ކުރި ޕޯސްޓްތައް ހައްދުން ނައްޓައި އަވައްޓެރި ގައުމަކާއި އެ ގައުމެއްގެ ވެރިންނާ ދިމާއަށް ކިޔަން ނުވާ ގިނަ ވާހަކަތަކެއް ވެސް ބައެއް ފަރާތްތަކުން ދައްކަން ފެށި އެވެ. އަދި ނަސްލީ ގޮތުން ވެސް އިންޑިއާގެ މީހުންނަށް ފާޑުކިޔާ ހަދަން ފެށި އެވެ. އެންމެ ބޮޑު ފާޑުކިޔުމެއް އަމާޒުވީ ޒުވާނުންނާ ބެހޭ ވުޒާރާގައި ނައިބުންނަށް ތިއްބަވާ މަރިޔަމް ޝިއުނާ އާއި މަލްޝާ ޝަރީފް އިންޑިއާގެ ބޮޑުވަޒީރަށް މަލާމާތް ރައްދުވާގޮތަށް ޓްވީޓު ކުރެއްވުމުންނެވެ. 

ޝިއުނާ ކުރެއްވި ޓްވީޓު މިހާރު ޑިލީޓުކޮށްފައިވާއިރު އޭނާ ވަނީ އިންޑިއާގެ ބޮޑުވަޒީރަކީ ޖޯކަރެއްގެ ގޮތުގައި ސިފަކޮށްފަ އެވެ. މަލްޝާ ވެސް ވަނީ މަލާމާތް ރައްދުވާ ފަދަ އިމޯޖީތައް ބޭނުންކޮށް މޯދީގެ ވީޑިއޯ އެކްސްގައި ހިއްސާކޮށްފަ އެވެ. 

އެއާ އެކު އިންޑިއާގެ ބައެއް ނޫސްތަކާއި އެ ގައުމުގެ ސޯޝަލް މީޑިއާ އެކްޓިވިސްޓުންނަށް އެކަން ފާހަގަވެ އެކަން ކުރި ސަރުކާރުގެ އޮފިޝަލުން އެކަމަށް މައާފަށް އެދެން ވެސް ގޮވާލަން ފެށި އެވެ.

ސަރުކާރުގެ އިސް މަގާމުތަކުގައި ތިއްބަވާ ބޭފުޅުން، އެބޭފުޅުންގެ އަމިއްލަ ސޯޝަލް މީޑިއާ އެކައުންޓުތަކުން ދައްކަވާ ވާހަކައަށް ޖަވާބުދާރީވާން ޖެހޭނެ ކަމަށާއި ގައުމަށް ހުތުރުވާގޮތަށް މަލާމާތް ރައްދުވާގޮތަށް ކަން ކުރާ ސަރުކާރުގެ އޮފިޝަލުން މަގާމުން ދުރުކުރަން ޖެހޭނެ ކަމަށް ބުނެ އެކްސް ގައި ދިވެހިން ވެސް އަންނަނީ ހިޔާލުފާޅުކުރަމުންނެވެ. 

އިންޑިއާ-ރާއްޖެ ޓޫރިޒަމް ކޯޅުމާ އެކު ސަރުކާރުގެ އިސް އޮފިޝަލުންތަކެއް އެ ޒުވާބުގެ ތެރޭގައި އިންޑިއާ އަށް ފާޑުކިޔާ ޕްރޮޮފެޝަނަލިޒަމް އެއްފަރާތްކޮށް ދެއްކި ވާހަކައަށް ފާޑުވިދާޅުވެ ކުރީގެ ރައީސް މުހައްމަދު ނަޝީދު ކުރެއްވި ޕޯސްޓެއްގައި ވަނީ އިންޑިއާ ފަދަ ރާއްޖޭގެ ސަލާމަތާއި ހަމަޖެހުމުގައި މުހިއްމު ދައުރެއް އަދާކުރާ ގައުމެއްގެ ވެރިޔަކަށް ނިސްބަތްކޮށް ދެއްކެވި ވާހަކަ ކުށްވެރިކުރަން ސަރުކާރަށް ގޮވާލައްވައިފަ އެވެ.

ނަޝީދު ވިދާޅުވީ އެފަދަ މީހުން ކުރާ ޓްވީޓުތަކަކީ ސަރުކާރުގެ ޕޮލިސީ ނޫންކަމުގެ ޔަގީންކަން އިންޑިއާ އަށް ދޭން ޖެހޭ ކަމަށެވެ.

އެމްއާރުއެމްގެ ރައީސް ފާރިސް މައުމޫނު ވަނީ އެކުވެރި ގައުމުތަކަށާއި އެ ގައުމުތަކުގެ ވެރިންނަށް މަލާމާތް ރައްދުވާގޮތަށް ވާހަކަ ދައްކާ ސަރުކާރުގެ އިސް އޮފިޝަލުން މަގާމުން ދުރުކުރަން ޖެހޭނެ ކަމަށް ވިދާޅުވެފަ އެވެ. ފާރިސް ވިދާޅުވީ މަގާމުތަކުގައި ތިއްބަވާ ބޭފުޅުންގެ އަމަލުތައް ކުށްވެރިކޮށް ފިޔަވަޅު ނާޅާނަމަ، އެއީ ސަރުާރުން ތާއީދު ކުރާ އަމަލުތައް ކަމަށް ބެލުމުގެ ފުރުސަތު އޮންނާނެ ކަމަށެވެ.

