ބްރޯޑްކާސްޓިން ކޮމިޝަންގެ ބައްދަލުވުމެއްގެ ތެރެއިން (ފައިލް ފޮޓޯ/ކޮމިޝަން)
ލައިސަންސް ނުނަގާ ގޭގޭގައި ޗެނަލްތައް ބެލޭ ގޮތަށް ގަވާއިދު އިސްލާހުކޮށްފި
ބްރޯޑްކޮމް އިން ދޫކުރާ ރީ-ބްރޯޑްކާސްޓިން ލައިސަންސް ނުނަގާ ވެސް އަމިއްލަ ބޭނުމަށް ނުވަތަ ގޭބިސީތަކުގައި ރީ-ބްރޯޑްކާސްޓްކުރެވޭ ގޮތަށް ނުވަތަ ކޭބަލް ޓީވީން ދައްކާ ޗެނަލްތައް ތަފާތު ހިދުމަތްތައް މެދުވެރިކޮށް ބެލޭނެ ގޮތަށް ގަވާއިދު އިސްލާހުކޮށްފި އެވެ.
ވީ ކިހިނެއް؟ - ބްރޯޑްކާސްޓިން ކޮމިޝަނުން ވަނީ ރީ-ބްރޯޑްކާސްޓިން ގަވާއިދަށް ބަދަލު ގެނެސް، އެ އިސްލާހުތައް ސަރުކާރުގެ ގެޒެޓުގައި މިދިޔަ ބުރާސްފަތި ދުވަހު ޝާއިއުކޮށްފަ އެވެ.
ތަފްސީލް - އެ ގަވާއިދަށް ބްރޯޑްކޮމް އިން ގެނެސްފައިވާ މައިގަނޑު އިސްލާހަކީ ރީ-ބްރޯޑްކާސްޓިން ލައިސަންސް ނުނަގާ ވެސް އަމިއްލަ ބޭނުމަށް އެ ހިދުމަތް ބޭނުންކުރެވޭ ގޮތް ހެދުމެވެ. އެގޮތުން، އެ ކޮމިޝަނުން އެ އިސްލާހު ގެނެސްފައިވަނީ އެ ގަވާއިދުގެ 'ހިދުމަތް ދިނުމުގެ ލައިސަންސް'އާ ގުޅޭ، ގަވާއިދުގެ ފަސް ވަނަ މާއްދާއަށެވެ. އެގޮތުން:
-
ކުރިން އޮތް ގޮތް: އެ މާއްދާގައި ކުރިން އޮތީ ރާއްޖޭގައި ބްރޯޑްކާސްޓްކުރުމުގެ ހިދުމަތް ދޭން ވާނީ، އެ ކަމަށް މި ގަވާއިދުގައި ކަނޑައަޅާފައިވާ އުސޫލުތަކާ އެއްގޮތަށް މޯލްޑިވްސް ބްރޯޑްކާސްޓިން ކޮމިޝަނުން ދުކުރާ ރީ-ބްރޯޑްކާސްޓްކުރުމުގެ ލައިސަންސް ލިބިގެން ކަމަށް
އެކަމަކު އަލަށް ގެނައި އިސްލާހުގައި ބްރޯޑްކާސްޓިން ކޮމިޝަނުން ވަނީ، އަމިއްލަ ބޭނުމަށް ރީ-ބްރޯޑްކާސްޓްކުރާ ފަރާތްތަކުން އެ ލައިސަންސް ނެގުން އިސްތިސްނާކޮށްފަ އެވެ. އަދި "އަމިއްލަ ބޭނުމަށް" ރީ-ބްރޯޑްކާސްޓްކުރުން ވެސް ތަފްސީލުކޮށްދީފައިވެ އެވެ.
އަލަށް ގެނައި އިސްލާހުގައި ބުނަނީ:
-
އަމިއްލަ ބޭނުމަށް ފިޔަވައި ރާއްޖޭގައި އެއްވެސް ތަނެއްގައި ރީ-ބްރޯޑްކާސްޓް ކުރުމުގެ ހިދުމަތް ދޭން ވާނީ އެ ކަމަށް ގަވާއިދުގައި ކަނޑައަޅާފައިވާ އުސޫލުތަކާ އެއްގޮތަށް އެ ކޮމިޝަނުން ދޫކުރާ ރީ-ބްރޯޑްކާސްޓިން ލައިސަންސް ލިބިގެން ނުވަތަ ލައިސަންސް ލިބިފައިވާ ފަރާތެއް މެދުވެރިކޮށް ކަމަށް
-
އޭގެ ފަހަތަށް އަކުރެއްގެ ގޮތުގައި ހިމަނާފައިވާ މާއްދާގައި ބުނެފައިވަނީ، އަމިއްލަ ބޭނުމަކީ ގޭބިސީއެއްގައި ރީ-ބްރޯޑްކާސްޓިންގެ ހިދުމަތެއް ބޭނުންކުރުން ކަމަށް
އޭގެ އިތުރުން، ރީ-ބްރޯޑްކާސްޓިން ލައިސަންސް އެދި ހުށަހަޅާ ފަރާތްތަކުގައި ހުންނަން ޖެހޭ އިތުރު ޝަރުތެއް ވެސް މި އިސްލާހުގައި ހިމަނާފައިވެ އެވެ. އިތުރު ކުރި އެ ޝަރުތަކީ ލައިސަންސަށް އެދޭ ފަރާތަކީ ބްރޯޑްކާސްޓްކުރުމުގެ ހިދުމަތް ދޭ ކުންފުންޏެއް ނުވަތަ ކޯޕަަރޭޓިވް ސޮސައިޓީއަކަށް ނުވުމެވެ.