ރައީސް ސޯލިހަށް މަރުހަބާ ދަންނަވަން ކިނޮޅަސް ތައްޔާރުވެފައި.
ކިނޮޅަސް: ކެމްޕެއިން ތަފާތު، އެކަމަކު ވަކި ފޯރި ކުޑައެއް ނޫން
ރ. ކިނޮޅަސް – ރިޔާސީ އިންތިހާބުގެ ކެމްޕޭނަށް ރައީސް އިބްރާހިމް މުހައްމަދު ސޯލިހު ރައްރަށަށް ކުރައްވާ ދަތުރުފުޅުތަކުގެ ތެރެއިން މިއަދު ރ. އަތޮޅަށް ފެއްޓެވި ދަތުރުފުޅުގެ ފުރަތަމަ މަންޒިލަކީ ކިނޮޅަހެވެ. ކެމްޕޭނަށް ރައީސާ އެކު ދެވުނު ރަށްރަށުގެ ތެރެއިން އެންމެ ތަފާތު މަންޒަރެއް ފެނުނު އެއް ރަށަކީ މި ރަށެވެ. އެހެން ރަށްރަށާ ހިލާފަށް މި ރަށުން ކެމްޕޭނުގެ ލަވަ ޖަހާ އަޑެއް ނީވެ އެވެ. އެކަމަކު ކެމްޕޭނު ފޯރި ވަކި ކުޑައެއް ވެސް ނޫނެވެ.
މި ރަށުގެ ބަނދަރު ސަރަހައްދުން ދިމާވި މެދު އުމުރުގެ އަންހެނަކު ބުނީ މިއީ ކުރީއްސުރެ ވެސް މި ރަށުގެ އާދަ ކަމަށެވެ. ކެމްޕޭނަކަސް، އީދަކަސް ލަވަ ޖެހުމެއް ނެތެވެ. އީދު ފަދަ މުނާސަބަތުތަކުގައި މަދަހަ އެކަނި ޖަހަ އެވެ.
ކެމްޕޭނާ އެކު ބައެއް ރަށްރަށުގައި ދެ ޕާޓީގެ ސަޕޯޓަރުން ނޫނީ އެއް ކެންޑިޑޭޓަކަށް ތާއީދުކުރާ މީހުންނާ ވާދަވެރި ކެންޑިޑޭޓަށް ސަޕޯޓު ކުރާ މީހުންނާ ދެމެދު ހިޔާލު ތަފާތުވުންތަކާއި ޒުވާބުތައް ދެ އެވެ. އެކަމަކު ކިނޮޅަހުން އެ މަންޒަރެއް ނުފެންނާނެ ކަމަށް މި ރަށުން ވާހަކަ ދެއްކި އެ އަންހެން މީހާ ބުންޏެވެ.
"އެއް ބަޔަކު އަނެއް ބަޔަކަށް ފުރުސަތު ދީގެން، އަބަދުވެސް ވަރަށް ރީތިކޮށް ކުރިއަށްދާނީ. ހަމަ ކުރީއްސުރެ ވެސް އޮންނަނީ މިހެން،" އޭނާ ބުންޏެވެ.
ރައީސް ސޯލިހާއެކު އަންނަ ރިޔާސީ ދައުރަށް ކޯލިޝަން ހަދާފައިވާ އަދާލަތު ޕާޓީގެ ބޮޑު މެޖޯރިޓީއެއް އޮންނަ މި ރަށުގެ ކައުންސިލަކީ ވެސް އަދާލަތުގެ މެންބަރުން އެކުލެވޭ ކައުންސިލެކެވެ. ޒަމާނުއްސުރެ ދީނަށް ލޯބިކުރާ މި "ޔުނައިޓެޑް ކިނޮޅަހު"ގެ ހިމޭން މާހައުލުން ކެމްޕޭނު ފޯރިއާ އެކު ވެސް ފެންނަނީ އެކުވެރިކަމާއި އެއްބައިވަންތަކަމެވެ.