ފާރިސްގެ ވާހަކައަށް ކުރީގެ ފޮރިން މިނިސްޓަރު އަހުމަދު ޝަހީދު ވެސް ވަނީ ތާއީދު ކުރައްވައިފަ އެވެ. އިސް މަގާމުތަކުގައި ތިބޭ ބޭފުޅުންގެ އަދަބު އަހުލާގު ވަކި ހަމައެއްގައި ހިފަހައްޓަން ޖެހޭނެ ކަމަށް ފޮރިން ރިލޭޝަންސް ދާއިރާގެ ތަޖުރިބާކާރު ޝަހީދު ވިދާޅުވި އެވެ.

ޝިއުނާ އާއި މަލްޝާގެ ވާހަކަތަކަށް ފާޑުކިޔާ، އެކްސްގައި ދިވެއްސަކު ކުރި ޕޯސްޓެއްގައި، އެ ދެމީހުންނަކީ މިހާރު ސިޔާސީ ޕާޓީއެއްގެ އެކްޓިވިސްޓުން ނޫންކަން ހަނދާންކޮށްދީ، ސަރުކާރުގެ އިސް މަގާމުތަކުގައި ތިބޭއިރު އެފަދަ މަގާމުތަކުގައި ތިބޭ މީހުންގެ އުޅުން ހުންނާނޭގޮތަށް އުޅުންތައް ބައްޓަން ކުރަން ވަނީ ގޮވާލައިފަ އެވެ.

ޔޫތު މިނިސްޓްރީގެ ދެ ނައިބުން ވަކިކުރަން ރައީސް މުހައްމަދު މުއިއްޒަށް ގޮވާލާ ގިނަ ބަޔަކު ވާހަކަ ދައްކަމުންދާއިރު އެ ދެމީހުންގެ ވާހަކަތަކުން ރާއްޖެ އަށާއި ރާއްޖޭގެ ފަތުރުވެރިކަމަށް ކުރާނެ އަސަރާމެ ދު ވިސްނާ ނުލާތޯ ވެސް ބައެއް މީހުން ވަނީ ސުވާލު އުފައްދައިފަ އެވެ.

ޓެންޑާ ބޯޑުގެ އިސްމަގާމެއް އަދާކުރެއްވި އިސްމާއިލް ޒަރިޔަންދު ވިދާޅުވީ ދިވެހިންނަކީ ހިތްހެޔޮކަމުގެ ނަމޫނާ ބަޔެއް ކަމަށާއި ދިވެހިންނަށް ލިބިފައިވާ ރީތި ހިތްގައިމު ދޮންވެލީގެ ގޮނޑުދޮށްތަކަށް ޝުކުރުވެރިވާ ހާލު އެހެން މީހުންނަށް ނުކިއްސަރުކޮށް ވާހަކަ ދައްކައިގެން ނުވާނެ ކަމަށެވެ.

އިސް މަގާމުތަކުގައި ތިއްބަވައިގެން ސޯޝަލް މީޑިއާގައި ކުރާ ޕޯސްޓުތަކަކީ، ސޯޝަލް މީޑިއާ އެކްޓިވިސްޓުންގެ ގޮތުގައި ތިބެގެން ކުރާ ކަހަލަ ޕޯސްޓުތަކަށް ނުވާނެ ކަމާއި އެއީ އާންމުންނަށް ޖަވާބުދާރީ ވާންޖެހޭނެ ވާހަކަތަކަށް ވާނެ ކަން ވެސް ބައެއް މީހުން ވަނީ ހަނދާންކޮށްދީފަ އެވެ.

ޓޫރިޒަމް ދާއިރާ އާ ގުޅުންހުރި ގިނަ މަސައްކަތްތަކެެއްގައި އުޅުއްވާ އިސްމާއިލް ހަމީދު (ހައިރަޒް އިއްސެ) ގެ ޕޯސްޓެއްގައި ވިދާޅުވީ ދައުލަތުގެ ސްޓޭޓު މިނިސްޓަރުންނާއި ޑެޕިޔުޓީ މިނިސްޓަރުންގެ މަގާމުގައި ތިއްބަވާ ބޭފުޅުންނަަކީ ގައުމު ތަމްސީލު ކުރައްވާ މީހުން ކަމަށާއި އެފަދަ މީހުންނަކީ ޕްރޮފެޝަނަލިޒަމް ހިފަހައްޓަން ޖެހޭ މީހުން ކަމަށެވެ.

ސަރުކާރުގެ އިސް މަގާމުތަކުގައި ތިއްބެވި ބޭފުޅުންނާއި، ސަރުކާރަށް ތާއީދުކުރާ ގިނަ ބަޔަކު އަވައްޓެރި، އެކުވެރި އިންޑިއާ އަށާއި އެގައުމުގެ ވެރިންނަށް ފާޑުކިޔާ މަލާމާތް ކުރާތީ އެކަން ދިވެހިންގެ ގިނަ ބަޔަކު ދަނީ ކުށްވެރި ކުރަމުންނެވެ.

ހާއްސަކޮށް ރާއްޖޭގެ ޓޫރިޒަމްގައި އިންޑިއާ އަކީ މުހިއްމު މާކެޓަކަށް ވާއިރު މި ފާޑުކިޔުންތަކާއި ޒުުވާބުތައް އިތުރަށް ހޫނުވުމަކީ ދިވެހިންނަށް، ހާއްސަކޮށް ރާއްޖޭގެ ޓޫރިޒަމަށް އޭގެ ގެއްލުން ކުރިމަތިވާނެ ކަމެއް ކަން ވެސް ދަނީ ހަނދާންކޮށްދެމުންނެވެ.

އެކަމާ ގުޅޭ ގޮތުން ސަރުކާރުގެ ބަހެއް އަދި ނެތެވެ.