ވެމްކޯއިން ކުނި ނަގާ އަގު، އަތް ފޯރާފަށަށް ގެންނާނަން: މުއިއްޒު

ވެމްކޯއިން ކުނި ނަގާ އަގު މިހާރު އޮތީ 'އާދަޔާ ހިލާފަށް ބޮޑުކޮށް' ކަމަށާއި އޭނާގެ ސަރުކާރެއްގައި އެ އަގު އަތްފޯރާ ފަށަށް ތިިރިކުރާނެ ކަމަށް އިދިކޮޅު ޕީޕީއެމް-ޕީއެންސީގެ ރިޔާސީ ކެންޑިޑޭޓު ވައުދުވެވަޑައިގެންފި އެވެ.

ވީ ކިހިނެއް؟ - މާލޭގެ މޭޔަރުކަން ވެސް ކުރައްވަމުން ގެންދަވާ މުއިއްޒު، ރޭ ހެންވޭރުގައި ހުޅުއްވައިދެއްވި ކެމްޕެއިން ޖަހަގައި ވާހަކަ ދައްކަވަމުން ވެމްކޯއިން ކުނި ނަގަން ދައްކަން ޖެހޭ އަގަށް ފާޑުވިދާޅުވެ ވަނީ ވާހަކަ ދައްކަވާފަ އެވެ.

ތަފްސީލު - ކެމްޕެއިން ހަރަކާތުގައި ވާހަކަ ދައްކަވަމުން މުއިއްޒު ވިދާޅުވީ، މިހާރު ކުނި ނެގުމަށް ރައްޔިތުންނަށް ދައްކަން ޖެހޭ 150ރ. އަކީ އާދަޔާ ހިލާފަށް ބޮޑު އަގެއް ކަމަށެވެ. އޭގެ ސަބަބުން އާންމު ރައްޔިތުންނާއި ކުދި އަދި މެދު ފަންތީގެ ވިޔަފާރިތަކަށް ބޮޑު އުދަނގަލަކަށް ވެފައިވާ ކަމަށް އޭނާ ވިދާޅުވި އެވެ.

"ކުންފުންޏަށް ފައިދާ ނުވެގެން، އަގު ބޮޑު ކޮށްގެން ނޫން މިއުޅެނީ. އެހެންވީމަ، ވެމްކޯގެ މިހުރި އާދަޔާ ހިލާފު ބޮޑު އަގު ތިރިކޮށްދީ، ރައްޔިތުންނަށް އަތްފޯރާފަށަށް އެ އަގުތައް ކުޑަކޮށްދޭނަން،" މުއިއްޒު ވިދާޅުވި އެވެ.

ނަމަވެސް ކުނި އުކާލުމުގެ ފީ ކުޑަކުރަނީ ކިހާ އަދަދަކަށް ކަމެއް އޭނާ ހާމައެއް ނުކުރައްވަ އެވެ. ވިދާޅުވީ، އޭނާގެ ސަރުކާރެއްގައި ވެމްކޯގެ ހިންގުން ހަރުދާކޮށްގެން އެ އަގު ކުޑަ ކުރެވޭނެ ކަމަށެވެ.

"ވެމްކޯއަކީ، އަޅުގަނޑުމެންނަށް ތުރާލަކަށްވުމުގެ ބަދަލުގައި އަޅުގަނޑުމެންނަށް ފައިދާވާ  ތަނަކަށް ހަދާނަން،" މުއިއްޒު ވިދާޅުވި އެވެ.