ރިޔާސީ އިންތިހާބުގެ އެކި މަސައްކަތްތަކަށް ބޭނުންވާ މުވައްޒަފުން ހޯދަން އިލެކްޝަންސް ކޮމިޝަނުން ކުރިއަށްގެންދާ ވޯކްއިން އިންޓަވިއު (ދައުރު ފޮޓޯ/ހުސައިން ސުނައިން)
ވޯޓާސް ލިސްޓަށް ޝަކުވާ ހުށަހެޅުން ބަންދުވިއިރު 551 ޝަކުވާ، ވޯޓް ލެވޭ މީހުންގެ ލިސްޓް އަންނަ މަހު އާންމުކުރާނެ
މުހިންމު ނުކުތާތައް
އެންމެ ފަހުން އާއްމުކުރި މިއަހަރުގެ އިންތިހާބުގައި 282،672 މީހަކަށް ވޯޓު ލުމުގެ ހައްގު ލިބޭ ކަމަށް
މިހާރު ހުށަހެޅިފައިވާ ޝަކުވާތަކާ އެކު ލިސްޓުން 551 މީހުން އުނިވޭ
މިއަހަރުގެ ރިޔާސީ އިންތިހާބުގައި ވޯޓުލުމުގެ ހައްގު ލިބޭނެ ކަމަށް ފެންނަނީ 282،121 މީހުންނަށް
ކުރިއަށް އޮތް ރިޔާސީ އިންތިހާބުގައި ވޯޓުލެވޭ މީހުންގެ ވަގުތީ ލިސްޓަށް ޝަކުވާ ހުށަހަޅަން ހުޅުވާލި ފުރުސަތުގައި 551 ޝަކުވާ ލިބިފައިވާ ކަމަށާއި އަންނަ މަހުގެ ފެށޭ ހަފްތާގެ ތެރޭގައި ވޯޓުލެވޭ މީހުންގެ ދާއިމީ ލިސްޓު އާންމުކުރާނެ ކަމަށް އިލެކްޝަންސް ކޮމިޝަން (އީސީ) މިއަދު ބުނެފި އެވެ.
ވީ ކިހިނެއް؟ 9 ސެޕްޓެމްބަރުގައި އޮންނަ ރިޔާސީ އިންތިހާބުގައި ވޯޓުލުމުގެ ފުރުސަތު ލިބޭ މީހުންގެ ވަގުތީ ދެ ލިސްޓެއް އާންމުކޮށް ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަނުން މިހާތަނަށް ދީފައިވެ އެވެ.
އެންމެ ފަހުން އާއްމުކުރި ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލީ މިމަހުގެ 11 ވަނަ ދުވަހު އެވެ. އެ މުއްދަތު އިއްޔެއަށް ވަނީ ހަމަވެފަ އެވެ.
ތަފްސީލް - އެ ފުރުސަތު ބަންދުކުރުމަށް ފަހު މިއަދު އިލެކްޝަންސް ކޮމިޝަން ނެރެފައިވާ ޝަކުވާ ލިސްޓުގައިވާ ގޮތުން އިއްޔެގެ ނިޔަލަށް ހުށަހަޅާފައިވާ 551 ޝަކުވާގެ ތެރޭގައި އެންމެ ގިނައިން ހިމެނެނީ މަރުވެފައިވާ މީހުން ލިސްޓުގައި ހިމަނާފައިވާތީ ހުށަހެޅިފައިވާ ޝަކުވާ އެވެ. އެގޮތުން:
-
މަރުވެފައިވާ މީހުން ލިސްޓުގައި އޮތުމުގެ 465 ޝަކުވާ
-
ދިރިއުޅޭ ތަން ބަދަލުވެގެން 58 ޝަކުވާ
-
ނަން ބަދަލުވެގެން ފަސް ޝަކުވާ
-
ލިސްޓުގައި ނަން ނެތިގެން 19 ޝަކުވާ
-
އައިޑީކާޑު ބަދަލުވެގެން އެއް ޝަކުވާ
ބުނީ ކީކޭ؟ އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު މިއަދު "ދައުރު" އަށް ވިދާޅުވީ، ޝަކުވާ ހުށަހެޅުމުގެ ފުރުސަތު މިހާރު ބަންދުވެފައިވާތީ، ކުރިއަށްއޮތް ފަސް ދުވަހުގެ ތެރޭގައި އެ ޝަކުވާތަކަށް އެ ކޮމިޝަނުން ޖަވާބު ދިނުމަށްފަހު، ދާއިމީ ލިސްޓު މިފެށޭ މަހުގެ ފުރަތަމަ ހަފްތާގެ ތެރޭގައި އާންމުކުރެވޭނެ ކަމަށް ލަފާކުރާ ކަމަށެވެ.
