ރައްޔިތުންގެ މަޖިލީހުގެ އިއްޔެ ޖަލްސާގައި ބަންޑާރަނައިބު އިބްރާހިމް ރިއްފަތު މަޖިލިސް ޖަލްސާގައި. (ފޮޓޯ/މަޖިލިސް)
ރިއްފަތު މަޖިލީހުގެ އިމްތިޔާޒަށް އަރައިގަތް ކަމަށް ބުނެ ހުށަހެޅި މައްސަލަ ބޭރުކޮށްލައިފި
ބަންޑާރަނައިބު އިބްރާހިމް ރިއްފަތު ރައްޔިތުންގެ މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނެ، އިދިކޮޅުން މިއަދު ހުށަހެޅި މައްސަލަ ބޭރުކޮށްލައިފި އެވެ.
ވީ ކިހިނެއް؟ - މި މައްސަލަ މަޖިލީހަށް ހުށަހެޅުއްވީ، ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް އެވެ. އެ މައްސަލަ ބޭރުކޮށްލީ، 48 މެންބަރުންގެ ވޯޓުންނެވެ. އެއްކޮޅަށް ވޯޓު ދެއްވީ 20 މެންބަރުންނެވެ.
ތަފްސީލު - މި މައްސަލަ ހުށަހެޅިއިރު، މިއަދުގެ ޖަލްސާގެ އެޖެންޑާގައި ފުރަތަމަ ކަމަކަށް އޮތީ، ރިއްފަތުގެ އިތުބާރު ނެތް ކަމުގެ މައްސަލައިގައި ބަކީ އޮތް ބަހުސްގެ ވަގުތު ކުރިއަށް ގެންދިއުމެވެ. ރިއްފަތު ވެސް މިއަދުގެ ޖަލްސާއަށް ވަޑައިގެން އިންނެވި އެވެ. އޭރު އެ މައްސަލަ ހުށަނޭޅޭނެ ކަމަށް ބުނެ، ސަރުކާރަށް ތާއީދުކުރައްވާ މެންބަރުން އަޑު އުފުއްލަވަމުން ގެންދެވި އެވެ.
ހުސައިން ހުށަހެޅުއްވި އިމްތިޔާޒުގެ މައްސަލައަކީ:
-
އިމުގެ މައްސަލައިގައި ރިއްފަތު ލިޔުމުން ފޮނުއްވި ޖަވާބުގައި މަޖިލީހުގެ އިމްތިޔާޒުތަކާއި ބާރުތަކަށް ވަނީ އަރައިގެންފައި
-
އެ ޖަވާބުގައި އިމްތިޔާޒަށް އަރައިގަތް ކަމަށް ފާހަގަކުރަނީ، އިމުގެ މައްސަލައިގައި މަޖިލީހުގެ ބަހެއް ހޯދަން ނުޖެހޭ ކަމަށް ރިއްފަތު ވިދާޅުވެފައިވާތީ
-
އޭގެ އިތުރުން، އިތުބާރު ނެތް ކަމުގެ މައްސަލައިގައި މެންބަރުން ސުވާލުކުރެއްވުމުން ޖަވާބު ދެއްވަން ނުޖެހޭ ފަދަ މޭރުމަކުން ރިއްފަތު އިއްޔެ ވާހަކަދައްކާފައިވާތީ
-
އެއީ މަޖިލީހަށް ކުރައްވާފައިވާ "މަލާމާތެއް" އަދި ވަރަށް ބޮޑު ކަންބޮޑުވުމެއް
-
މިކަން ކަމަކީ މަޖިލީހުގެ އިމްތިޔާޒުތަކާއި ބާރުތަކަށް އަރައިގަތުން؛ އޭނާ ހުށަހެޅުއްޅީ މި މައްސަލަ މަޖިލީހުގެ އިމްތިޔާޒުތަކާ ބެހޭ ކޮމިޓީއަށް ފޮނުވުމަށް
މި މައްސަލައަށް ވޯޓަށް އެހުމުގެ ކުރިން، ސަރުކާރުގެ މެންބަރުން އެ މައްސަލަ ހުށަނޭޅޭނެ ކަމަށް ބުނެ ކަންބޮޑުވުން ފާޅުކުރެއްވި އެވެ. ނަމަވެސް، ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ، މަޖިލީހުގެ ގަވައިދުގެ 186 ވަނަ މާއްދާގެ ދަށުން އިމްތިޔާޒުގެ މައްސަލަ ހުށަހެޅޭނެ ކަމަށެވެ.
