ދިވެހިންގެ މައްޗަށް ބަސް ކިޔައި ގޮތް ނިންމޭނެ އެހެން ބަޔަކު ނެތް: ރައީސް

ރާއްޖޭގެ ހާރިޖީ މިނިވަންކަމުގައި ދިވެހިންގެ މައްޗަށް ބަސް ކިޔައި ގޮތް ނިންމޭނެ އެހެން ބަޔަކު ނެތް ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް އެހެން ވިދާޅުވީ، މިއަދު ފާހަގަކުރަމުން އަންނަ ރާއްޖޭގެ ގައުމީ ދުވަހުގެ މުނާސަބަތުގައި ފޮނުއްވި ހާއްސަ ހިތޯބުގަ އެވެ.

ބުނީ ކީކޭ؟ - ގައުމީ ދުވަހުގެ ތަހުނިޔާ ފޮނުއްވަމުން ރައީސް ވިދާޅުވީ:

"އަޅުގަނޑުމެން ކޮންމެ ދިވެއްސެއްގެ ހިތުގައި ސާބިތުކަމާ އެކު ކަނޑައަޅާފައިވާ އެންމެ ވަރުގަދަ އަޒުމަކީ، ދިވެހި ގައުމިއްޔަތުގެ މި އަސާސްތަކަށް ކުޑަ ވެސް ގުޑުމެއް އެރިޔަނުދީ ހިމާޔަތްކޮށް، ރައްކާތެރިކުރުމެވެ،" ރައީސް ވިދާޅުވި އެވެ. 

ރައީސް ވިދާޅުވީ ރާއްޖެއަށް ގައުމެއްގެ ސިފަ ޖެހި، އަދި އޭގެ ފަހުން މިއަދާ ހަމައަށް ގައުމެއްގެ ގޮތުގައި ރާއްޖެ އޮތުމުގެ ސިއްރަކީ އެހެން ބައެއްގެ އަޅުވެތިކަމުގެ ދަށުގައި ނުވުމަށް ދިވެހިން ކަނޑައެޅި އަޒުމް ކަމަށެވެ. އެ އަޒުމުގެ މަތީގައި ދެމިތިބުމަށް ދިވެހިން ކުރި މަސައްކަތާއި ވީ ގުރުބާނީ އެމަނިކުފާނު ފާހަގަކުރެއްވި އެވެ.

ރައީސް ވިދާޅުވީ:

"ބައިނަލްއަގްވާމީ މުޖުތަމައުގައި އިތުބާރު ކުރެވޭ ގައުމެއްގެ ގޮތުގައި ރާއްޖޭގެ ނަން މިއަދު ވެސް ލިޔެވިފައި ވަނީ، އެންމެ ފުރިހަމަ މާނައިގައި މިނިވަން ގައުމެއްގެ ގޮތުގަ އެވެ. ސިޔާސީ އަދި އިގްތިސާދީ މިނިވަންކަން ފުރިހަމައަށް ލިބޭ ގޮތަށް، ދާހިލީ އަދި ހާރިޖީ މިނިވަންކަމުގައި ދިވެހިންގެ މައްޗަށް ބަސް ކިޔައި ގޮތް ނިންމޭނެ އެހެން ބަޔަކު ނެތެވެ،" ރައީސް ވިދާޅުވި އެވެ.

އެނގުން މުހިއްމު - އަަބަދުވެސް އިސްކުރާނީ ދިވެހިންގެ މަސްލަހަތު ކަމަށާއި، ރާއްޖޭގެ މިނިވަންކަމަށް ބަސް ބުނެވޭނެ އެހެން ބަޔަކު ނެތް ކަމަށް ރައީސް ވިދާޅުވިއިރު، އިދިކޮޅު ކޯލިޝަނުން ދަނީ، އަވަށްޓެރި އިންޑިއާގެ ނުފޫޒު ރާއްޖެއަށް އިންތިހާއަށް ބޮޑުވެފައިވާ ކަމުގެ ކަންބޮޑުވުން ފާޅުކޮށް 'އިންޑިއާާ އައުޓް'ގެ ނަމުގައި ހަރަކާތެއް ހިންގަމުންނެވެ. އިދިކޮޅުން ބުނާ ގޮތުގައި، އެއީ ރާއްޖޭގައި އިންޑިއާގެ ސިފައިން ތިބުމާ ދެކޮޅު ހަރަކާތެކެވެ.

ރިޔާސީ އިންތިހާބުގައި ވެސް އިދިކޮޅުން އެންމެ ބޮޑަށް ނަގަނީ އެ މައްސަލަ އެވެ.

ނަމަވެސް އެ ތުހުމަތުތައް ސަރުކާރުން އަބަދުވެސް ދޮގުކުރެ އެވެ.