ކުދިކުދި ރަށްރަށަށް ހިޖުރަކުރަން ސަރުކާރުން އެހީވާނެ ކަމުގެ އިޝާރާތެއް ރައީސް ދެއްވައިފި

ވ. ރަކީދޫ - ރަކީދޫ ފަދަ ކުދިކުދި ރަށްރަށުން އެކި ތަންތަނަށް ހިޖުރަކޮށްފައިވާ މީހުން އަނބުރާ އަންނަން ބޭނުންވާ ނަމަ، އެ މީހުންނަށް އަނބުރާ އެ ރަށްރަށަށް އައުމަށް އެހީތެރިވުމަށް ސަރުކާރުން ވިސްނާ ކަމުގެ އިޝާރާތެއް ރައީސް އިބްރާހިމް މުހައްމަދު ސޯލިހު މިއަދު ދެއްވައިފި އެވެ.

ވީ ކިހިނެއް؟ - ރައީސް ސޯލިހުގެ ރިޔާސީ ކެމްޕޭންގެ ތެރެއިން މިއަދު މި ރަށަށް ވަޑައިގެން ރައްޔިތުންނާ މުހާތަބުކުރައްވައި އެ މަނިކުފާނު ވިދާޅުވީ މި ރަށަކީ އެންމެ 63 މީހުން ދިރިއުޅެމުން ދާ ރަށެއް ނަމަވެސް އަސާސީ ހިދުމަތްތައް މި ރަށްރަށުން ލިބެން ޖެހޭ ކަމަށެވެ. މިއީ އާބާދީ ކުޑަ ރަށެއް ނަމަވެސް، ލޯކަލް ޓޫރިޒަމަށް ރަކީދުއަކީ ފައްކާ، ރީތި ރަށެއްކަން ފާހަގަކުރައްވައި ރައީސް ވިދާޅުވީ ރަށު ފަތުރުވެރިކަން ތަރައްގީކުރަން ބޭނުންވާ ސާފު ފެނާއި ނަރުދަމާގެ ނިޒާމް މި ރަށުގައި މި އަހަރު ތެރޭ ނިމޭނޭ ކަމަށެވެ. 

ބުނީ ކީކޭ؟ - ރައީސް ވިދާޅުވީ މީގެ ކުރިން 300އެއްހާ މީހުން ދިރިއުޅުނު މި ރަށުން ވެސް މީހުން ބަދަލުވާން ޖެހުނު އެންމެ ބޮޑު ސަބަބަކީ ދަރިން ލިބުމަށް ފަހު އެ މީހުންނަށް ރަށުގައި ރަނގަޅު ތައުލީމެއް ދެވެން ނެތުމެވެ. ނަމަވެސް، މި ސަރުކާރުން މި ރަށުގެ ސްކޫލް އަލުން ހަދައި މިހާރު ހުޅުވުމަށް ތައްޔާރުވެފައިވާ ކަމަށް ރައީސް ވިދާޅުވި އެވެ. އެ ކަމަށް ދިމާވެފައިވާ ހުރަހަކީ ރަށުން ސްކޫލަށް ޓީޗަރުން ނުލިބުން ކަމަށާއި، އެހެންވެ، ރާއްޖެއިން ބޭރުން ޓީޗަރުން ގެނައުމަށް މަސައްކަތް ކުރަމުން އަންނަ ކަމަށެވެ.

"މި ބަދަލުތަކާ އެކީގައި އާބާދީ އިތުރުވާނޭ ގޮތްތަކެއް މި ހޯދައިދޭ ދެވެނީ. އުފަން ރަށަށް އައުމުގެ ވިސްނުމެއް އުފެދިދާނޭ ކަމަށް އަޅުގަނޑު އުންމީދު ކުރަނީ،" ރައީސް ވިދާޅުވި އެވެ.

"އެއަށް ފަހުގައި ރަށަށް ހިޖުރަކުރަން ބޭނުންވާ މީހުން ދެނެގަތުމަށް ފަހުގައި އެއީ ކުރަން ޖެހޭ ކަމެއް ކަމަށް އަޅުގަނޑުމެން އެންމެންނަށް ގަބޫލު ކުރެވޭ ހިސާބަށް ދިޔައިމާ އެއީ ނުކުރަންވީ ކަމެއް ނޫން."

އެ މަނިކުފާނު ވިދާޅުވި ގޮތުގައި، އަންނަ އަހަރު އާރުޓީއެލްގެ ހިދުމަތުން މުޅި ރާއްޖެ ގުޅާލާއިރު، ވ. އަތޮޅުގެ ހުރިހާ ރަށެއް ގުޅިގެން ދާނެ އެވެ. އެކަމުގެ ސަބަބުން ކުދި އާބާދީތައް ބޮޑެތި އާބާދީތަކާ ގުޅި ހިދުމަތްތައް ހޯދަން ފަސޭހަވެ ބޮޑު ލުޔެއް ރައްޔިތުންނަށް ލިބޭނޭ ކަމަށް ރައީސް ވިދާޅުވި އެވެ. އެ މަނިކުފާނު ވިދާޅުވި ގޮތުގައި، ތަސައްވުރަކީ ދަތުރުފަތުރުން ގުޅާލާ ދިރިއުޅުން ފަސޭހަކޮށްދިނުމެވެ.

"އޭރުން އިރުއޮއްސެން ވާއިރަށް އެ ރަށުން އަނެއް ރަށަށް ގޮސްފައި ހިދުމަތްތައް ހޯދައިގެން އާދެވޭނެ. އެ ފަސޭހަ މިފަދަ ކުދި އާބާދީތަކަށް މާ ބޮޑަށް ލިބިގެން ދާނެ،" ރައީސް ވިދާޅުވި އެވެ.