"ކުރިއަށް އޮތީ އީދު ބަންދުވީމަ، ޑީއެންއާރު ހުޅުވީމަ އެކޮޅުން މައުލޫމާތުތައް އަލުން އަޕްޑޭޓުކުރުމަށް ފަހު ދާއިމީ ލިސްޓް އާއްމުކުރާނީ. އެހެންވީމަ ސީދާ ތާރީހެއް އަދި ނޭނގެ. އެކަމަކު އެންމެ ލަސްވެގެން އަންނަ މަހުގެ ފެށޭ ހަފްތާ ތެރެއަށް އާއްމުކުރެވޭނެ ކަމަށް މި ބަލަނީ،" ހަބީބް ވިދާޅުވި އެވެ.
ހަބީބު ވިދާޅުވި ގޮތުން، ރަށްވެހިވެފައިވާ ރަށްނޫން އެހެން ތަނެއްގައި ވޯޓުލުމަށް ރީ-ރަޖިސްޓްރޭޝަނަށް ހުޅުވާލާނީ އަންނަ މަހުގެ 16 އިން އޮގަސްޓް މަހުގެ 5 ވަނަ ދުވަހުގެ ނިޔަލަށެވެ.
ފާހަގަކޮށްލެވޭ ކަމެއް - އީސީން އެންމެ ފަހުން އާއްމުކުރި ވަގުތީ ލިސްޓަށް ޝަކުވާ ހުށަހަޅަން ހުޅުވާލަ އިރު މިއަހަރުގެ އިންތިހާބުގައި 282،672 މީހަކަށް ވޯޓު ލުމުގެ ހައްގު ލިބޭނެ ކަމަށް ލަފާކޮށްފައިވެ އެވެ.
މިހާރު ހުށަހަޅާފައިވާ ޝަކުވާތަކާ އެކު އެ ލިސްޓުން 551 މީހުންގެ ނަން އުނިވާނެ އެވެ. އެހެންވެ، މިއަހަރުގެ ރިޔާސީ އިންތިހާބުގައި ވޯޓުލުމުގެ ހައްގު ލިބޭނެ ކަމަށް ފެންނަނީ 282،121 މީހަކަށެވެ.
އެނގުން މުހިންމު - ޝަކުވާ ހުށަހެޅުމުގެ ފުރުސަތު މިއަދަށް ބަންދުވި އިރު، ވޯޓުދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އަންނަ މަހު ލިސްޓް އާންމު ކުރުމުން، މިހާރު ޝަކުވާ ހުށަނާޅާ ފަރާތްތަކަށް ދެން ޝަކުވާ ހުށަހެޅުމުގެ ފުރުސަތެއް ނޯންނާނެ އެވެ. އަދި އެ ލިސްޓުގައި ނަން ނެތް މީހަކަށް މިއަހަރުގެ ރިޔާސީ އިންތިހާބުގައި ވޯޓުލުމުގެ ފުރުސަތެއް ނުލިބޭނެ އެވެ.
ވޯޓާސް ލިސްޓަށް ހުށަހެޅިފައިވާ ޝަކުވާތަކަށް އީސީ އިން ދޭ ޖަވާބާ މެދު، ހިތްހަމަނުޖެހޭ ނަމަ، އެ މައްސަލައެއް ހައިކޯޓަށް ހުށަހެޅުމުގެ ފުރުސަތު އޮވެ އެވެ.