އެ މާއްދާގައި ބުނަނީ:
-
އިމްތިޔާޒުގެ މައްސަލައެއް ހުށަހަޅަން ބޭނުންވާ މެންބަރަކު، އެ މައްސަލައެއްގެ ނޯޓިސް، އެ މައްސަލައެއް ހުށަހަޅަން ބޭނުންވާ ޖަލްސާއެއްގެ 15 މިނެޓް ކުރިން މަޖިލިސް ރައީސަށް ފޮނުއްވަން ވާނެ
-
އެ މައްސަލައެއް ވާން ޖެހޭނީ، ވޭތުވެދިޔަ ހަތް ދުވަސް ތެރޭ ހިނގާފައިވާ ކަމަކާ ގުޅޭ މައްސަލައަކަށް އަދި މަޖިލީހުގެ ނުވަތަ މެންބަރެއްގެ އިމްތިޔާޒާ ގުޅޭ މައްސަލައަކަށް ވެގެން ނުވާނެ
-
މައްސަލައިގެ ޝަރުތު ފުރިހަމަވާ ނަމަ، ރިޔާސަތުން އެ މައްސަލަ ކުރިއަށް ގެންދިއުމަށް ފެނޭތޯ ވޯޓެއް ނަގަން ޖެހޭ؛ އަގުބަލިއްޔަތު ނުލިބިއްޖެ ނަމަ، އެ މައްސަލަ އެހާ ހިސާބުން ނިމުނީ
މެންބަރު ހުސައިންގެ މައްސަލަ ހުށަހެޅުމުގެ ކުރިން ނިޒާމީ ނުކުތާއެއް ނަންގަވައި މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވީ، މަޖިލީހުގެ ގަވައިދުގެ 182 މާއްދާގެ (ހ)ގެ ދަށުން އިމްތިޔާޒުގެ މައްސަލަތަކަކީ ގާނޫނުއަސާސީގެ 90 ވަނަ މާއްދާ އާއި މަޖިލީޙުގެ އިމްތިޔާޒުތަކާއި ބާރުތަކުގެ ގާނޫނުގައި ބަޔާންކޮށްފައިވާ އެންމެހާ ކަންކަމެކެވެ. އެހެންކަމުން، މައްސަލަ ހުށަނޭޅޭނެ ކަމަށް ޝަރީފް ވިދާޅުވި އެވެ.
ނަމަވެސް، ނަޝީދު ވިދާޅުވީ މި މައްސަލަ ހުށަހެޅޭނެ ކަމަށެވެ. އަދި މެންބަރު ހުސައިންއަށް މައްސަލަ ހުށަހަޅަން ފުރުސަތު ދެއްވި އެވެ.
ހުސައިން މައްސަލަ ހުށަހެޅުއްވުމާ އެކު، ނަޝީދު ވިދާޅުވީ އެ މެންބަރުގެ ދެވަނަ ސިޓީއެއް މިހާރު ލިބިވަޑައިގެންފައިވާ ކަމަށެވެ.
"އިއްޒަތްތެރި މެންބަރަށް އެނގިވަޑައިގަންނަވާނެ، އިއްޒަތްތެރި މެންބަރަށް މި މައްސަލަ ކޮމިޓީއަށް ވެސް ހުށަހެޅެން އޮތްކަން. ދެންމެ ތި ހުށަހެޅުއްވީ ތަޅުމަށް. ތަޅުމުން ފާސްވެއްޖެ ނަމަ، މި މައްސަލަ ދާނީ ކޮމިޓީއަށް،" އެއް ކަމަކާ ގުޅޭ ދެ މައްސަލަ ލިބިފައިވާކަން ފާހަގަކޮށް، ނަޝީދު ވިދާޅުވި އެވެ.
ނަޝީދު ވިދާޅުވީ، ފުރަތަމަ މައްސަލައިގައި އެދިވަޑައިގެންނެވީ، ތަޅުމުގައި ބަހުސްކޮށް، ކޮމިޓީއަށް ފޮނުވުމަށް ކަމަށެވެ. އަދި ދެވަނަ މައްސަލައިގައި ހުސައިން އެދިވަޑައިގެންނެވީ، ސީދާ ކޮމިޓީއަށް އެ މައްސަލަ ފޮނުވުމަށެވެ. އެހެންކަމުން، ވޯޓުން ކޮންމެ ގޮތަކަށް ނިންމިއަސް، ގަވައިދުގެ ދަށުން މި މައްސަލަ ސީދާ ކޮމިޓީއަށް ހުށަހެޅޭނެ ކަމަށް އެ މަނިކުފާނު ވިދާޅުވި އެވެ.
ބައެއް މެންބަރުން އޭރު ވެސް ނިޒާމީ ނުކުތާއަށް އެދެމުން ދިޔަ އެވެ. ނަމަވެސް، ނަޝީދު އެ ފުރުސަތު ނުދެއްވައި އަރާފައިވާ އޮޅުން ސާފުކުރެއްވުމަށް ކަމަށް ވިދާޅުވެ، ހުސައިންއަށް ވާހަކަ ދެއްކެވުމަށް ފުރުސަތު ދެއްވި އެވެ.
"އަޅުގަނޑު ބޮޑަށް އެދެނީ [ތަޅުމުގައި ބަހުސް ކުރުމުގެ ބަދަލުގައި] މި މައްސަލަ ކޮމިޓީން ބަލައިދިނުމަށް،" ހުސައިން ވިދާޅުވި އެވެ.
ނަޝީދު ވިދާޅުވީ، ދެ މައްސަލަ ވެސް ކުރިއަށް ގެންދާނެ ކަމަށެވެ. އެއާ އެކު، ބަހުސް ކުރަން ހުށަހެޅި މައްސަލައަށް ވޯޓަށް އެހި އެވެ. ނަމަވެސް، އެމްޑިޕީގެ ސާފު އަގުލަބިއްޔަތު އޮތް މަޖިލީހުން އެ މައްސަލަ ބޭރުކޮށްލި އެވެ.
ނަޝީދު ވިދާޅުވީ، މައްސަލައަށް ބަހުސް ކުރަން ފާސް ނުވިޔަސް، ހުށަހެޅި ދެވަނަ މައްސަލަ ކޮމިޓީއަށް ފޮނުއްވާނެ ކަމަށެވެ. ނަމަވެސް، މިފަހުން މަޖިލީހުގައި ޕާޓީތައް ތަމްސީލުކުރާ ގޮތަށް އައި ބަދަލާ އެކު، ކޮމިޓީތައް އޮތީ އެކުލަވާނުލެވިކަން އެ މަނިކުފާނު ފާހަގަކުރެއްވި އެވެ.